စိုက်ဆင်းလေပြင်းနဲ့ မိုးကြိုးအန္တရာယ်တွေဆိုတာ ဘယ်လိုမျိုးတွေလဲ..

ဘင်္ဂလားပင်လယ်အော်၊ အိန္ဒိယ-ဘင်္ဂလားဒေ့ရှ်နယ်စပ်အနီးပင်လယ်ပြင်မှာ လေဖိအားနည်းရပ်ဝန်းတစ်ခုဖြစ်နေတာနဲ့ တောင်တရုတ်ပင်လယ်မှာ တိုင်ဖွန်းမုန်တိုင်းတစ်လုံး ဖြစ်ပေါ်နေတဲ့အခြေအနေများကြောင့် ဇွန်လအကုန်-ဇူလိုင်လဆန်းပိုင်းမှာ မြန်မာတစ်နိုင်ငံလုံး နေရာအနှံ့အပြားမိုးရွာနိုင်မှာဖြစ်ပြီး တိုင်းနဲ့ပြည်နယ်အချို့မှာတော့ မိုးကြီးမယ့်အခြေအနေများ ဖြစ်လာနိုင်ကာ ဒေသအချို့မှာ စိုစွတ်စိုက်ဆင်းလေပြင်းအန္တရာယ်နဲ့ မိုးကြိုးအန္တရာယ်တွေ ရှိလာနိုင်တယ်လို့ အပြည်ပြည်ဆိုင်ရာမိုးလေဝသစောင့်ကြည့်လေ့လာသုံးသပ်သူတစ်ဦးဖြစ်သူ ဦးဝင်းနိုင်က သတိပေးထားပါတယ်။

အဲ့ဒီလို စိုစွတ်စိုက်ဆင်းလေပြင်းအန္တရာယ်နဲ့ မိုးကြိုးအန္တရာယ်တွေဆိုတာ ဘယ်လိုမျိုးတွေလဲ၊ ဘယ်လိုအနေအထားတွေမှာဖြစ်လာနိုင်လဲဆိုတာကို Green Way အနေနဲ့ ဦးဝင်းနိုင်ထံ ဆက်သွယ်မေးမြန်းထားတာကို ဖော်ပြပေးလိုက်ပါတယ်။

စိုစွတ်စိုက်ဆင်းလေပြင်းအန္တရာယ်ဆိုတာ..

စိုက်ဆင်းလေပြင်းက နှစ်မျိုးရှိတယ်လို့ ကျွန်တော်ပြောဖူးတယ်။ တခုက ခြောက်သွေ့စိုက်ဆင်း လေပြင်း၊ နောက်တခုက စိုစွတ်စိုက်ဆင်းလေပြင်းပေါ့။ ခြောက်သွေ့စိုက်ဆင်းလေပြင်းက နွေရာသီတွေမှာဖြစ်တယ်။ မိုးတိမ်တွေမရှိဘူး။ မိုးရွာတာတွေမရှိဘူး။ လေထုစိုထိုင်းဆက တအားကို ကျနေတယ်။ ခြောက်နေတယ်။ ခြောက်နေတဲ့အချိန်မှာ မိုးတိမ်တောင်တွေကနေ ရုတ်တရက်ဆင်းလာတဲ့မိုးကြောင့် အညာဒေသအခေါ်ဆို လေနီကြမ်းကျတဲ့ပုံစံမျိုးပေါ့။ ဖြစ်တယ်။ စိုစွတ်စိုက်ဆင်းလေပြင်းကျ ခုနပြောတဲ့ လေထုစိုထိုင်းဆလည်း များနေတယ်။ နောက်တခုက မိုးတွင်းကာလလည်းဖြစ်လို့ မြေပြင်ကော၊ လေထုကကော မခြောက်ဘူးပေါ့။ စိုနေတဲ့ အနေအထား။ အဲ့ဒီအချိန်မှာကျလာတဲ့ စိုစွတ်စိုက်ဆင်းလေပြင်းက အန္တရာယ်ပိုများတယ်။ ဘာလို့လဲဆိုတော့ သူက Mass (ထုထည်) ပါလာတယ်။ လေထုထည်ပိုများပြီး မြေပြင်ပေါ်ကို ကျတဲ့ အခါကျတော့ အကုန်လုံးကို လေပြင်းက ပျံ့ပြီး ထွက်သွားတာပေါ့။ မိုးတွင်း စိုက်ဆင်းလေပြင်း ကျတဲ့အချိန်ဆို လေယာဉ်အဆင်းလမ်းကြောင်းတွေဆို သတိထားရတယ်။ ရုတ်တရက် လေတိုက်နှုန်းက ဆိုပါတော့၊ ၅ မိုင်နှုန်းလောက်ရှိရာကနေ ၃၀၊ ၄၀ ဖြစ်သွားရင် လေယာဉ်ထိန်းမရတော့ဘဲနဲ့ အဆင်းမှာ ပြေးလမ်းချော်တာတို့ဘာတို့ဖြစ်တတ်တယ်။ ကျွန်တော်တို့ ရန်ကုန် လေဆိပ်ကြီးမှာလည်း အိန္ဒိယလေကြောင်းလိုင်းက အဲဘတ်စ်တစ်စီး အဲ့လိုဖြစ်သွားဖူးတယ်။ မိုးလေဝသလည်းရှင်းတယ်။ မိုးကလည်း နည်းနည်းလေး ရွာတာလေးပဲရှိတယ်။ ပြီးတော့မှ ရုတ်တရက် စိုက်ဆင်းလေပြင်းဆင်းပြီး လေဆောင့်ပြီးတော့ တိုက်လိုက်တဲ့အချိန်မှာ ပြေးလမ်းရဲ့ ညာဘက်အခြမ်းကို ကျသွားပြီးတော့ လေယာဉ်ပျံပျက်စီးတာပေါ့။ အဲ့ဒီလိုမျိုး အန္တရာယ်တွေ ဖြစ်နိုင်တယ်။

မိုးကြိုးအန္တရာယ်ဆိုတာ..

မိုးကြိုးကတော့ အခုမိုးရွာမယ့်အခြေအနေမတိုင်ခင် တစ်ရက်၊ နှစ်ရက်ပေါ့နော်။ အခု ဇွန်လအကုန် ၂၉၊ ၃၀ ပတ်ဝန်းကျင်ထိ အပူချိန်က ၃၀ ကျော်ဖြစ်နေသေးတယ်။ အဲ့ဒီတော့ မြေပြင်မှာ ရှိတဲ့ အနေအထားနဲ့၊ အပေါ်ကနေပြီးတော့ ခြောက်သွေ့နေတဲ့အနေအထားနဲ့ မိုးတိမ်တောင်တွေအရှေ့ဘက်က ဝင်လာမယ့်ဟာတွေ သူတို့နဲ့တွေ့တဲ့အချိန်ကျရင် လေထဲမှာလည်း လျှပ်ကူး တာတွေဖြစ်မယ်။ နောက် မြေပြင်မှာလည်း ကွင်းပြင်တို့၊ သစ်ပင်ထီးထီးရှိတဲ့နေရာတို့ဆိုရင် အပေါ်ကနေ အီလက်ထရွန်က ဆင်းလာမှာ။ အဲ့လိုဆင်းလာရင် မိုးကြိုးပစ်တဲ့အနေအထားဖြစ်မှာ။

(မိုးတိမ်တောင်ကြီးတွေဖြစ်လာရင် မိုးကြိုးအန္တရာယ်ရှိနိုင်လို့ သစ်ပင်တွေအောက်မှာ မိုးခိုတာမျိုးကို ရှောင်ကြဉ်သင့်ပါတယ်။)

Photo Crd_Myanmar Fire Service Department

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ