ခရမ်းချဉ်သီးဈေးနှုန်းများ တစ်နိုင်ငံလုံးအတိုင်းအတာဖြင့် ဆက်တိုက်ကျဆင်းနေ

ခရမ်းချဉ်သီးဈေးနှုန်းများ တစ်နိုင်ငံလုံးအတိုင်းအတာဖြင့် ဆက်တိုက်ကျဆင်းနေကြောင်း ကိုယ်တိုင်စိုက်ပျိုးထုတ်လုပ်နေသူများထံမှ သိရသည်။

ဒီဇင်ဘာလမှစတင်၍ ခရမ်းချဉ်သီးဈေးနှုန်းများ ဆက်တိုက်ကျဆင်းနေခဲ့ပြီး ယခုအခါ ခရမ်းချဉ်သီးတစ်ပိဿာလျှင် ကျပ် (၁၀၀)မှ ကျပ် (၁၅၀) အတွင်း ဈေးနှုန်းများဖြင့် ရောင်းဝယ်ဖောက်ကားနေကြသည်။

ကျွန်တော်တို့ဒေသမှာ လက်ရှိဈေးဆိုရင် ခရမ်းချဉ်သီးတစ်ပိဿာကို ကျပ် ၁၅၀ အောက်ကို နည်းနည်းလေးလျော့နေပါတယ်။ ဒါတောင် ဝယ်မယ့်လူသိပ်မရှိဘူး။ ဝယ်သူက ထွက်သလောက်ကို မယူချင်ဘူး။ တစ်နိုင်ငံလုံးအတိုင်းအတာနဲ့ကို ဈေးကျနေတာပါ။ အရင်နှစ်ကထက် ပိုဆိုးရတဲ့အကြောင်းက ကိုဗစ်ကာလဆိုတော့ ဝယ်သူတွေ စီးပွားရေးမကောင်းကြလို့ ကျွန်တော်အနေနဲ့ထင်မိပါတယ်။ ခရမ်းချဉ်တွေ တအားကြီးပေါနေတာကြောင့်မဟုတ်ဘဲ စားသုံးသူဘက်က သိပ်မဝယ်တာပါ။

ဟု မကွေးတိုင်းဒေသကြီး၊ ပွင့်ဖြူမြို့နယ်၊ သာစည်ကျေးရွာမှ ခရမ်းချဉ်စီးပွားဖြစ်စိုက်ပျိုးသူ ကိုအောင်ချမ်းသာက ပြောသည်။

ယခုကဲ့သို့ ခရမ်းချဉ်ဈေးနှုန်းများ ကျဆင်းနေသည့်အတွက် တောင်သူများမှာ စိုက်ပျိုးထုတ်လုပ်ရာတွင်ကုန်ကျသည့် သွင်းအားစုစရိတ်၊ ရေသွင်းစရိတ်များ ပြန်လည်ရရှိရန်ပင် ခက်ခဲနေကြောင်း သိရသည်။

ပွဲရုံကို မပို့တော့ဘူး။ ပို့လို့လည်း မလွယ်တော့ဘူး။ တင်ပို့ရတဲ့ကားခနဲ့ ရမယ့်ငွေနဲ့က မကိုက်တော့ဘူး။ အခုလိုအချိန်ဆို ပွဲရုံတွေကလည်း လိုက်မကောက်တော့ဘူး။ ပွဲရုံကပေးနေတဲ့ဈေးကလည်း တော်တော်နည်းတယ်။ အပြင်မှာ အခု တစ်ပိဿာ ၁၅၀ ရနေတယ်ဆို ပွဲရုံသွင်းရင် တစ်ပိဿာကို ၉၀ ကျပ်၊ ၈၀ ကျပ်လောက်ပဲ ပေးတယ်။ အဲ့ဒါဆိုတော့ မကိုက်ဘူးလေ။ ဒါ့ကြောင့် ထွက်လာတဲ့ခရမ်းချဉ်တွေကို ရွာတွေကိုလည်ရောင်းတဲ့ ဖောက်သည်ဈေးသည်တွေကို ရောင်းတယ်။ အနီးအနားက ဈေးတွေကိုပို့ပြီး ရောင်းတယ်။ အခုရနေတဲ့ ဈေးနှုန်းက ရေသွင်းတဲ့စရိတ်၊ ဆေးဖိုးတောင် အရင်းပြန်မရပါဘူး။

ဟု မကွေးတိုင်းဒေသကြီး၊ မင်းဘူးမြို့မှ ခရမ်းချဉ်စိုက်တောင်သူ ကိုမောင်မောင်က ပြောသည်။

မြန်မာနိုင်ငံတွင် အများအားဖြင့် ခရမ်းချဉ်သီးများကို တစ်နှစ်ပတ်လည်လုံးနီးပါး စိုက်ပျိုးလေ့ရှိကြပြီး၊ ဩဂုတ်လပိုင်းတွင် အသီးများ စတင်ထွက်ရှိကာ မတ်လဝန်းကျင်အထိ ဆက်လက်ထွက်ရှိနေမည်ဖြစ်သည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ