ပြည်ပသို့ နာနတ်သီးတရားဝင်တင်ပို့ခွင့်ရရှိရန် တောင်သူများအထူးမျှော်လင့်နေကြ

ဈေးကွက်လိုလားမှုရှိသည့် နာနတ်သီးကို ပြည်ပသို့ တရားဝင်တင်ပို့ခွင့်ရရှိရန် တောင်သူများ အထူးမျှော်လင့်နေကြကြောင်း သိရသည်။

နာနတ်သီးကို အစိုဈေးကွက်အနေနဲ့ ပြည်ပကို တရားဝင်တင်ပို့ခွင့်တောင်းဆိုတာ မရသေးပါဘူး။ ပြည်တွင်းဈေးကွက်မှာကလည်း သီရိမင်္ဂလာဈေးကပွဲစားတွေ၊ မန္တလေးက ပွဲစားတွေ လုပ်ချင်သလိုလုပ်ပြီးမှ တောင်သူကဈေးရနေတာမျိုးတွေ ကြုံတွေ့နေရတယ်။ အဲ့ဒီဟာတွေကို ခံခဲ့ရတဲ့နှစ်ပေါင်းက (၁၀) စုနှစ်မကရှိနေပြီ။ ဒါ့ကြောင့် Export ဈေးကွက်ကိုပဲ ထိုးဖောက်ဖို့ ကြိုးစားချင်တာပါ။ ကိုယ့်ဒူးကိုယ်ချွန် ခက်ခက်ခဲခဲနဲ့ Export ဈေးကွက်ရအောင် ကြိုးစားတော့လည်း (၂) နိုင်ငံတင်ပို့ခွင့်ကို တရားဝင်မရသေးဘူး။

ဟု ရှမ်းပြည်နယ်မြောက်ပိုင်း၊ သီပေါမြို့မှ နာနတ်ပင် စီးပွားဖြစ်စိုက်ပျိုးသူ ဦးစံလင်းက ပြောသည်။

မြန်မာ-တရုတ် (၂) နိုင်ငံ တရားဝင် နာနတ်သီးတင်ပို့ရောင်းချမှုနှင့်သက်ဆိုင်သည့် MOU မရေးထိုးထားသည့်အတွက် တရားဝင်တင်ပို့ခွင့်မရရှိသေးကြောင်း သိရသည်။

ကိုယ့်နိုင်ငံကနာနတ်သီးတွေက အရည်အသွေးလည်းကောင်းတယ်၊ ဝယ်မယ့်လူလည်း အသင့်ရှိတယ်၊ တင်ပို့ခွင့်လေးပဲ လိုအပ်နေတာပါ။ ဝယ်တဲ့လူရှိပြီး ရောင်းလို့မရတဲ့သီးနှံဖြစ်နေတာ တကယ်ကိုရင်နာစရာကောင်းတယ်။ တရုတ်လူမျိုးတွေဆို ခြံထဲထိလာထိုင်စောင့်တယ်။ ဝယ်ချင်ကြတယ်။ ၂၀၁၈ ခုနှစ် ဇူလိုင်လကစပြီး နာနတ်တင်ပို့မှု အပိတ်ခံရပြီး အခုထက်ထိ တရားဝင်တင်ပို့ခွင့်တွေ မရသေးတာပါ။ အခုလိုအခက်အခဲတွေကို သက်ဆိုင်ရာဌာနအသီးသီးကို တင်ပြထားပေမယ့် ဘာမှအတိအကျ အကြောင်းမပြန်သေးပါဘူး။

ဟု ၎င်းက ဆက်လက်ပြောသည်။

မြန်မာနိုင်ငံတွင် ကချင်ပြည်နယ် ခါကာဘိုရာဇီတောင်ထွတ်အနီး ဒေသများမှလွဲပြီး၊ ကျန်ဒေသတိုင်းလိုလိုတွင် နာနတ်သီးစိုက်ပျိုးထွက်ရှိနိုင်ပြီး ရှမ်း/မြောက် သီပေါမြို့နှင့် အနီးတဝိုက်တွင် ပမာဏအများဆုံးစိုက်ပျိုးထုတ်လုပ််နေကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ