စပါးတွင် မြေသြဇာ စနစ်တကျကျွေးခြင်း

သဘာဝ မြေသြဇာ

စပါးစိုက်ပျိုးရန် မြေပြုပြင်ချိန်တွင် သဘာဝမြေသြဇာများကို တတ်နိုင်သလောက် ထည့်ပေးသင့်ပါတယ်။ စိုက်ခင်းထဲတွင်ရှိသော ရိုးပြတ်၊ ပေါင်းမြက်များကိုလည်း မြေသားနှင့် သမအောင်မွှေပြီး သမန်းပုပ် သမန်းအေးလာသည်အထိ ထားရပါမယ်။ မြေပြုပြင်ချိန်တွင် သဘာဝမြေသြဇာများမှ ထွက်ရှိလာသော အာဟာရဓာတ်များ ဆုံးရှုံးမှု မဖြစ်စေရန် စိုက်ခင်းကို ရေမပြတ်သွင်းထားရမှာ ဖြစ်ပါတယ်။ သမန်းပုပ်၊ သမန်းအေး၊ သမန်းညက်ပါက စပါးပင်ဟာ ၎င်းအတွက် အဓိကလိုအပ်သော အာဟာရဓာတ်များသာမက အနည်းလို အာဟာရဓာတ်များကိုပါ သက်တမ်းတစ်လျှောက် ရယူစားသုံးနိုင်မှာ ဖြစ်ပါတယ်။

စပါးနီတို ဖြစ်လေ့ရှိသော စိုက်ခင်းများတွင် စက်ဖွဲပြာ တစ်မျိုးတည်းကိုသာ ၁ ဧကလျှင် (၄ - ၆) အိတ်အထိ ထည့်ပေးရမှာ ဖြစ်ပါတယ်။

အဓိကလိုအပ်သော အာဟာရဓာတ်များ

ပုလဲ ဓာတ်မြေသြဇာ (ယူရီးယား)

စပါးတွင် နိုက်ထရိုဂျင်ဓာတ် ချို့တဲ့ပါက ပင်ပွားထွက်ရှိမှုနည်းပြီး အပင်ကြီးထွားသန်စွမ်းမှုကို ထိခိုက်စေနိုင်ပါတယ်။ ထို့ကြောင့် နိုက်ထရိုဂျင်ဓာတ်ရရှိရန်အတွက် ပုလဲ(ယူရီးယား) မြေသြဇာကို အသုံးပြုနိုင်ပါတယ်။ စပါးခင်းတွင် ပုလဲမြေသြဇာကို အသုံးပြုပါက အမိုနီယမ် အိုင်းယွန်းပုံစံနှင့် နိုက်ထရိတ်အိုင်းယွန်းပုံ အဖြစ် စပါးပင်မှ စားသုံးပါတယ်။ ပုလဲမြေသြဇာကျွေးတဲ့အခါ စနစ်တကျမရှိပါက အပင်မှ ရရှိတာနည်းပြီး လေလွင့်ဆုံးရှုံးမှုက ပိုများတာမို့ အထူးဂရုပြုသင့်ပါတယ်။ ပုလဲမြေသြဇာ မကျွေးခင်မှာ ပုလဲမြေသြဇာ ၁ ဆ၊ နွားချေး၊မြေဆွေး ၃ ဆ အတူရောနှပ်ကာ လုံအောင်ဖုံးပြီး တစ်ညနှပ်ထားပေးပါ။ နောက်တစ်နေ့ မနက် (သို့မဟုတ်) ညနေ မှာကြဲပက်ပေးပါ။ ဒါဆိုရင် လေလွင့်ဆုံးရှုံးမှုနည်းပြီး အပင်အတွက် အာဟာရဓာတ်များ ပိုရရှိစေပါတယ်။

တိုက်ရိုက်မျိုးစေ့ချ အခင်းတွေမှာ အရွက် ၅ ရွက်ထွက်ချိန်၊ ပျိုးထောင်စိုက်ပျိုးသော အခင်းတွေမှာ ကောက်ပင်လှန်ချိန်မှာ ကျွေးပါက ပင်ပွားစောစောထွက်၍ ကြီးထွားသန်စွမ်းခြင်း၊ ပင်ပွားနိုင်မှု စွမ်းရည်ကောင်းခြင်း၊ လုံလောက်သော အနှံအရေအတွက် ရရှိခြင်း စသည်ဖြင့် ကောင်းကျိုးများရှိပါတယ်။ အလံရွက်စတင်ထွက်ချိန်တွင် ကျွေးပါက အနှံအစေ့မှာ ပုံမှန်အတိုင်းကြီးထွားမှုရှိပြီး လုံးပိန် လုံးညှပ် လျော့နည်းမည် ဖြစ်ပါတယ်။ အနှံမထွက်မီ ၅ ရက်အလိုတွင် ကျွေးပါက ကစီဓာတ် အလုံအလောက်ရရှိသောကြောင့် အစေ့အဆန်များ ပြည့်ဖြိုးမှာ ဖြစ်ပါတယ်။ ကျွေးရမယ့်နှုန်းထားမှာ ၁ ဧကလျှင် ပုလဲမြေသြဇာ ၁ အိတ်အား ၃ ပုံ ၁ ပုံအချိုးနှင့် ၃ ကြိမ်ကျွေးရမည် ဖြစ်ပါတယ်။ မိမိစိုက်ခင်း အခြေအနေပေါ်မူတည်ပြီး နှုန်းထားပြောင်းလဲနိုင်ပါတယ်။

တီစူပါ ဓာတ်မြေသြဇာ

တီစူပါမြေသြဇာသည် အမြစ်ကြီးထွားသန်စွမ်းမှုကို အားပေးပြီး အစေ့အဆန်များကို အောင်စေပါတယ်။ တီစူပါမြေသြဇာမှာ လေလွင့်ဆုံးရှုံးမှုမရှိသောကြောင့် နွားချေး၊ မြေဆွေးတို့နှင့် ရောစပ်ရန် မလိုအပ်ပါ။ တီစူပါ မြေသြဇာကျွေးရန် အသင့်တော်ဆုံး အချိန်မှာ နောက်ဆုံးသမန်းပြင်ချိန်၌ ၁ ဧကလျှင် အိတ်ဝက်နှုန်းဖြင့် ထည့်သွင်းပေးရမှာ ဖြစ်ပါတယ်။ တီစူပါ မြေသြဇာကို နောက်ဆုံးသမန်းပြင်ချိန်နှင့် အပင်ငယ်စဥ်တွင်သာ ထည့်သွင်းသင့်ပါတယ်။ အပင်သက်တမ်းရင့်ပါက တီစူပါ မြေသြဇာအား အပင်မှ ရယူစားသုံးနိုင်ခြင်း မရှိဘဲ မြေကြီးထဲတွင်သာ ထိန်းချုပ်ခံရခြင်း ကြောင့်ဖြစ်ပါတယ်။

ပိုတက် ဓာတ်မြေသြဇာ

ပိုတက် မြေသြဇာသည် အပင်အား ကြံ့ခိုင်မာကြောမှု ရှိစေပြီး ပိုးမွှားရောဂါဒဏ်ကိုလည်း ခံနိုင်ရည်ရှိစေပါတယ်။ ပင်ပွားများစေပြီး အနှံနှင့် အစေ့အဆန်များ ပျက်စီးမှုမှလည်း ကာကွယ်နိုင်ပါတယ်။ ပိုတက်မြေသြဇာကျွေးရန် အသင့်တော်ဆုံး အချိန်မှာ ၁ ဧကလျှင် အိတ်ကြီး ၁ အိတ်၏ ၄ ပုံ ၁ ပုံအား နောက်ဆုံးသမန်းပြင်ချိန်တွင် တစ်ကြိမ်၊ အနှံလောင်း စတင်ဖြစ်ပေါ်ချိန်တွင် တစ်ကြိမ် စသည်ဖြင့် ၂ ကြိမ် ကျွေးရမည် ဖြစ်ပါတယ်။

စိုက်ပျိုးရေးဆိုသည်မှာ မည်သည့် အရာကိုမှ တစ်သတ်မှတ်တည်း သတ်မှတ်လို့တော့ မရနိုင်တာ တောင်သူကြီးတွေ အားလုံးအသိဖြစ်မှာပါ။ မိမိ နေထိုင်တဲ့ နေရာ၊ ဒေသ၊ စိုက်ခင်း အခြေအနေတွေပေါ်မူတည်ပြီး လိုက်လျောညီထွေဖြစ်အောင် လိုအပ်သလို နည်းလမ်းတွေ၊ နှုန်းထားတွေ ပြင်ဆင် အသုံးပြဖို့လိုအပ်ပါကြောင်း ...

ဇင်ထူးနိုင်

ကိုးကားချက်

လယ်ယာသီးနှံ စိုက်ပျိုးနည်း (အောင်ဝင်းထွဋ်)

http://www.ricehub.org/RT/nutrients/

Greenovator ကြော်ငြာ

သီဟိုဠ်မှ ဉာဏ်ကြီးရှင်သည် အာယုဝဍ္ဎနဆေးညွှန်းစာကို ဇလွန်ဈေးဘေး ဗာဒံပင်ထက် အဓိဋ္ဌာန်လျက် ဂဃနဏဖတ်ခဲ့သည်။

Read more

Facebook page သို့သွားရန်