သစ်သီးဝလံဈေးများ မြင့်တက်နေသော်လည်း ကီလိုမာလကာစိုက်ပျိုးသူများမှာ ကုန်သည်ပွဲစားများပေးသည့်ဈေးနှုန်းဖြင့်သာ ရောင်းဝယ်နေရ

သစ်သီးဝလံဈေးနှုန်းများ မြင့်တက်နေသော်လည်း ကီလိုမာလကာသီးစိုက်ပျိုးသည့် တောင်သူများမှာ ကုန်သည်ပွဲစားများပေးသည့် ဈေးနှုန်းဖြင့်သာ ရောင်းဝယ်ဖောက်ကားနေရကြောင်း ရန်ကုန်တိုင်းဒေသကြီး၊ တိုက်ကြီးမြို့နယ်ရှိ ကိုယ်တိုင်စိုက်ပျိုးသူများထံမှ သိရသည်။

"တခြားသီးနှံတွေ ဈေးကောင်းရနေတယ်။ ရန်ကုန် သစ်သီးဝလံဈေးကွက်မှာလည်း ကီလိုမာလကာသီးတွေ ဈေးကောင်းနေပေမယ့် ကျွန်တော်တို့လို စိုက်ပျိုးတဲ့တောင်သူတွေကတော့ အရင်ကနဲ့ ဈေးနှုန်းက သိပ်ပြီးကွာခြားမှုမရှိကြပါဘူး။ တောင်သူတွေလက်ထဲတော့ ဈေးကောင်းမရကြဘူး။ ကျောက်ပန်းတောင်းဘက်က ကီလိုမာလကာသီးတွေဆိုရင်လည်း ရန်ကုန်၊ သီရိမင်္ဂလာဈေးကို ၁၀ ဘီးကားကြီးတွေ တင်ပို့ကြတယ်။ သူတို့လည်း ဈေးကောင်းမရကြဘူး။ ဈေးကွက်တင်ပို့ရာမှာ ကုန်သည်ပွဲစားတွေပေးတဲ့ ဈေးနှုန်းအတိုင်းပဲ ရနေကြပါတယ်။"

ဟု ရန်ကုန်တိုင်းဒေသကြီး၊ တိုက်ကြီးမြို့နယ်မှ ကီလိုမာလကာပင် စီးပွားဖြစ်စိုက်ပျိုးသူ ဦးသန့်ဇင်က ပြောသည်။

ကီလိုမာလကာပင် စိုက်ပျိုးသူများ၏ အပင်ပြုပြင်ချိန်၊ ထိန်းသိမ်းစောင့်ရှောက်ပုံများမှာလည်း ဒေသတစ်ခုနှင့်တစ်ခု ကွဲပြားခြားနားမှုများ ရှိနိုင်ကြောင်း သိရသည်။

"အပင်ပြုပြင်ထိန်းသိမ်းဖို့ကတော့ ဒီအချိန်က နည်းနည်းလေး စောသေးတယ်။ ဒေသတစ်ခုနဲ့တစ်ခု အပင်ပြုစုကြပုံတွေ၊ ကိုင်းမွေးချိန်တွေ မတူညီကြဘူး။ သူ့ဒေသနဲ့သူပေါ့နော်။ ဇူလိုင်လမှာ ကိုင်းဖြတ်၊ အစာကျွေးသူတွေလည်း ရှိတယ်။ တစ်ချို့ စက်တင်ဘာလမှာ ကိုင်းဖြတ်၊ အစာ (မြေဩဇာ) ကျွေးကြသူတွေလည်း ရှိတယ်။ ဓာတုမြေဩဇာ၊ အော်ဂဲနစ်မြေဩဇာ နှစ်သက်ရာ ကျွေးကြတယ်။ အသီးတွေကတော့ ဖေဖော်ဝါရီလ၊ မတ်လလောက်တွေမှာ ထပ်ပေါ်လိမ့်မယ်။ အခုလည်း သူ့ဟာသူ ကီလိုမာလကာကတော့ သီးနေတဲ့နေရာတွေက သီးနေကြပါတယ်။ ကိုယ့်ဒေသနဲ့ကိုယ် ဈေးကွက်ကိုမှန်းချိန်ပြီးတော့ လုပ်ကိုင်ကြရတာပေါ့နော်။"

ဟု ဦးသန့်ဇင်က ဆက်လက်ပြောသည်။

လက်ရှိဈေးကွက်အတွင်း ကီလိုမာလကာသီး အလုံးကြီး အလုံးချောသန့် အလုံးရေ ၉၀ ကျော် (အလုံးသေးပါက အလုံးရေ ၁၃၀ မှ ၁၃၅ အတွင်း) ဝင်ဆံ့သည့် ကီလိုမာလကာသီး တစ်တင်းခွဲဝင် အိတ်တစ်အိတ်လျှင် ၂၀၀၀၀ ကျပ်ဖြင့် ရောင်းဝယ်ဖောက်ကားနေကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ