ဇွန် ၅ ရက်နောက်ပိုင်း ကမ်းနီးကမ်းဝေးပင်လယ်ပြင်များတွင် တစ်နာရီ မိုင် ၄၀ ထိ လေပြင်းများတိုက်နိုင်

ဇွန် ၅ ရက်နောက်ပိုင်း ဘင်္ဂလားပင်လယ်အော်နဲ့ ကပ္ပလီပင်လယ်ပြင်တွေမှာအနောက်တောင်မုတ်သုံလေ အားအလွန်ကောင်းလာနိုင်ပြီး ကမ်းနီးကမ်းဝေးပင်လယ်ပြင်တွေမှာ တစ်နာရီ မိုင် ၄၀ ထိ လေပြင်းများတိုက်နိုင်လို့ အဲ့ဒီနား နေထိုင်သူတွေနဲ့ ပင်လယ်ပြင်ထွက်မယ့်သူတွေ သတိထားသင့်တယ်လို့ အပြည်ပြည်ဆိုင်ရာမိုးလေဝသစောင့်ကြည့်လေ့လာသူတစ်ဦးဖြစ်သူ ဦးဝင်းနိုင်က သတိပေးထားပါတယ်။

ကမ္ဘာလုံးဆိုင်ရာ မိုးလေဝသခန့်မှန်းဝက်ဘ်ဆိုဒ် ECMWF ရဲ့ ကြိုတင်ခန့်မှန်းချက်တွေအရ ဦးဝင်းနိုင်က သတိပေးတာပါ။

“ ကြိုတင်ခန့်မှန်းချက်အတိုင်းဆိုရင် ၇ ရက်နေ့ မနက်ပိုင်းကစပြီး တစ်နာရီကို ၂၅ မိုင်ကနေ မိုင် ၄၀ လောက်ထိ ဖြစ်လာတယ်။ လှိုင်းအမြင့်ကျတော့ ၉ ပေကနေ ၁၀ ပေအထိ ဖြစ်လာတယ်။ အဲ့ဒါက ဧရာဝတီကမ်းလွန်ပေါ့နော်။ ဟိုဘက် မော်တင်စွန်း ဘက်အခြမ်းကျတော့ လှိုင်းကော၊ လေကော ပိုများတယ်။ ဆိုကြပါစို့။ ကိုကိုးကျွန်းရဲ့မြောက်ဘက်တည့်တည့်၊ ပုသိမ်ရဲ့ အနောက်ဘက်ခြမ်းက ပင်လယ်ပြင်မှာကျတော့ လှိုင်းကလည်း ၁၂ ပေလောက်အထိ ဖြစ်လာတယ်။ နောက်တစ်ခုက လေတိုက်နှုန်းကလည်း ၂၇ ကနေ မိုင် ၄၀ လောက်အထိက ကောင်းကောင်းတိုက်နေတယ်။ ဒါက ၅ ရက်၊ ၆ ရက်၊ ၇ ရက် တွေမှာ ဖြစ်မှာပေါ့။ အများဆုံးကတော့ ၇ ရက်နေ့ညမှာ လေထန်လာမယ်” လို့ ဦးဝင်းနိုင်က Green Way ကို ပြောပါတယ်။

လက်ရှိမှာ ကမ်းနီးကမ်းဝေး ရေလုပ်ငန်းအများစု နားသွားပြီလို့ သိရပေမယ့် တချို့နီးနီးနားနား ပင်လယ်ပြင်ကို ငါးရှာထွက်တဲ့သူတွေတော့ ရှိသေးလို့ သူတို့အနေနဲ့ သတိထားသင့်တယ်လို့ ဦးဝင်းနိုင်က ဆိုပါတယ်။

“ လှိုင်းက ကမ်းခြေနားနီးနီးမှာတောင်မှ ၁၀ ပေလောက် ဖြစ်မှာကိုး။ ဧရာဝတီကမ်းရိုးတန်း အရှေ့ဘက်ခြမ်းပေါ့။ ဂေါ်ရန်ဂျီကျွန်းကနေ ဂွဘက်အထိ။ အဲ့ဒီတွေမှာ ကမ်းခြေနဲ့နီးတဲ့နေရာတွေမှာတောင်မှ လှိုင်းက ၉ ပေ၊ ၁၀ ပေလောက်ဖြစ်လာမယ်” လို့ ဦးဝင်းနိုင်က ခန့်မှန်းပါတယ်။

ဒါ့အပြင် လေပြင်းတွေက တချို့ကမ်းနားတစ်လျှောက်တိုက်နိုင်လို့ ကမ်းနားနေ ထိုင်သူတွေလည်း သတိပြုသင့်တယ်လို့ ဦးဝင်းနိုင်က ဆိုပါတယ်။

“ ဥပမာအားဖြင့် ကျောက်ဖြူရဲ့ အောက်ဘက်တောက်လျှောက် နောက် မော်တင်စွန်းကနေ အရှေ့ဘက် မုတ္တမကွေ့ တောက်လျှောက် အဲ့ဒီကနေ တနင်္သာရီကမ်းရိုးတန်းကနေ ဟိုး ကော့သောင်ရောက်တဲ့အထိပေါ့ဗျာ။ မြိတ်တို့၊ ဘုတ်ပြင်းတို့ တစ်လျှောက်ပေါ့။ အဲ့ဒီနေရာတွေမှာတော့ လေတိုက်နှုန်းများမယ်။ မိုင် ၃၀ က အောက်ထစ်ရှိနေမှာပဲ”

ဇွန် ၆ ရက်၊ ၇ ရက်နောက်ပိုင်းမှာ မုတ်သုန်အားကောင်းလာမှုနဲ့အတူ နေပြည်တော်၊ မိတ္ထီလာ၊ မန္တလေး တို့အပါအဝင် မြန်မာပြည် အလယ်ပိုင်းဒေသတွေမှာ မိုးကောင်း လာဖို့ရှိတယ်လို့လည်း သိရပါတယ်။

Photo Crd _ Win Naing FB

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ