ကြာဖူးပန်းခိုင် ငှက်ပျောပင်

အပင်နဲ့ နှီးနွယ်ပတ်သက်သူ တချို့တောင် ရုတ်တရက်ကြည့်လိုက်ရင် အပင်ရဲ့ ဇီဝကမ္မဗေဒဆိုင်ရာ ချို့ယွင်းမူမမှန်တဲ့ လက္ခဏာ (Physiological Disorder) တစ်ခုလို့ ထင်စရာရှိသော်လည်း တကယ်တော့ ဒီငှက်ပျောပင်ဟာ ငှက်ပျောမျိုးအုပ်စုဝင်တွေထဲက မျိုးစိတ်တစ်ခုမျှသာပါပဲ ဖြစ်ပါတယ်။ သူ့ရဲ့ အများသုံးအင်္ဂလိပ်အမည်ကတော့ Snow Banana ခေါ် Giant Nepal Banana ဖြစ်ပြီး၊ ရုက္ခဗေဒအမည်ကတော့ Ensete glaucum ပါ။ တခါတရံ သူ့ရဲ့ ရုက္ခဗေဒနာမည်တွေကို Musa nepalensis ၊ Ensete giganteum ၊ Ensete wilsonii တို့အဖြစ်လည်း တွေ့ရတတ်ပါတယ်။ တကယ်လည်း လူအသိနည်းသေးတဲ့ ငှက်ပျောမျိုးစိတ် တစ်မျိုးပါ။ ဒီငှက်ပျောမျိုးစိတ်ရဲ့ မူရင်းဒေသဟာ အာရှတိုက်ဖြစ်ပြီး တရုတ်၊ နီပေါ၊ အိန္ဒိယ၊ မြန်မာနဲ့ ထိုင်းတို့မှာ အတွေ့ရများကြောင်း စာပေတွေမှာ ဖော်ပြကြပါတယ်။

ဒီအပင်ရဲ့ ထူးခြားတဲ့လက္ခဏာတွေကတော့ အအေးဒဏ်ကိုခံနိုင်ပြီး အမြင့်ပေ ၂၆၀၀-၈၈၀၀ အထိပေါက်ရောက် ရှင်သန်နိုင်ပါတယ်။ အပင်ရဲ့ အမြင့်ဟာ ၁၇ ပေအထိ ကြီးထွားနိုင်ပြီး အခြားငှက်ပျောပင်တွေလို ပင်ပွား (sucker) မထွက်ဘဲ ပင်ထီး (Solitary trunk) ပါ။ အရွက်ရဲ့ အရောင်ဟာ အပြာဘက်ကို အနည်းငယ်သမ်းပါတယ်။ ပန်းခိုင်ဟာ ကြာဖူးပုံသဏ္ဌာန်ဖြစ်နေပြီး၊ ယင်းပန်းခိုင်အတွင်းမှာပဲ အသီးဖြစ်ပေါ်ကာ မျိုးစေ့တည်ပါတယ်။

ဒါကြောင့် သူ့ကို မျိုးပွားစိုက်ပျိုးချင်ရင်တော့ အလွယ်တကူပဲ မျိုးစေ့ကနေ ပျိုးထောင်ပြီး စိုက်နိုင်သလို ငှက်ပျောခေါင်း (Corm/rhizome) ကို ခွဲပြီး စိုက်နိုင်ပါတယ်။

တချိန်က ဒီငှက်ပျောပင်ဟာ လူသိနည်းပြီး ငှက်ပျောမျိုးရိုင်းအဆင့်သာ ရှိခဲ့သော်လည်း ယနေ့ခေတ်အခါမှာတော့ ပင်ပွားမထွက်ခြင်း၊ ပန်းခိုင်ဟာ ဆွဲဆောင်မှုရှိပြီး လှပခြင်းတို့ကြောင့် နိုင်ငံအချို့မှာ အလှစိုက်ငှက်ပျောမျိုး (Ornamental Banana) အဖြစ် နေရာယူလာပါပြီ ဖြစ်ပါကြောင်း ဗဟုသုတဖြစ်ဖွယ် ဖော်ပြလိုက်ပါတယ်။

ဟန်ဖြိုးအောင် (ဥယျာဉ်ခြံ)

13 July 2014

မှတ်ချက်။  ။ ဓာတ်ပုံများကို မိတ်ဆွေတစ်ယောက်ထံမှ ခွင့်ပြုချက်ဖြင့် ဖော်ပြထားပါတယ်။

ကျမ်းကိုး

၁။ Ensete glaucum (Wikipedia)

၂။ Ensete glaucum “SNOW BANANA” (www.brainsbotanicals.net)