မကွေးတိုင်းမှ စိုက်ပျိုးထုတ်လုပ်သည့် သခွားသီးများ ရခိုင်ပြည်နယ်သို့တင်ပို့နေရ

မကွေးတိုင်းဒေသကြီးမှ စိုက်ပျိုးထုတ်လုပ်သည့် သခွားသီးများကို မကွေးမြို့နှင့် မင်းဘူးမြို့များသို့ တင်ပို့ရောင်းချကြပြီး၊ ထိုမှတဆင့် ရခိုင်ပြည်နယ်သို့ တင်ပို့ရောင်းချနေကြောင်း သိရသည်။

ရခိုင်မှာက သခွားသီးကို အခုရာသီမျိုးမှာ စိုက်ပျိုးရတာ မလွယ်ကူဘူးလို့ သိရပါတယ်။ ဒါ့ကြောင့် ဒီဘက်ကနေ တဆင့်ခံ တင်ပို့ရောင်းချနေတာပါ။ သူတို့ဘက်မှာက သခွားပင်ကို နေရာတိုင်းမှာမစိုက်ကြသေးဘူးတဲ့။ စိုက်ရင်လည်း အခုရာသီမှာက အောင်မြင်ဖို့ရာခိုင်နှုန်း နည်းတယ်လေ။ ဒီရာသီမှာက မှိုရောဂါ ကျရောက်တတ်လို့ပါ။ သခွားက ပိုးသတ်ဆေးဖျန်းရတာ နည်းတယ်။ မှိုရောဂါတစ်ခုပဲ သေချာဂရုစိုက်ပေးရတယ်။

ဟု မကွေးတိုင်း၊ ပွင့်ဖြူမြို့နယ်မှ ဟင်းသီးဟင်းရွက်နှင့် သီးနှံစုံစိုက်ပျိုးထုတ်လုပ်နေသည့် တောင်သူ ကိုဟန်ဇော်သက်က ပြောသည်။

ထိုကဲ့သို့ ဈေးကွက်မပြတ်လပ်သည့် သခွားသီးပင်ကို မကွေးတိုင်းရှိ တောင်သူအများစု တိုးချဲ့စိုက်ပျိုးလာကြကြောင်း သိရသည်။

ကျွန်တော်က သခွား၊ ခရမ်းချဉ်၊ ဖရုံ၊ ပဲတိုင်ထောင်၊ ဂန္ဓမာပန်းတွေစိုက်ပါတယ်။ ဈေးကွက်အခြေအနေက သခွားက လက်ရှိမှာ ဈေးကောင်းရနေတယ်။ တစ်လုံးကို ၇၀ ကျပ်ကနေ ၉၀ ကျပ် ရှိတယ်။ ကျွန်တော်တို့နယ်ဘက်က တောင်သူတွေ သခွားကို အခုနှစ်တွေမှာ တိုးချဲ့စိုက်လာတယ်။ အရင်က မျက်စိ,နား မပွင့်ဘူးထင်တယ်။ အခုတော့ ဈေးကွက်ကိုသိလာပြီ။

ဟု ကိုဟန်ဇော်သက်က ဆက်လက်ပြောသည်။

တစ်ဧကကို ခန့်မှန်းခြေ အပင် ၉,၀၀၀ လောက် ဝင်ဆန့်တယ်။ တစ်ပင်ကို ဆယ်လုံးထွက်ရင်ကို သခွားက အဆင်ပြေတယ်။ တစ်ဧကစိုက်စရိတ်က ခရမ်းချဉ်ထက် နည်းတယ်လေ။ ခရမ်းချဉ်စိုက်ရင် အဲ့ဒီလောက် အရင်းအနှီးနဲ့မရဘူး။ တွက်ခြေကတော့ ကိုယ့်ခြံကိုယ် အရည်အသွေးကောင်းအောင် ထွက်နှုန်းမကျအောင်လုပ်နိုင်ရင် တွက်ခြေကိုက်ပါလိမ့်မယ်။

ဟု ၎င်းက ပြောသည်။

သခွားစိုက်ပျိုးပါက တစ်ဧကလျှင် တိုင်ရေ ၃,၀၀၀၊ အိတ်လိပ် (၃)လိပ်၊ မြေပြင်စရိတ် (၁၅၀,၀၀၀)၊ မြေသြဇာ (၃)လုံး၊ မျိုးစေ့ဖိုး အထုပ်(၃၀) ၁၂၀,၀၀၀ ပျမ်းမျှကုန်ကျနိုင်ကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ