ဈေးကွက်ပြတ်လပ်မှုမရှိဘဲ စိုက်ပျိုးရလွယ်ကူခြင်းကြောင့် ဝါးစိုက်ပျိုးရေးကို တိုးချဲ့စိုက်ပျိုးလာကြ

ဈေးကွက်ပြတ်လပ်မှုမရှိဘဲ စိုက်ပျိုးရလွယ်ကူခြင်းကြောင့် ၂၀၂၀ခုနှစ်အတွင်း၌ ဝါးစိုက်ပျိုးရေးကို တိုးချဲ့စိုက်ပျိုးလာကြကြောင်း တောင်သူများထံမှသိရသည်။

ကျွန်တော့်မှာစိုက်ဧက စုစုပေါင်း ဧက(၆၀)လောက် ရှိပါတယ်။ စိုက်တာကတော့ သံပုရာ၊ လိမ္မော်၊ ကျွဲကော၊ သရက်၊ ပိန္နဲပင်တွေလည်း စိုက်တယ်။ အခုနောက်ပိုင်းမှာတော့ နေရာလွတ်မှန်သမျှမှာ “ဝါးပင်” ကို အဓိကထားပြီး စိုက်ပျိုးဖြစ်တယ်။ ဝါးပင်ကို ဘာလို့ စိတ်ဝင်စားခဲ့တာလည်းဆိုရင် ဝါးပင်က တစ်ခါစိုက်ပြီးတာနဲ့ သားစဉ်မြေးဆက် အစဉ်အဆက် အသုံးဝင်တယ်။ အလုပ်သမားကိုလည်း မျှော်နေစရာမလိုဘူး။ ဈေးကွက်ကလည်း အဝေးကြီး ရှာနေစရာမလိုဘူး။ ဝါးပိုး၊ ဝါးနက်၊ မျှင်ဝါး၊ ဝါးယား၊ မျှစ်ချိုဝါး တွေကို စိုက်ပျိုးထားပါတယ်။ ဝါးက အသုံးတည့်တာများတဲ့အတွက် ပြည်တွင်းဈေးကွက် ခိုင်မာတယ်။ ဈေးကွက်ပျက်မှာ တွေးပူစရာမလိုဘူးပေါ့။

ဟု ရန်ကုန်တိုင်း၊ တိုက်ကြီးမြို့နယ်၊ ဥက္ကံကျေးရွာမှ တောင်သူ ဦးခင်လှအောင် က ပြောသည်။

ဝါးပင်အများစုသည် စိုက်ပျိုးပြီး (၃)နှစ်မှ(၄)နှစ်အတွင်း၌ ဈေးကွက်ဝင်ပြီး၊ မျှစ်ချိုဝါး စသည့် ဝါးမျိုးတချို့သည် စိုက်ပျိုးပြီး (၈)လဝန်းကျင်၌ပင် ဈေးကွက်တင်ပို့နိုင်သည်။

စိုက်ပျိုးရာမှာ အခက်အခဲတော့ မရှိဘူး။ ပျိုးပင်တွေလည်း အရင်ထက်ကို ဝယ်ရလွယ်ကူလာတယ်။ မျှစ်ချိုဝါးကိုတော့ မျှစ်ထွက်နှုန်းကောင်းတာကြောင့် စိုက်ပျိုးသူများတယ်။ စိုက်မယ်ဆိုရင် ပျိုးပင်ကြိုမှာရတယ်။ ကိုယ်စိုက်မယ့်အချိန်နဲ့အရင် တစ်လလောက် ပျိုးပင်တွေကို ကြိုတင်မှာယူ ပြင်ဆင်ထားသင့်တယ်။ ကျန်တဲ့ အခက်အခဲတော့ မရှိပါဘူး။ ဈေးကွက်တင်ပို့မှု လွယ်ကူအောင် စစိုက်ကတည်းက လမ်းပန်းဆက်သွယ်ရေး ကောင်းတဲ့ နေရာတော့ ရွေးစိုက်သင့်ပါတယ်။ ရွာ၊ မြို့တွေနဲ့ နီးတဲ့နေရာ၊ လမ်းနဲ့မနီးမဝေးနေရာမျိုးဆိုရင်တော့ ပိုကောင်းတာပေါ့။

ဟု ဦးခင်လှအောင်က ဆက်လက်ပြောသည်။

ဈေးကွက်အတွင်း မျှစ်တစ်ပိဿာလျှင် (၂,၀၀၀)ကျပ်ဝန်းကျင် ဈေးနှုန်းရှိပြီး မျှစ်ပေါများချိန်များ၌ မျှစ်တစ်ပိဿာလျှင် (၁,၀၀၀)ကျပ်၊ မျှစ် ရှားပါးချိန်များ၌ မျှစ်တစ်ပိဿာလျှင်(၅,၀၀၀)ကျပ်ဈေးနှုန်းများဖြင့် ရောင်းဝယ်နေကြောင်း သိရသည်။

နန်းထက်ထက်ချစ်

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ