ဆိုင်ကလုန်းမုန်တိုင်းဖြစ်နိုင်ခြေနီးလာပြီဖြစ်ပြီး မြန်မာတစ်နိုင်ငံလုံး မိုးသက်လေပြင်းများ ကျနိုင်

ကပ္ပလီပင်လယ်ပြင်တောင်ပိုင်းနဲ့ ယင်းနှင့်ဆက်စပ်လျက်ရှိတဲ့ ဘင်္ဂလားပင်လယ်အော်အရှေ့ တောင်ပိုင်းတို့မှာ ဖြစ်ပေါ်နေတဲ့ လေဖိအားနည်းရပ်ဝန်းဟာ မနက်ဖြန် မေ ၇ ရက် ညနေပိုင်းမှာ မုန်တိုင်းငယ်၊ မေ ၈ ရက် ညနေပိုင်းမှာ ဆိုင်ကလုန်းမုန်တိုင်းတွေအဖြစ် အားကောင်းလာနိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတင်းထုတ်ပြန်ပါတယ်။

“ ဒီနေ့မြန်မာစံတော်ချိန် မွန်းလွဲ ၁၂ နာရီခွဲအချိန် တိုင်းထွာချက်များအရ ကပ္ပလီပင်လယ် ပြင်တောင်ပိုင်းနှင့် ယင်းနှင့်ဆက်စပ်လျက်ရှိသော ဘင်္ဂလားပင်လယ်အော်အရှေ့ တောင်ပိုင်းတို့တွင် ဖြစ်ပေါ်နေသော လေဖိအားနည်းရပ်ဝန်းသည် ဆက်လက်တည်ရှိ နေပါသည်။ အဆိုပါ လေဖိအားနည်းရပ်ဝန်းသည် အနောက်မြောက်ဘက်သို့ ရွေ့လျားနိုင်ပြီး၊ (၇.၅.၂၀၂၂)ရက်နေ့ ညနေပိုင်းတွင် မုန်တိုင်းငယ်အဖြစ်သို့ လည်းကောင်း၊ (၈.၅.၂၀၂၂)ရက်နေ့ညနေပိုင်းတွင် ဆိုင်ကလုန်းမုန်တိုင်းအဖြစ်သို့ လည်းကောင်း ပိုမိုအားကောင်းလာနိုင်ပြီး၊ အနောက်မြောက်ဘက်သို့ ဆက်လက်ရွေ့လျားကာ၊ (၁၀.၅.၂၀၂၂)ရက်နေ့တွင် ဘင်္ဂလားပင်လယ်အော်အနောက်အလယ်ပိုင်း (အိန္ဒိယ နိုင်ငံ၊ အင်ဒရာပရာဒေ့ရှ်မြောက်ပိုင်းကမ်းလွန်-ဩရိဿကမ်းခြေ)သို့ ရောက်ရှိနိုင် သည်ဟု ခန့်မှန်းရပါသည်” လို့ မိုးဇလက ထုတ်ပြန်ထားတာပါ။

ဒီမုန်တိုင်းကြောင့် နိုင်ငံအနှံ့ မိုးသက်လေပြင်းအန္တရာယ်တွေရှိတယ်လို့ အပြည်ပြည်ဆိုင်ရာမိုးလေဝသစောင့်ကြည့်လေ့လာသူတစ်ဦးဖြစ်သူ ဦးဝင်းနိုင်က ပြောပါတယ်။

“ မုန်တိုင်းရဲ့အရှိန်သက်ရောက်မှုကတော့ ရှိမယ်။ မိုးသက်လေပြင်းကျမယ်။ မိုးကြိုးတွေပစ်မယ်။ တချို့နေရာတွေ တောင်ကျချောင်းရေတွေဆင်းမယ်။ တစ်နိုင်ငံလုံးမိုးရွာမှာကိုး” လို့ ဦးဝင်းနိုင်က သတိပေးပါတယ်။

မိုး/ဇလ ထုတ်ပြန်ချက်မှာလည်း “ လေဖိအားနည်းရပ်ဝန်း၏အရှိန်ကြောင့် (၆.၅.၂၀၂၂)ရက်နေ့မှ (၁၀.၅.၂၀၂၂) ရက်နေ့အတွင်း နေပြည်တော်၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူးတိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်း ဒေသကြီး၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင် ပြည်နယ်နှင့် မွန်ပြည်နယ်တို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာနိုင်ပြီး၊ အချို့ဒေသများတွင် နေရာကွက်၍ မိုးကြီးနိုင်ပါသည်။ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် တစ်ခါတစ်ရံ မိုးသက်လေပြင်းများကျရောက်ပြီး လှိုင်းကြီးနိုင်ပါသည်။ မိုးသက်လေပြင်းကျစဉ် ရေပြင်/မြေပြင်လေသည် တစ်နာရီလျှင် (၃၅)မိုင်မှ မိုင်(၄၀)အထိ တိုက်ခတ်နိုင်ပါ သည်။ လှိုင်းအမြင့်မှာ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်း တစ်လျှောက်နှင့် ကမ်းလွန်ပင်လယ်ပြင်တို့တွင် (၈)ပေမှ (၁၀)ပေခန့် ရှိနိုင်ပါသည်” လို့ သတိပေးထားပါတယ်။

ကမ္ဘာလုံးဆိုင်ရာ မိုးလေဝသခန့်မှန်းဝက်ဘ်ဆိုဒ်တွေဖြစ်တဲ့ ECMWF နဲ့ GFS တို့ရဲ့ ထုတ်ပြန်ချက်တွေအရတော့ မုန်တိုင်းဟာ မေ ၁၁ ရက်ခန့်မှာ အားပျော့သွားမယ်လို့ ဦးဝင်းနိုင်က သုံးသပ်ပါတယ်။

“ အနောက်မြောက်ဘက်ကိုသွားနေရင်းနဲ့ အရှေ့ မြောက်ဘက်ကို ပြန်ကွေ့တဲ့အချိန် ၁၀ ရက်၊ ၁၁ ရက် ဝန်းကျင်လောက်မှာ ပြန်ကွေ့မယ်ဆိုတော့ အဲ့ဒီအချိန်မှာ အားပျော့သွားမယ်။ တဖြည်းဖြည်းနဲ့ ဘင်္ဂလားဒေ့ရှ်ကမ်းခြေနားကို ကပ်ရင်း ကပ်ရင်းနဲ့ လုံးဝ လေဖိအားနည်းရပ်ဝန်းအဆင့်ကို ပြန်ရောက်သွားပြီး ပျက်သွားမှာ” လို့ ဦးဝင်းနိုင်က ဆိုပါတယ်။

ဒီဆိုင်ကလုန်းမုန်တိုင်းဖြစ်လာမယ်ဆိုရင် ပြီးခဲ့တဲ့ မတ် ၂၀ ရက်ဝန်းကျင်က မြန်မာနိုင်ငံကိုရိုက်ခတ်ခဲ့တဲ့မုန်တိုင်းငယ်တုန်းက မုန်တိုင်းအဆင့်မရောက်သွားလို့ နာမည်မပေးဖြစ်ခဲ့တဲ့ အာစနီမုန်တိုင်းဆိုပြီး နာမည်ပေးမှာဖြစ်တယ်လို့ သိရပါတယ်။

Photo Crd - Win Naing FB

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ