ငရုတ်ပင်ငယ်စဥ်မှာ ဆိုးရွားတတ်တဲ့ ခါးရိရောဂါ( Chilli damping off)

အစကောင်းမှ အနှောင်းသေချာဆိုသလို ငရုတ်ပင်ရဲ့အစဖြစ်တဲ့ အစေ့၊ငရုတ်အပင်ပေါက်အရွယ်မှာ ခါးရိမှိုရောဂါဖြစ်ပြီဆိုရင်တော့ အထွက်လဲ မကောင်းနိုင်တော့ပါဘူး။
ဒါ့ကြောင့် ခါးရိမှိုရောဂါ မဖြစ်အောင်ဘယ်လိုကြိုတင်ကာကွယ်ရမလဲဆိုတာ လေ့လာကြည့်ရအောင်လား။

ခါးရိရောဂါဖြစ်စေတဲ့ သက်ရှိမှိုဟာ မြေဆောင်မှိုရောဂါဖြစ်လို့ အစေ့တွေကိုပုပ်သွားစေတတ်ရုံသာမကဘူး အပင်ပေါက်တွေကိုလဲ သေဆုံးသွားစေတတ်ပါတယ်ဗျ။ရောဂါဖြစ်စေတတ်တဲ့သက်ရှိမှိုက စိုထိုင်းမှုမြင့်တာကိုကြိုက်နှစ်သက်လို့ ရေထုတ်မှုညံ့တဲ့မြေမှာ နှစ်ပေါင်းများစွာရှိနေတတ်ပြီး ခါးရိမှိုရောဂါကိုဖြစ်စေတတ်ပါတယ်။

ခါးရိရောဂါဖြစ်ရင် ဘယ်လိုလက္ခဏာတွေပြသလဲ?

-အစေ့တွေ အညှောက်ပေါက်နှုန်းကျမယ်၊မှိုမျှင်တွေတွယ်ကပ်နေတာတွေ့ရပါမယ်
-ငရုတ်အပင်ပေါက်တွေမှာဆိုရင် မြေကြီးနဲ့ထိစပ်နေတဲ့ပင်စည်အခြေနဲ့အမြစ်တစ်ရှူးတွေ ပုပ်နေတာကို တွေ့ရပါမယ်
-မှိုရောဂါရှိနေတဲ့ အစေ့တွေဟာ အညှောက်ထွက်ပြီး အပင်ပေါက်လေးဖြစ်လာတတ်ပေမဲ့ ရက်အနည်းငယ်ကြာမှာတော့ ရေစိုနာတွေပြပြီး ခါးရိကာ လဲကျသေ သွားပါမယ်
-မှိုရောဂါပြင်းထန်လာရင် (၂-၃)ရက်အတွင်းမှာ ပျိုးခင်းတစ်ခုလုံး ပျက်ဆီးစေနိုင်ပါတယ်။

ဘယ်လိုကာကွယ်ကြမလဲ?

ခါးရိမှိုရောဂါဖြစ်နေပြီဆိုရင်တော့ ကုသဖို့ခက်ခဲသွားပါပြီ။ဒါ့ကြောင့် ဖြစ်မှကုသခြင်းထက် ကြိုတင်ကာကွယ်ခြင်းက အထိရောက်ဆုံးနည်းလမ်းဖြစ်ပါတယ်ဗျ
-ရောဂါကင်းတဲ့ မျိုးကောင်းမျိုးစေ့ကို စိုက်ပါ။
-အစေ့တွေကိုပျိုးချိန်မှာ လေဝင်လေထွက်ကောင်းအောင်ပြုလုပ်ပေးပါ။
-ခါးရိမှိုရောဂါက အစိုဓာတ်ကိုနှစ်သက်လို့ ရေကိုစနစ်တကျပေးပြီး ရေဝပ်တာ မျိုးတွေမဖြစ်အောင်ဂရုစိုက်ပါ။
-မျိုးစေ့များကို မှိုသတ်ဆေးတစ်မျိုးမျိုးဖြင့် လူးနယ်ပြီး စိုက်ပျိုးပါ။ဥပမာ -(3g Captan or Thiram per kg seed)
-အပင်ပေါက်များကို တစ်ပင်နဲ့တစ်ပင် ချဲစိုက်ပါ။

ကဲ ဦးကြီးတို့ရဲ့ ငရုတ်ပင်လေးတွေ မှိုရောဂါကင်းပြီး အထွက်နှုန်းကောင်းကြပါစေဗျာ။

ထွန်းရာဇာ

Ref;https://www.planetnatural.com/pest-problem-solver/plant-disease/damping-off/
http://agropedia.iitk.ac.in/content/chilli-damping