ရာသီဥတုရုတ်တရတ်ပြောင်းလဲမှာကို ဆောင်းကုလားပဲစိုက်ပျိုးသူများ စိုးရိမ်နေ

ဆောင်းကုလားပဲစိုက်ခင်းများအနေဖြင့် ရာသီဥတုရုတ်တရတ်ပြောင်းလဲခြင်းနှင့် ပိုးကျရောက်မှုအန္တရာယ်ကို စိုးရိမ်နေရကြောင်း မန္တလေးတိုင်းဒေသကြီးရှိ ကုလားပဲစိုက်တောင်သူများထံမှ သိရသည်။

ဆောင်းတွင်းဘက်စိုက်တဲ့ ကုလားပဲခင်းတွေက ရုတ်တရတ်မိုးစွေမှာ၊ မိုးရွာချလိုက်မှာကို ကြောက်ရတယ်။ မိုးရွာချလိုက်တာနဲ့ ကုလားပဲခင်းက ပျက်စီးသွားနိုင်တယ်။ ရေဝပ်သွားတာနဲ့ အဲ့ဒီနေရာက ကုလားပဲမျိုးက ကွဲထွက်သွားပြီး အပင်မပေါက်နိုင်တော့ဘူး။ ကုလားပဲစေ့ကနေ အခြမ်းဖြစ်သွားပြီး ပျက်စီးသွားတယ်။ မြေကြီးနဲ့ရေနဲ့ထိမိလို့ ကုလားပဲတွေပွကုန်ပြီး အပင်မပေါက်နိုင်တော့တဲ့ သဘောပေါ့။ ဒီလိုဖြစ်သွားရင် မျိုးဖိုးတွေ ထွန်ယက်စရိတ်တွေ ဆုံးရှုံးကုန်မှာဆိုတော့ ရာသီဥတု ရုတ်တရတ်အပြောင်းအလဲမဖြစ်ဖို့ လိုပါတယ်။ အနည်းငယ်ရွာတာတော့ ဘာမှမဖြစ်ပေမယ့် မိုးမရွာရင်တော့ ပိုကောင်းတာပေါ့။

ဟု မန္တလေးတိုင်းဒေသကြီး၊ ရမည်းသင်းမြို့နယ်၊ ကံဘဲ့အုပ်စု၊ နွားကူးရွာမှ ကုလားပဲပင်စိုက်ပျိုးသူ ဦးနိုင်ဦးက ပြောသည်။

မြန်မာနိုင်ငံတွင် နွေ၊ မိုး၊ ဆောင်း ဥတုသုံးပါးရှိသည့်အနက် ဆောင်းကုလားပဲစိုက်ပျိုးရေးကို နိုဝင်ဘာလတွင် စတင်လေ့ရှိပြီး စိုက်သက်တမ်း (၃)လခွဲအကြာတွင် ရိတ်သိမ်းကြသည်။

မြေပြင် ထွန်ယက်ပြီး မျိုးစေ့ချစိုက်ပျိုးပြီးတဲ့နောက် ဂျမ်းတုံးနဲ့ မြေကိုသိပ်အောင် ထပ်လုပ်တယ်။ မြေမျက်နှာပြင်ညီသွားအောင်၊ အစေ့အကုန်ပေါက်အောင် အပင်ပေါက်ကြည့်လို့လှအောင်ပေါ့။ မြေကြီးကို ထပ်ဖိပေးတာပေါ့။ ထယ်ရေးတွေ ထောင်နေတာတွေ ညီသွားအောင်ပေါ့။ ဒီလိုအချိန် မိုးရွာရင်တော့ ဆုံးရှုံးသွားနိုင်တာပေါ့။ နောက်တစ်ချက်က မြေအောင်းပိုးရှိရင်လည်း ကုလားပဲခင်း တစ်ကွက်လုံး ကုန်သွားနိုင်တယ်။

ဟု ၎င်းက ဆက်လက်ပြောသည်။

ကုလားပဲစိုက်ပျိုးရာတွင် ရာသီဥတုအလွန်ပူပြင်းနေပါက အမြစ်ခြောက်ခြင်း၊ အမြစ်မဆွဲခြင်း အန္တရာယ်ကိုလည်း သတိပြုရကြောင်း သိရသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ