ရုပ်ပိုင်းဆိုင်ရာထိခိုက်မှုပြင်းထန်တဲ့ ဘိုရွန်ချို့တဲ့မှုလက္ခဏာ

အပင်တွေမှာဖြစ်လေ့ရှိတဲ့ အနည်းလိုအာဟာရဓာတ်ချို့တဲ့မှုတွေ အမျိုးမျိုးရှိကြပါတယ်။ အဲ့ဒီလက္ခဏာတွေအနက် ဘိုရွန်ချို့တဲ့မှုလက္ခဏာတွေက အပင်ရဲ့ရုပ်ပိုင်းဆိုင်ရာအပေါ် ထိခိုက်စေတဲ့ အကျိုးသက်ရောက်မှု ပိုများပြားတာကို တွေ့ရှိရပါတယ်။

ဘိုရွန်ချို့တဲ့မှုလက္ခဏာ(၇)မျိုး ရှိတယ်လို့ ပညာရှင်တွေက ဆိုထားပါတယ်။

(၁) အဖျားခြောက်သေခြင်း

(၂) အရွက်များ ကြက်တောင်စည်းသဏ္ဍာန်ရှိခြင်း

(၃) စုန်းမတံမြက်စည်းဟုခေါ်သည့် ကိုင်းထွက်များခြင်း

(၄) အစေ့တွေပေါ်မှာ အစင်းကြောင်းများ ဖြစ်ပေါ်ခြင်း

(၅) ပန်းခိုင် ပုံမမှန်ခြင်း

(၆) ပျိုးပင် သေခြင်း

(၇) အရွက်များ ပုံမှန်အရောင်မဟုတ်တော့ခြင်း စတဲ့ လက္ခဏာတွေ ဖြစ်ပါတယ်။

“မုန်လာဉနီမှာဆို အညိုရောင်ပုပ်သွားတာမျိုး၊ ငရုတ်ပင်ဆို ပင်စည်တွေ အက်ကုန်တာမျိုး၊ ပန်းမုန်လာမှာဆို အခေါင်းပွဖြစ်တာမျိုး၊ မက်မွန်သီးမှာဆို အသီးကွဲအက်တာမျိုး၊ သံလွင်သီးမှာဆို မျောက်မျက်နှာဖြစ်တာမျိုး ကြုံရတတ်ပါတယ်။ ဝါဂွမ်းပင်မှာ ဘိုရွန်ချို့တဲ့ရင် အဆစ်ကြားတိုလာမယ်။ ဝါကိုင်းတွေ ပိုထွက်ပြီး အသီးမတင်တော့ဘူး။ သို့သော် ဘိုရွန်ပါတဲ့ ဓာတ်မြေသြဇာတွေ သုံးစွဲတဲ့အခါ တချို့အပင်တွေအတွက် မလိုအပ်ပဲနဲ့ သုံးရင်တော့ အဆိပ်အတောက်ဖြစ်စေနိုင်တာကို သတိပြုပေးပါ။”ဟု စိုက်ပျိုးရေးပညာရှင် ဦးရဲနိုင်ဝင်း က ရှင်းပြပါတယ်။

အရွက်တွေမှာ ပျမ်းမျှ ဘိုရွန်ပါဝင်မှု 70 ppm ရှိပြီး၊ မုန်လာဥနီ၊ ပဲလွမ်းတို့မှာ ဘိုရွန် 152 ppm နဲ့ 283 ppm အသီးသီးပါဝင်ကြောင်း သုတေသနပညာရှင်များက ဆိုထားပါတယ်။

ပဲအမျိုးမျိုး၊ ဥစားနဲ့ အမြစ်စား အပင်အမျိုးမျိုးနဲ့ ဝါပင်တွေအတွက် ဘိုရွန်ပါတဲ့ဓာတ်မြေသြဇာကို သင့်တော်တဲ့နှုန်းထားနဲ့ ထည့်သွင်းပေးနိုင်ပြီး၊ သီးနှံပင်အမျိုးမျိုးရဲ့ မြေဆီလွှာအတွက် အသင့်တော်ဆုံး ဘိုရွန်ပမာဏကတော့ တစ်ဧကကို (၅) ပေါင်မှ ပေါင် (၂၀) ခန့်၊ သီးနှံအမျိုးအစားအလိုက် ထည့်သွင်းပေးနိုင်ကြောင်း သိရှိရပါတယ်။

နန်းထက်ထက်ချစ်(ABM)

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)