Covid ရိုက်ခတ်မှုကြောင့် ဥယျာဉ်ခြံများတွင် လုပ်သားအင်အားလိုအပ်ချက်ကို ဖြည့်ဆည်းလာနိုင်သော အခွင့်အရေးများလည်းရှိလာ

မြန်မာပြည်တွင် လုပ်သားအင်အားရှားပါးလာမှုကို အဓိကကြုံတွေ့ရသော ဥယျာဉ်ခြံလုပ်ငန်းများတွင် ယခု covid ရိုက်ခတ်မှုများကြောင့် လုပ်သားအင်အားကို လိုအပ်ချိန်တိုင်း ဖြည့်ဆည်းလာနိုင်သည်။

ခြံမှာ ရာသီပေါ်သီးနှံ၊ နှစ်ရှည်ခံအပင်တွေနဲ့ သီးနှံမျိုးစုံစိုက်ဖို့ အစီအစဉ်ရေးဆွဲထားပေမဲ့ တကယ်အကောင်အထည်ဖော်ဖို့ကျတော့ လုပ်သားအင်အားက အတော်ရှားတယ်။ စိုက်ဖို့ မြေနေရာတွေ သွင်းအားစုတွေ အဆင်သင့်ရှိနေရင်တောင် အလုပ်သမားမရတာနဲ့ မလုပ်ဖြစ်တာတွေများတယ်။ လုပ်ဖြစ်ခဲ့ရင်တောင် ပြုစုဖို့၊ ပေါင်းမြက်ရှင်းဖို့နဲ့ တခြားလုပ်စရာတွေအတွက် အလုပ်သမားငှါးမရတာနဲ့ မဖြစ်ထွန်းဘူး။ ဥယျာဉ်ခြံလုပ်ငန်းဆိုတာကလည်း အလုပ်သမားက တစ်နှစ်ပတ်လုံး လိုအပ်နေတာဆိုတော့ လုပ်သားအင်အားရှားပါးမှုက အတော်ထိခိုက်စေခဲ့တယ်။

ဟု ပြင်ဦးလွင်မြို့နယ်တွင်းရှိ ဥယျာဉ်ခြံတစ်ခုမှ ခြံတာဝန်ခံ ကိုထင်လင်းမောင် က ပြောသည်။

နိုင်ငံရပ်ခြားသို့ ထွက်ခွာ၍ အလုပ်လုပ်သူများ၊ နယ်ဘက်သို့ထွက်ခွာ အလုပ်လုပ်သူများ၊ ကျောက်စိမ်း၊ခဲ စသောတွင်းထွက်များ သွားရောက်လုပ်ကိုင်သူများ များပြားလာ၍ ပြည်တွင်းရှိ စိုက်ပျိုးရေးကဏ္ဍတွင် လုပ်သားအင်အားရှားပါလာသည်။ ၎င်းသည် အထူးသဖြင့် လုပ်သားအင်အား တစ်နှစ်ပတ်လုံးလိုသော ဥယျာဉ်ခြံများတွင် ပို၍ ထိခိုက်နစ်နာမှုများ ရှိလာသည်။

ခြံနားဝန်းကျင်ကျေးရွာက လူတွေရော ပြင်ဦးလွင်မြို့နယ်က လူအများစုရော နယ်ဘက်ထွက်လုပ်တာတို့၊ နိုင်ငံခြားထွက်လုပ်တာတို့ပဲများလာတော့ လုပ်သားအင်အားရှာရတာ အတော်ခက်တယ်။ ခုတော့ covid 19 ရောဂါစဖြစ်လည်းက နယ်ဘက်တို့ နိုင်ငံခြားတို့ထွက်လုပ်တဲ့သူတွေ တဖြည်းဖြည်း အကုန်နီးပါး ပြန်လာကြတယ်လေ။ အဲ့ကတည်းက ခြံနားဝန်းကျင်ကသူတွေက အလုပ်ခေါ်ပေးဖို့လာပြောကြတယ်။ သူတို့လည်း ခုလိုချိန် အလုပ်လိုအပ်နေသလို ကျွန်တော်တို့လည်း လိုအပ်နေတဲ့လုပ်သားအင်အားကို ဖြည့်ဆည်းနိုင်လာတယ်။ ခု ရာသီပေါ်သီးနှံတွေရော၊ နှစ်ရှည်ခံပင်တွေရော တိုးချဲ့စိုက်လာနိုင်တယ်။ ခုတလော လုပ်သားအင်အားက လိုအပ်တဲ့ချိန် လိုအပ်သလောက် ရေနေတော့ ပိုက်ဆံသုံးနိုင်ရင် နောက်ဆံတင်းစရာမလိုတော့ဘူး။ လုပ်ချင်တာကို ချက်ချင်းကောက်လုပ်နိုင်တယ်။ covid ရိုက်ခတ်မှုထဲက ရှားရှားပါးပါး ကောင်းကျိုးလို့ပဲ ပြောရမယ်။

ဟု ခြံတာဝန်ခံ ကိုထင်လင်းမောင်မှ ဆက်လက်ပြောသည်။

Covid ကပ်ရောဂါရိုက်ခတ်မှုကြောင့် မြန်မာနိုင်ငံ၏ စီးပွားရေးကဏ္ဍအတော်များများ ထိခိုက်လာမှုတွင် စိုက်ပျိုးရေးကဏ္ဍသည်လည်း ဆိုးရွာစွာထိခိုက်မှုရှိသော အခြေအနေတစ်ရပ်အဖြစ်ပါဝင်သည်။ ထိုသို့သော အခြေအနေများမှ လုပ်သားအင်အားလိုအပ်မှုကို ဖြည့်ဆည်းလာနိုင်သော အခွင့်အရေးသည် အဆိုးထဲမှအကောင်းတစ်ခုဟုပင် ဆိုရမည်ဖြစ်သည်။

သိင်္ဂီလှိုင် (B.Agr.Sc)

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ