ဈေးကွက်ကောင်းမွန်ခိုင်မာသည့် စပျစ်ပင်ကို စိုက်ဧကများတိုးချဲ့စိုက်ပျိုးလာ

စပျစ်သီးဈေးကွက် ကောင်းမွန်ခိုင်မာနေသည့်အတွက် ရှိရင်းစွဲ စပျစ်စိုက်ဧကများမှ ထပ်မံတိုးချဲ့စိုက်ပျိုးလာကြကြောင်း သိရသည်။

ကျွန်တော်တို့ ရမည်းသင်းဒေသလောက်တော့ စပျစ်စိုက်ပျိုးမှု မများသေးပေမယ့်လည်း တခြားဒေသတွေမှာလည်း စပျစ်ကို နည်းနည်းချင်းစစိုက်လာကြပြီ။ အခုနောက်ပိုင်းဆိုရင် ပြည်ပမှာ အလုပ်သွားလုပ်နေသူတွေတောင် မြန်မာပြည်ပြန်လာတဲ့အခါ စပျစ်စိုက်ပျိုးရေးကို စီးပွားဖြစ်လုပ်ကိုင်ဖို့အတွက် စိတ်ပါဝင်စားလို့ အချိန်ယူလေ့လာကြတယ်။ စပျစ်စိုက်ပျိုးရေးကို အွန်လိုင်းကနေ တစ်နှစ်လောက် အချိန်ပေးလေ့လာကြတယ်။ ပြီးတော့မှ စိုက်ရက်ကို တွက်ဆပြီး မြန်မာပြည်ပြန်လာပြီး စိုက်ပျိုးကြမယ်။ အခုနှစ်ဆိုရင် စိုက်ပျိုးရာသီချိန်တောင် မရောက်သေးဘူး။ မျိုးကောင်းမျိုးသန့်တွေရဖို့အတွက် စာရင်းကြိုပေး မှာယူသူတွေတောင် ရှိပါတယ်။

ဟု မန္တလေးတိုင်းဒေသကြီး၊ ရမည်းသင်းမြို့နယ်၊ ရွာတန်းဒေသရှိ လပြည့်ဝန်းစပျစ်စိုက်ပျိုးရေးခြံမှ စီမံအုပ်ချုပ်သူ ကိုမင်းဆက်ပိုင်က ပြောသည်။

စပျစ်သီးပင်သည် နှစ်ရှည်ပင်အမျိုးအစားဖြစ်သည့်အပြင်၊ စပျစ်သီး အသီးဈေးကွက်အပြင် စပျစ်ဝိုင်ထုတ်လုပ်ရောင်းချသည့် ဈေးကွက်မှာလည်း ကောင်းမွန်ခိုင်မာနေသည့်အတွက် ကျန်တိုင်းဒေသကြီးတချို့မှလည်း စိတ်ပါဝင်စား စိုက်ပျိုးကြသူများ ရှိလာခြင်း ဖြစ်သည်။

စပျစ်သီးပင်ကို စီးပွားဖြစ် စတင်စိုက်ပျိုးဖို့အတွက်ဆိုရင် စိုက်နည်းစနစ်နားလည်ဖို့အပြင် မျိုးကောင်းမျိုးသန့် ရရှိဖို့လည်း လိုအပ်ပါတယ်။ ပျိုးပင်တွေကို ကျွန်တော်တို့ဒေသမှာက နိုဝင်ဘာလလောက်မှာ စပြီးပျိုးထောင်တယ်။ ပျိုးပင်ရင့်အောင် နှစ်လအချိန်ယူပြီး၊ ဒီဇင်ဘာ၊ ဇန်နဝါရီလတွေမှာမှ မျိုးတွေကိုဖြန့်ပေးတာပါ။ ကျွန်တော်တို့ဆီက မျိုးထုတ်လိုက်တာနဲ့ စစိုက်မယ့်လူတွေက တန်းစိုက်ပျိုးလို့ရပါပြီ။ ဈေးကွက်မှာတော့ ကျွန်တော်တို့ ရမည်းသင်းဒေသက စပျစ်မျိုးတွေက ဈေးနည်းနည်းပိုတယ်။ ဈေးကြီးလည်း ဈေးကြီးတဲ့အလျှောက် ဝယ်ယူကြပါတယ်။

ဟု ကိုမင်းဆက်ပိုင်က ဆက်လက်ပြောသည်။

မြန်မာနိုင်ငံတွင် စပျစ်သီးပင်စိုက်ပျိုးရေးကို မန္တလေးတိုင်းဒေသကြီး၊ ရမည်းသင်းဒေသတွင် စိုက်ဧကပမဏအများဆုံးဖြစ်သည်။ စပျစ်စိုက်ပျိုးရာတွင် အများစုမှာ မိရိုးဖလာ (စင်တင်စိုက်နည်းစနစ်) ဖြင့်သာ စိုက်ပျိုးခဲ့ကြပြီး ယခုနောက်ပိုင်းကာလများတွင် အတန်းလိုက် (ကြိုးတန်းစနစ်) စိုက်ပျိုးနည်းဖြင့် စမ်းသပ်စိုက်ပျိုးသူများလည်း များပြားလာကြောင်း သိရသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ