ပွဲလမ်းသဘင်များ ကျင်းပမှုနည်းသဖြင့် စံပယ်ပန်းစျေးကွက် ပုံမှန်မရှိ

Covid ရိုက်ခတ်မှု အနည်းငယ် ငြိမ်သက်သကဲ့သို့ဖြစ်နေသော်လည်း ပွဲလမ်းသဘင်များ၊ အခမ်းအနားများ ကျင်းပမှုနည်းနေသေးသဖြင့် စံပယ်ပန်းစျေးကွက် ပုံမှန်မရှိသေးကြောင်း စံပယ်ပန်းဒိုင်များက ပြောသည်။

စံပယ်ပန်းကိုတော့ တရားပွဲတွေ၊ ဘာသာရေး၊ နိုင်ငံရေးပွဲတွေ နည်းလာတဲ့နောက် ပန်းကုံးမရောင်းရဘူး။ မင်္ဂလာဆောင်တွေမရှိတော့ မင်္ဂလာပန်းကုံးဈေးကွက်လည်း မရှိတော့ဘူး။ စျေးလည်း လူမစည်တော့ ရောင်းအားကျတာပေါ့။ ပုံမှန်ယူနေတဲ့ အိမ်တွေကလည်း ပန်းသည်ကို သိပ်လက်မခံချင်တော့ အဘဖောက်သည် (ပန်းသည်/လက်လီရောင်းသူ) တွေ ထိခိုက်ကုန်ကြတယ်။ နောက်ဆုံး အဘတို့လို စိုက်ခြံကြီးသမားတွေကို လာထိခိုက်တော့တာပေါ့။

ဟု ပဲခူးတိုင်း၊ တောင်ငူမြို့မှ စံပယ်ပန်း စီးပွားဖြစ်စိုက်ပျိုးသူ ဦးခင်မောင်မြင့်က ပြောသည်။

အလှူမင်္ဂလာ ပွဲလမ်းသဘင်များကို အားထားကြသည့် ပန်းဈေးကွက် အားနည်းလာခြင်းကြောင့် တချို့ ပန်းစိုက်ပျိုးရေးခြံများ မြေဆီဖိုး၊ အလုပ်သမားခတို့ဖြင့် တွက်ချေမကိုက်ကြကြောင်း သိရသည်။

ပန်းပွင့်တွေ ကပ်ကြေးရှည်နဲ့ ညှပ်ချပစ်ရတယ်။ ပန်းဖောက်သည်ရော အလုပ်သမားရောက သူတို့မိသားစု စားဝတ်နေရေးရှိသလို အဘတို့ကလည်း အပင်မသေအောင် ထိန်းဖို့လိုတော့ ပန်းတွေကို မျှင်းပြီးထုတ်ရတယ်။ ဒါပေမဲ့ အဘတို့က စိုက်သက်တမ်းကြာနေတဲ့ ခြံဖြစ်လို့ အလုပ်သမားတွေကို ထိန်းထားနိုင်ပါတယ်။ နွေပန်းဖြိုင်ချိန်မှာ အဘစံပယ်ခြံက အရင်နှစ်က အဖူးရေနှစ်သိန်းနဲ့ သုံးသိန်းကြား ဖြုန်းနိုင်ပေမယ့် ဒီနှစ် အဖူးရေ လေးသောင်းလောက်ပဲ ဖြုန်းနိုင်တော့တယ်။ အခု စံပယ်ပန်းစျေးက တစ်ဖူးကို တစ်ကျပ်ခွဲစျေး သူများတွေ ပန်းနားချိန်၊ ပန်းဖောက်သည်ရော၊ အလုပ်သမားရော ပုံမှန်ဝင်ငွေလေးရအောင် အဖူးရေ နှစ်သောင်းနဲ့ သုံးသောင်းကြား ထွက်အောင်တော့ မျှင်းထုတ်ပေးနေပါတယ်။

ဟု ဦးခင်မောင်မြင့်က ဆက်လက်ပြောသည်။

စံပယ်ပန်းဈေးကွက် ပုံမှန်မရှိသေးခြင်းကြောင့် လက်လီအနည်းအကျဉ်းရောင်းချသူများ၊ လမ်းလျှောက်ဈေးသည်များနှင့် အိမ်ဘုရားတင်သူများကိုသာ အားထားနေရကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ