ရှမ်းပြည်နယ်တောင်ပိုင်း၊ နောင်တရားဒေသ၌ ရာသီပေါ်သီးနှံ သီးညှပ်စိုက်ပျိုးမှု တွင်ကျယ်လာ

ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ နောင်တရားဒေသအနီးတဝိုက်ရှိ တောင်သူများ ပုံမှန်စိုက်ပျိုးနေသည့်သီးနှံပင်များအပြင် ရာသီပေါ်သီးနှံများကိုပါ စီးပွားဖြစ်စိုက်ပျိုးလာကြကြောင်း သိရသည်။

ကျွန်တော်တို့က အရင်ကတော့ စီးပွားဖြစ်သီးနှံအနေနဲ့ အာလူးကိုစိုက်တယ်။ အခုနှစ်မှာမှ ခရမ်းချဉ်သီးကိုပါ တွဲစိုက်ဖြစ်သွားတာပါ။ တခြားသီးနှံတွေစိုက်ပျိုးတာက တစ်ဧကကုန်ကျစရိတ်များတယ်။ ခရမ်းချဉ်သီးစိုက်တာကတော့ ကုန်ကျစရိတ်သက်သာတယ်။ ခရမ်းချဉ်သီးက တစ်ခါစိုက်ပြီးရင် ခုနှစ်ခါလောက် ဆက်ပြီး ခူးဆွတ်ရောင်းချသွားလို့လည်းရတယ်။ ကျွန်တော် စစိုက်ထားတာ ဇွန်၊ ဇူလိုင်လလောက်က စိုက်ထားတာ အခု စက်တင်ဘာလအထိကို ခရမ်းချဉ်သီးခူးဆွတ်နေရတုန်းပဲ။ နှစ်မျိုးတွဲစိုက်လိုက်တော့ နှစ်မျိုးဝင်ငွေရသွားတာပေါ့။

ဟု ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ နောင်တရား(ဗောင်းမော်ဒုံ)မှ တောင်သူ ဦးထွန်းကျော်က ပြောသည်။

အာလူးတစ်ဧကလျှင် စိုက်ပျိုးကုန်ကျစရိတ် ကျပ် (၂၅) သိန်းဝန်းကျင် ကုန်ကျပြီး၊ ခရမ်းချဉ်သီးတစ်ဧကလျှင် စိုက်ပျိုးကုန်ကျစရိတ် ကျပ် (၅)သိန်းမှ (၇)သိန်းကြား ကုန်ကျကြောင်း သိရသည်။

ခရမ်းချဉ်သီးက မျိုးထုပ်တစ်ထုပ်ကို ခုနှစ်ထောင်ကျပ်ပဲ ရှိပါတယ်။ စိုက်ပျိုးပြီးထွက်လာတဲ့ အသီးတွေကို ရှမ်းပြည်နယ်၊ အောင်ပန်းမှာရှိတဲ့ ပွဲရုံတွေကို တင်ပို့ရောင်းချလို့ရတယ်။ ဒီဒေသတဝိုက်မှာရှိတဲ့ ဈေးတွေမှာလည်း ရောင်းလို့ရပါတယ်။ ပွဲစားတွေက ခြံအရောက်လာဝယ်တာမျိုးလည်း ရှိပါတယ်။ ခရမ်းချဉ်ဈေးက အတက်အကျရှိပေမယ့် ကိုယ်ကုန်ကျတာလည်း သိပ်မများတော့ ကိုက်တယ်။ စိုက်စရိတ်က အလွန်ဆုံးမှ ခုနှစ်သိန်းလောက်ပဲရှိတယ်လေ။ ကိုယ့်မိသားစုဝင်တွေပဲ စုပေါင်းစိုက်ပျိုးတာမို့ အလုပ်သမားခက သီးသန့်မကုန်တာကြောင့်လည်းပါပါတယ်။

ဟု ဦးထွန်းကျော်က ဆက်လက်ပြောသည်။

အဆိုပါဒေသအတွင်း ရှေးယခင်ကတည်းက စိုက်ပျိုးလာခဲ့ကြသည့် အာလူး၊ ပန်းသီး၊ သစ်တော်သီး၊ ထောပတ်သီး စသည့် သီးနှံများအပြင် စိုက်ပျိုးထုတ်လုပ်မှု ကုန်ကျစရိတ်သက်သာသည့် ပြောင်းဖူးနှင့် ခရမ်းချဉ်သီး၊ ရွှေပဲသီးပင်များကိုပါ သီးညှပ်စိုက်ပျိုးလာကြခြင်း ဖြစ်သည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ