ဒေါ်နန်းထက်ထက်ချစ်
Greenovator
မှိုထွက်နှုန်းများသည့်ရာသီဖြစ်သဖြင့် မှိုဈေးနှုန်းများ ကျဆင်းနေသော်လည်း ပုံမှန်စိုက်ပျိုးသူများကိုမူ ဒိုင်များမှ ဈေးမချကြောင်း သိရသည်။
မှိုဈေးကျမကျက မှိုရဲ့အရည်အသွေးအပေါ်လည်း အဓိကကျတယ်။ ဒါ့အပြင် သူများစိုက်စိုက် မစိုက်စိုက် ပုံမှန်စိုက်တဲ့လူတွေကတော့ ဖောက်သည်ငြိမ်တယ်လေ။ ဒိုင်နဲ့ဆက်ဆံတဲ့အခါမှာလည်း မျက်နှာနာတဲ့အခါကျတော့ ဒိုင်က တော်ရုံဈေးမချတော့ဘူး။ မစိုက်တလှည့် စိုက်တလှည့်နဲ့ ဒိုင်ကို မှိုမပို့လိုက် ပို့လိုက်လူတွေကျတော့ ဒိုင်ကနှိမ်တာပဲလေ။ ပုံမှန် စိုက်နေကြလူဆိုတော့ ဒိုင်ကတောင် မှိုမရဘူးလားလို့ လှမ်းမေးနေတာ။ ဒိုင်တွေက သိတယ်လေ။ ဘယ်သူက တစ်ခါတရံစိုက်လဲ ဘယ်သူကအမြဲတမ်းစိုက်လဲဆိုတာ။ မှိုရှားတဲ့အချိန်မှာဆိုလည်း အမြဲတမ်းစိုက်တဲ့လူတွေဆီက မှိုရထားတာမို့ မှိုပေါတဲ့ရက်မှာဆိုလည်း အနစ်နာခံပြီး ဒိုင်ကပြန်ဝယ်ပေးတာပါ။
ဟု ရန်ကုန်တိုင်း၊ ရွှေပြည်သာမြို့နယ်မှ မှိုစီးပွားဖြစ် စိုက်ပျိုးသူ ကိုဇော်မျိုးအောင်က ပြောသည်။
ဇွန်လနောက်ဆုံးပတ်က မှိုဒိုင်သွင်းဈေးအနေဖြင့် ငွေနှင်းတစ်ပိဿာလျှင် ၂၅၀၀ ကျပ်၊ ကောက်ရိုးမှိုတစ်ပိဿာလျှင် ၆၅၀၀/၇၀၀၀ ကျပ် ဈေးရရှိခဲ့ပြီး၊ ယခုအခါ ငွေနှင်းမှိုတစ်ပိဿာလျှင် ၁၅၀၀ ကျပ်၊ ကောက်ရိုးမှိုတစ်ပိဿာလျှင် ၅၀၀၀ ကျပ်မှ ၆၀၀၀ ကျပ် ဈေးများဖြင့် လက်ကားရောင်းဝယ်နေသည်။
မှိုဈေးက ငါးရာ၊ တစ်ထောင်စီလောက် ကျနေတယ်။ မိုးလေးရွာတော့ ရာသီဥတုလေးက ကောင်းလာတော့ မှိုပျော်တဲ့ ရာသီဥတု၊ မှိုအထွက်များတဲ့ရာသီဥတုဖြစ်နေတာကိုး။ ဒီရာသီက စိုက်လို့လွယ်တာကိုး။ လွယ်တဲ့အခါကျတော့ စိုက်ကြတာပေါ့။ စိုက်ကြတော့ မှိုတွေက ပေါလာပြီး ဒိုင်ကနှိမ်တော့တာပေါ့။
ဟု ဒညင်းကုန်းဈေးမှ ကုန်စိမ်းရောင်းသူတစ်ဦးက ပြောသည်။
ရက်တိုတိုဖြင့် အရင်းအနှီးငွေပြန်ပေါ်သည့် မှိုစိုက်ပျိုးရေးလုပ်ငန်းကို လူအများစု စိတ်ပါဝင်စားစွာ စိုက်ပျိုးလာကြပြီး၊ မြန်မာနိုင်ငံတွင် ကောက်ရိုးမှို၊ ငွေနှင်းမှို၊ ကြွက်နားရွက်မှို စသည့် မှိုအမျိုးအစား (၃)ခုကို အဓိကစိုက်ပျိုးထုတ်လုပ်နေသည်။
(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)
Greenovator ကြော်ငြာ
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ comment.comment }}
Login With Google
{{ question.title }}