ငရုတ်အထွက်နှုန်းကို ထိခိုက်စေနိုင်တဲ့ လှေးပိုး(Thrips)

ငရုတ်မှာ ရောဂါတွေအပြင် ပိုးမွှားတွေကလဲ ဆိုးဆိုးရွားရွားဖျက်ဆီးတတ်ပါတယ်။ ပိုးတွေအများကြီးထဲကမှ အထွက်နှုန်း တစ်ဝက်လောက်အထိ ထိခိုက်အောင်ဖျက်ဆီးနိုင်တဲ့ လှေးပိုးအကြောင်းကို အနည်းငယ်မျှဝေပေးချင်ပါတယ်ဗျ။

လှေးပိုးဆိုတာ ဘယ်လိုကောင်လေးလဲ?

- အကောင်ကြီးအဆင့်က ဝါညိုရောင်သေးသေးရှည်ရှည်ဖြစ်ပြီးချွန်ထက်တဲ့ တောင်ပံတွေနဲ့ပါ။
- သားလောင်းကောင်အဆင့်ကလဲ အကောင်ကြီးနဲ့ပုံသဏ္ဍန်တူပြီး အရွယ်အစားပဲသေးသွားတာပါ။ ဒါမဲ့ သူ့မှာ ကောက်ရိုးရောင်ရှိပြီး အတောင်တွေကတော့ မဖွံ့ဖြိုးသေးပါဘူး။

ဘယ်လိုဖျက်ဆီးကြတာလဲ?

- အကောင်ကြီးရော၊ သားလောင်းကောင်ရော နှစ်မျိုးလုံးက ငရုတ်ပင်ရဲ့ အညွှန့်၊ အဖူးတွေကြားမှာ နေထိုင်ပြီး စားသောက်လေ့ရှိပါတယ်။
- အရွက်တွေရဲ့ တစ်ရှူးတွေနဲ့ ပင်ရည်တွေကိုလဲ စုပ်စားကာ ဖျက်ဆီးကြပါတယ်။

လှေးပိုး ကျရောက်ဖျက်ဆီးရင် ဘယ်လိုလက္ခဏာတွေပြသလဲ?

- လှေပုံစံ အရွက်တွေ အပေါ်ကို လိပ်လာပါမယ်။
- အရွက်ရဲ့ ရိုးတံတွေရှည်လာပြီး အပင်ကြီးထွားမှာ ရပ်တန့်သွားမယ်။
- ငရုတ်သီးတွေမှာ ငွေမှင်ရောင်အစင်းကြောင်းတွေပေါ်ပြီး အသီးတွေ ပုံပျက်နေမယ်။
- အသီးတွေကွေးလိမ်ပြီး အရွယ်အစားသေးလာမယ် ။
- အသီးအပွင့်တွေ ကြွေကျနေမယ်။
အဲ့လို ပုံစံတွေ ဖြစ်နေရင်တော့ သေချာပါပြီ ဦးကြီးတို့ရဲ့ ငရုတ်တွေမှာ လှေးပိုးကျရောက်နေပါပြီ။

ဒါဆို ဘယ်လိုကာကွယ်နှိမ်နင်းကြမလဲ?

- ကြိုတင်ကာကွယ် ခြင်းအနေနဲ့ အရင်နှစ်ကလှေးပိုးကျထားတဲ့အခင်းမှာ ငရုတ်မစိုက်ဘဲ အခြားသီးနှံစိုက်ပေးပါ။
- ပိုးကျနေတဲ့အရွက်တွေကို ခူးပစ်ပါ။ဆိုးဆိုးဖျက်ဆီးခံနေရတဲ့ အပင်တွေဆို နှုတ်ပစ်ပါ။
- ပေါင်းမြက်များကို ရှင်းလင်းပါ။
- ငရုတ်ကို ကြက်သွန်နီနှင့် ရောမစိုက်ပါနဲ့ နှစ်မျိုးစလုံးက လှေးပိုးကြိုက်တဲ့သီးနှံတွေမို့ပါ။
- တမာပိုးသတ်ဆေး ဖျန်းပေးလို့ရပါတယ်။
- ပိုးသတ်ဆေး အုပ်စုတူတာတွေကို ဆက်တိုက်ဖျန်းတာမျိုးရှောင်ပါ။
- ဓာတုပိုးသတ်ဆေးကို မဖြစ်မနေသုံးရမယ်ဆိုရင် ကာဘိုဖြူရမ် (3g) ,မာလာသီယွန် စသောဆေးတစ်မျိုးမျိုးကို အညွှန်းစာအတိုင်း စနစ်တကျ ဖျန်းပေးပါ။

ထွန်းရာဇာ

Ref; http://agropedia.iitk.ac.in/content/chilli-thrip
http://agritech.tnau.ac.in/crop_protection/chilli/chilli_1.html

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ