ဂန့်ဂေါမြို့နယ်တွင် မီးရောင်ထောင်ချောက်များ စုပေါင်းထွန်းညှိ

    ဂန့်ဂေါမြို့နယ်၊ ဇာဟောကျေးရွာ၊ ကွင်းအမှတ်-၁၆၇ ရှိ မိုးနှမ်းစိုက်ခင်းများတွင် ဖျက်ပိုးအန္တရာယ် ကာကွယ်နှိမ်နင်းရေးအတွက် စိုက်ပျိုးရေးဦးစီးဌာန၊ မြို့နယ်ဦးစီးမှူး ဦးစီးအရာရှိ ဦးထင်အောင်ကြွယ်နှင့်ဝန်ထမ်းများသည် တောင်သူများနှင့်ပူးပေါင်းကာ တစ်ကွင်းတစ်စမ်တည်း မီးရောင်ထောင်ချောက်များထွန်းညှိခြင်းကို ဇွန်လ ၂၀ ရက် ညက စုပေါင်းဆောင်ရွက်ခဲ့ကြသည်။ ဇွန်လ ၂၀ ရက် နံက်ပိုင်းက ဂန့်ဂေါခရိုင်စိုက်ပျိုးရေးဦးစီးဌာန၊ ခရိုင်သီးနှံကာကွယ်ရေးတာဝန်ခံ ဦးစီးအရာရှိ ဒေါ်မြင့်မြင့်နွယ်၊ မြို့နယ်စိုက်ပျိုးရေးဦးစီးဌာနမှ ဒုတိယဦးစီးမှူး ဦးမြင့်ဇော်၊ မြို့နယ်သီးနှံကာကွယ်ရေးတာဝန်ခံ လက်ထောက်ဦးစီးမှူး ဦးသူရဇော်နှင့် ဝန်ထမ်းများသည် ဇာဟောကျေးရွာရှိ မိုးနှမ်းစိုက်ခင်းများသို့ ပိုးမွှားရောဂါ ကျရောက်မှုအခြေအနေများကို ကွင်းဆင်း ကင်းထောက်စစ်ဆေးကြပြီး တောင်သူဦးညိုစိမ့်၏ နေအိမ်တွင် ကျေးရွာအုပ်စုအုပ်ချုပ်ရေးမှူး ဦးအောင်မင်းနှင့် တောင်သူများအား တွေ့ဆုံကာ ပညာပေးဆွေးနွေးရာတွင် ဘက်စုံပိုးမွှားရောဂါကာကွယ်နှိမ်နင်းရေးနည်းလမ်းအရ ညထွက်ဖျက်ပိုးများအန္တရာယ်မှ ကာကွယ်ရန် မီးရောင်ထောင်ချောက်များ စုပေါင်းထွန်းညှိကြရေး ဆွေးနွေးဆုံးဖြတ်ခဲ့ကြခြင်းဖြစ်​သည်။