ပဲပုပ်သီးနှံတွင် ပဲမြစ်ဖုဇီဝမြေသြဇာနှင့် ဓါတုမြေသြဇာတို့ တွဲဖက်အသုံးပြုခြင်း၏ အကျိုးသက်ရောက်မှု သုတေသနမှထူးခြားသော တွေ့ရှိချက်

စိုက်ပျိုးရေးသုတေသနဦးစီးဌာန (DAR)၊ စိုက်ပျိုးရေးအဏုဇီဝသုတေသနဌာနစုသည် အကျိုးပြု အဏုဇီဝသက်ရှိများနှင့် သီးနှံပင်များ၏ ဆက်စပ်မှုကို သုတေသနပြုလေ့လာပြီး ရလဒ်များအပေါ် အခြေခံကာ အပင်ဖြစ်ထွန်းမှုအပေါ် အကျိုးသက်ရောက်စေမည့် ဇီဝမြေသြဇာများ ထုတ်လုပ်ဖြန့်ဖြူး သုံးစွဲစေခြင်းဖြင့် တောင်သူများ၏ အကျိုးစီးပွါးတိုးတက်စေရေးအတွက် ကူညီပံ့ပိုးပေးရန် မျှော်မှန်းချက်ဖြင့် သုတေသနလုပ်ငန်းများကို ဆောင်ရွက်လျက်ရှိပါသည်။

ထိုကဲ့သို့ သုတေသနလုပ်ငန်းများ ဆောင်ရွက်လျက်ရှိရာ ပဲမျိုးစုံသီးနှံတွင် လေထဲမှ နိုက်ထရိုဂျင်ကို ဖမ်းယူပေးနိုင်သည့် အကျိုးပြု အဏုဇီဝဖြစ်သော ရိုင်ဇိုဘီယမ် ဘက်တီးရီးယားနှင့် သဟဇီဝဖြစ်စဉ် ဖြစ်ပေါ်မှုအားလည်း စမ်းသပ်လေ့လာလျက်ရှိပါသည်။ အပင်မှ ရိုင်ဇိုဘီယမ် ဘက်တီးရီးယားများအတွင် အစာနှင့် သကြားကွန်ပေါင်းဓါတ်များကို စီစဉ်ပေးပြီး၊ ရိုင်ဇိုဘီယမ် ဘက်တီးရီးယားများက ပဲပင်အတွက် လိုအပ်သော နိုက်ထရိုဂျင်ဓါတ်ကို လေထဲမှ ဖမ်းယူပေး၍ အပင်များစားသုံးနိုင်သည့် ပုံစံသို့ ဓါတ်လျှော့ပြောင်းလဲပေးကာ အပြန်အလှန် သဟဇီဝဖြစ်နေခြင်း (Mutualism Symbiosis) ဖြစ်ပါသည်။

ပဲမြစ်ဖုဇီဝမြေသြဇာသုံးစွဲရာတွင် ဓါတုမြေသြဇာတစ်ချို့ကို မြေခံအဖြစ် သုံးစွဲခြင်းဖြင့် ပဲပုပ်သီးနှံ အပေါ် ပိုမိုအကျိုးသက်ရောက်မှုကို လေ့လာရန်အတွက် စိုက်ပျိုးရေးအဏုဇီဝသုတေသနဌာနစု တာဝန်ခံ ဒေါက်တာမော်မော်သန်း ဦးဆောင်၍ စမ်းသပ်ကွက် တာဝန်ခံများဖြစ်သော ဦးစောနေစေးထူးနှင့် ဒေါ်နီလာမြင့်တို့က သုတေသနပြု စမ်းသပ်လေ့လာလျက်ရှိပါသည်။ သုတေသနပြု စမ်းသပ်ထားသည့် ပဲပုပ်မျိုးမှာ ရေဆင်း- ၁၅ ပဲပုပ်မျိုးများဖြစ်ပြီး၊ မြေခံအနေဖြင့် တီစူပါ ဓါတ်မြေသြဇာ (ကြွက်ချေးမြေသြဇာ) ၃၈ ပေါင်/ ဧက (တစ်အိတ်၏ သုံးပုံ တစ်ပုံနှုန်းထား) အား ထည့်သွင်းခဲ့ခြင်းဖြစ်ပါသည်။ သုတေသနပြု စမ်းသပ်သည့် ပဲပုပ်မျိုးစေ့အား အကျိုးပြုစွမ်းအား ကောင်းသော ဒေသမျိုးကွဲများ အသုံးပြုထုတ်လုပ်ထားသည့် ရိုင်ဇိုဘီယမ် ပဲမြစ်ဖုဇီဝမြေသြဇာ လူးနယ်စိုက်ပျိုးခြင်းနှင့် ရိုင်ဇိုဘီယမ် အသုံးမပြုခြင်းဟု၍ စမ်းသပ်သုတေသနပြု စိုက်ပျိုးခဲ့ပါသည်။

စမ်းသပ်ရာတွင် ရိုင်ဇိုဘီယမ်၏ အကျိုးသက်ရောက်မှုအား ပိုမိုထိရောက်စွာ လေ့လာနိုင်ရန်အတွက် အသုံးပြုမည့် မြေများအား ပိုးသန့်ထားခြင်း (Soil Sterilization) ဖြစ်ပြီး၊ ပဲပုပ်သီးနှံအတွက် ရိုင်ဇိုဘီယမ်မျိုးကွဲ (SB ~8)ကို လူးနယ်စိုက်ပျိုးခဲ့ခြင်းဖြစ်ပါသည်။ ယခုအခါ ပဲပုပ်သီးနှံ (၃၀) ရက်သားအခြေအနေသို့ ရောက်ရှိနေပြီဖြစ်ပြီး၊ မျက်မြင်တွေ့ရှိချက်အရ ရိုင်ဇိုဘီယမ် လူးနယ်စိုက်ပျိုးထားသည့် ပဲပုပ်ပင်များအား ရိုင်ဇိုဘီယမ် အသုံးမပြုပဲ စိုက်ပျိုးထားသည့် ပဲပုပ်ပင်များနှင့်နှိုင်းယှဉ်ပါက ပိုမိုကျန်းမာသန်စွမ်းခြင်း၊ အရွက်အရောင်ပိုမိုစိမ်းစိုခြင်း၊ ရောဂါ၊ ပိုးမွှားကျရောက်မှု ဒဏ်ခံနိုင်ခြင်းစသော သိသာထင်ရှားသည့် လက္ခဏာများကို တွေ့ရှိရပါသည်။ ယင်းကဲ့သို့ ပဲပုပ်ပင် ပိုမိုကျန်းမာသန်စွမ်းခြင်းသည် တီစူပါ ဓါတ်မြေသြဇာ (ကြွက်ချေးမြေသြဇာ) ကို မြေခံအဖြစ် အသုံးပြုပေးခြင်းဖြင့် ပဲမြစ်ဖုဇီဝမြေသြဇာထဲတွင် ပါဝင်သည့် အကျိုးပြု ရိုင်ဇိုဘီယမ် ဘက်တီးရီးယားများ၏ လေထဲမှ နိုက်ထရိုဂျင်ကို ဖမ်းယူပေးနိုင်မှု စွမ်းအားသည် ပိုမို ကောင်းမွန်ခြင်းကြောင့်ဖြစ်ကြောင်းနှင့် ပဲမြစ်ဖု ဇီဝမြေသြဇာနှင့် တွဲဖက်အသုံးပြုသင့်သော ဓါတ်မြေသြဇာနှုန်းထားများအားလည်း ပဲပုပ်စိုက် တောင်သူများအား ထောက်ခံချက်ပေးနိုင်ရန်အတွက် ဆက်လက်သုတေသနပြု ဆောင်ရွက်သွား မည်ဖြစ်ကြောင်း သတင်းရရှိပါသည်။

စိုက်ပျိုးရေးဦးစီးဌာန

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ