လယ်ယာထွက်ကုန်များကိုအခြေခံသည့် တန်ဖိုးမြှင့်စားသောက်ကုန်ထုတ်စက်မှုဇုန်ဖော်ဆောင်မည်

လယ်ယာထွက်ကုန်များကိုအခြေခံသည့် တန်ဖိုးမြှင့်စားသောက်ကုန်ထုတ်စက်မှုဇုန်ဖော်ဆောင်မည်

 

ရန်ကုန်၊ ဇွန် ၂၆ ရက်။

 

လယ်ယာထွက်ကုန်ပစ္စည်းများကိုအခြေခံ၍ တန်ဖိုးမြှင့်စားသောက်ကုန် ထုတ်လုပ်ရေးနှင့် လုပ်သားစွမ်းအား အခြေပြု စက်မှုလုပ်ငန်းဇုန်ကို အမေရိကန် ဒေါ်လာသန်း ၁၅၀ ခန့် ရင်းနှီးမြှုပ်နှံ၍ ဆောင်ရွက်သွားမည် ဖြစ်ကြောင်း Dagon International Limited ကုမ္ပဏီထံမှ သိရသည်။ ယင်းစီမံကိန်းကို ရန်ကုန်မြို့၊ ဒဂုံမြို့သစ်မြို့နယ် ခေတ်မီစက်မှုလယ်ယာ စံပြစိုက်ပျိုးရေး အထူးဇုန် ဇုန် ၁၊ အကွက် ၁ ရှိ Dagon International Limited ကပိုင်ဆိုင်သည့် မြေဧက ၅၀၀ ပေါ်တွင် လေးနှစ်စီမံကိန်းဖြင့် အကောင်ထည်ဖော် ဆောင်ရွက်သွားမည် ဖြစ်ကြောင်း သိရသည်။

“စက်မှုဇုန်ဖော်ဆောင်မယ့်နေရာက အမှတ် ၂ လမ်းမကြီးနဲ့ အမှတ် ၇ လမ်းမကြီးရဲ့ထောင့်မှာတည်ရှိပါတယ်။ ယနေ့စက်မှုဇုန်တွေရဲ့ အနေအထားက ရေသန့်ပေးဝေမှု ၊ ရေဆိုးစွန့်ပစ်မှု၊ အမှိုက်စွန့်ပစ်မှုတွေကို သာမန်အားဖြင့်ပဲဖော်ထုတ်ထားတာပါ။ ကျွန်တော်တို့ စက်မှုဇုန်က နိုင်ငံတကာအဆင့်မီတဲ့ စက်မှုဇုန်ဖြစ်လာဖို့ ပိုင်လော့ပရောဂျက်အနေနဲ့ ပထမဆုံး စမ်းသပ်ဖော်ထုတ်ဖို့ ကြိုးစားဆောင်ရွက်ခဲ့ပါတယ်။” ဟု Dagon International Limited ဥက္ကဋ္ဌဦးဝင်းအောင်က ပြောသည်။

လယ်ယာထွက်ကုန်ပစ္စည်းများကို အခြေခံ၍ တန်ဖိုးမြှင့်စားသောက်ကုန် ထုတ်လုပ်ရေးနှင့် လုပ်သားစွမ်းအား အ ခြေပြု စက်မှုလုပ်ငန်းဇုန်ကို ဂျပန်နိုင်ငံအခြေစိုက် ကုမ္ပဏီတစ်ခုဖြစ်သည့် JFE Engineering Corporation နှင့် နည်းပညာပိုင်းနှင့် ရင်းနှီးမြှုပ်နှံမှုအပိုင်းများကို ပူးပေါင်းဆောင်ရွက်သွားမည်ဖြစ်ကြောင်း သိရသည်။ Dagon International Limited နှင့် JFE Engineering Corporation တို့အကြား တန်ဖိုးမြှင့်စားသောက်ကုန် လယ်ယာထွက်ကုန်ပစ္စည်းထုတ်လုပ်ရေးနှင့် လုပ်သားစွမ်းအားအခြေပြု စက်မှုလုပ်ငန်းဇုန် ဖွံ့ဖြိုးတိုးတက်ရေးနှင့် အခြေခံဆက်စပ်ဘက်စုံပံ့ပိုးမှုလုပ်ငန်းများ အကောင်အထည်ဖော်နိုင်ရန် နားလည်မှုစာချွန်လွှာ (MoU) လက်မှတ်ရေးထိုးခဲ့ခြင်းကို ဇွန်လ ၂၅ ရက်က ရန်ကုန်မြို့ရှိ Novot el Hotel တွင် ကျင်းပခဲ့ခြင်းဖြစ်သည်။

“ကျွန်တော်တို့ ကုမ္ပဏီရဲ့ တာဝန်က နည်းပညာကိုအသုံးချပြီး ကောင်းကျိုးပေးတဲ့ စက်မှုဇုန်တစ်ခု ဖြစ်ပေါ်လာရေးပါ။ ဥပမာ လျှပ်စစ်၊ ရေ၊ မီးတို့ အပြည့်အဝပေးနိုင်ရေးတို့ ပါဝင်ပါတယ်။” ဟု JFE Engineering Corporation မှ MD Mr. Masakazu Yoshida က ပြောသည်။ စီမံကိန်းအကောင်အထည်ဖော်ဆောင်ရွက်ရန်အတွက် လက်ရှိတွင် မြန်မာနိုင်ငံရင်းနှီးမြှုပ်နှံမှုကော်မရှင် (MIC) ထံတင်ပြထားပြီး ခွင့်ပြုချက်ရရှိပါက ပွင့်လင်းရာသီတွင် စတင်အကောင်အထည်ဖော်သွားမည်ဖြစ်ပြီး Phase 1၊ Phase 2 နှင့် Phase 3 စသည့် အပိုင်းသုံးပိုင်းဖြင့် အမေရိကန်ဒေါ်လာသန်း ၁၅၀ ကို အပိုင်းလိုက် ရင်းနှီးမြှုပ်နှံဆောင်ရွက်သွားမည်ဖြစ်ကာ စီမံကိန်းကာလမှာ လေးနှစ်ခန့်ကြာမြင့်မည်ဖြစ်ကြောင်း Dagon International Limited ကုမ္ပဏီထံမှ သိရသည်။ တန်ဖိုးမြှင့်စားသောက်ကုန်ထုတ်လုပ်မည့် စက်မှုဇုန်အပြင် ပြပွဲခန်းမများ၊ Whole Sale Market များ၊ စက်မှုဇုန်မှထွက်ရှိလာသည့်ကုန်ပစ္စည်းများကို ရောင်းချမည့်ဆိုင်ခန်းများ၊ လူနေအိမ်တိုက်ခန်းများနှင့် ပန်းခြံလည်း ပါဝင်မည်ဖြစ်ပြီး အလုပ်အကိုင်အခွင့်အလမ်းများစွာကိုလည်း ဖန်တီးပေးနိုင်မည်ဖြစ်ကြောင်း သိရသည်။

အေးအေးမြင့်(ABM)