သံဖြူဇရပ် မှိုဈေးကွက် ရောင်းအားကောင်းနေ

၂၀၁၉-၂၀၂၀ ခုနှစ် Covid-19 ကာလအတွင်း သံဖြူဇရပ်ရှိ မှိုဈေးကွက်မှာ ကျဆင်းခြင်းမရှိပဲ ရောင်းအားကောင်းနေကြောင်း မှိုစိုက်သူများက ပြောသည်။

ထွက်သမျှမှိုတွေကိုတော့ ဒိုင်ကြီးတွေက အကုန်ယူပေးနေတာပဲ။ မှိုစိုက်တဲ့သူ နည်းနေသေးတာကြောင့်လည်း ပါတယ်။ ဒါ့ကြောင့် ဈေးကွက်လိုအပ်ချက်က များနေတော့ ဒိုင်တွေကလည်း ထွက်သမျှ ယူပေးနိုင်တာ ဖြစ်မယ်။

ဟု မွန်ပြည်နယ်၊ သံဖြူဇရပ်မြို့နယ်၊ ပဒါငံကျေးရွာမှ ငွေနှင်းမှိုစိုက်တောင်သူ မပိုးအိစံ က ပြောသည်။

မွန်ပြည်နယ်၊ သံဖြူဇရပ်ရှိ ရာသီဥတုမှာ အပူချိန် (၂၅) မှ (၃၅) ဒီဂရီစတင်တီဂရိတ်နှင့် စိုထိုင်းစ (၈၀) မှ (၉၀) ရာခိုင်နှုန်းအတွင်း ရှိပြီး၊ တစ်နှစ်ပတ်လည်လုံး မှိုစိုက်ပျိုးထုတ်လုပ် နိုင်သည်။

ကိုယ်တိုင် စိုက်ပျိုးမယ်ဆိုရင် စိုက်ထုပ်တစ်ထုပ်ကို ကျပ် ၃၀၀ နဲ့ ဝယ်လို့ရပါတယ်။ ဒါပေမယ့် ကျွန်မတို့ရွာမှာဆို မှိုစိုက်တဲ့သူ အတော်လေးကိုမရှိဘူး။ ဘာလို့ဆိုရင် ရာသီဥတုပူလို့၊ တချို့ကလည်း ရေမရလို့ မစိုက်ကြတာပါ။ ကျွန်မတို့ ဒေသမှာက ပိုက်လှေလုပ်ငန်း လုပ်ကြတယ်။ အချိန်အခါအလိုက် လှေထွက်ငါးဖမ်းကြသူတွေ ရှိတယ်။ ငါးနှက် ငါးပြားဆိုတဲ့ ငါးမျိုးပေါ်တဲ့ ရာသီဆို မှိုစားသုံးမှု နည်းနည်းလျော့ပြီး၊ ငါးသိပ်မရတဲ့ အချိန်ဆို မှိုစားသုံးမှု ပိုများပါတယ်။

ဟု ၎င်းက ဆက်လက်ပြောသည်။

ငွေနှင်းမှိုတစ်ပိဿာလျှင် ဖောက်သည်ဈေး (၁၅၀၀) ကျပ်မှ (၂၀၀၀) ကျပ် ရရှိပြီး သံဖြူဇရပ်မြို့ပေါ်ရှိ မှိုဒိုင်များ၊ စားသောက်ဆိုင်များသို့ ရောင်းချနိုင်ကြောင်း သိရသည်။

နန်းထက်ထက်ချစ်(ABM)