မြေပဲဈေးဆက်တိုက်မြင့်တက်နေပြီး ဆီဈေးများလည်း အမြင့်ဆုံးရောက်

 

ယခုတစ်ပတ်အတွင်း မြေပဲဈေးတွေ ဆက်တိုက်မြင့်တက်နေပြီး မြေပဲဆီဈေးတွေလည်း အမြင့်ဆုံးကို ရောက်ရှိနေတယ်လို့ စိုက်ပျိုးရေးဈေးကွက်သတင်းအေဂျင်စီ (AMIA) ရဲ့ သတင်းပေးပို့မှုအရ သိရပါတယ်။

ပြည်ပတင်ပို့မှု ရှိနေသလို ဆီအတွက် ဝယ်ယူမှုတွေကြောင့် မြင့်တက်နေတာဖြစ်တယ်လို့ AMIA က ဆိုပါတယ်။

မန္တလေးဈေးကွက်မှာ မြေပဲလုံးအနီဆန် က တစ်ပိဿာကို ကျပ် ၅၂၀၀ ကနေ ၅၃၀၀ ပေါက်ဈေးရှိပြီး တစ်ပိဿာကို ၂၀၀ ကျပ်ဈေးတက်လာပါတယ်။

အောင်လံဈေးကွက်မှာလည်း မြေပဲလုံးအနီဆန်က တစ်ပိဿာကို ၅၁၀၀ ကျပ် ပေါက်ဈေးရှိပြီး ၂၅၀  ကျပ်၊ အဖြူဆန်ကတော့  တစ်ပိဿာကို  ၅၂၀၀ ပေါက်ဈေးရှိပြီး ၃၅၀ ကျပ် ဈေးအသီးသီး တက်လာပါတယ်။

မုံရွာဈေးကွက်မှာလည်း မြေပဲလုံးအနီဆန်နဲ့ မြေပဲလုံးအဖြူဆန်တွေဟာ တစ်ပိဿာကို ၅၂၀၀ ကနေ ၅၄၀၀ ပေါက်ဈေးရှိပြီး တစ်ပိဿာကို ၅၀၀ ကျပ် အသီးသီးဈေးတက်လာပါတယ်။

မြေပဲဆီတွေကတော့ တစ်ပိဿာကို ကျပ် ၉၀၀၀  ကနေ ၁၁၀၀၀ ကြားပေါက်ဈေးရှိနေပြီး တစ်ပိဿာကို ၁၀၀၀ ကျော် ဈေးတက်လာတယ်လို့ သိရပါတယ်။

ရန်ကုန်ဘုရင့်နောင်ဈေးကွက်မှာတော့ ကြက်သွန်နီဈေးဟာ အမျိုးအစားအလိုက် တစ်ပိဿာ ကျပ် ၂၀၀၀  ထိ ဆက်တိုက်ဈေးမြင့်တက်ခဲ့ပြီး အဲ့ဒီဈေးနဲ့ပဲ ၃ ရက်ဆက်တိုက် ဈေးငြိမ်နေပါတယ်။

အဝင်နည်းပြီး ပြည်ပတင်ပို့မှုလည်း ရှိတဲ့အပြင် အခြား ငွေကြေးဈေးမြင့်တက်ခြင်းနဲ့ သယ်ယူစရိတ်မြင့်တက်ခြင်းတွေကြောင့် ဈေးတက်နေတာဖြစ်တယ်လို့ AMIA က ဆိုပါတယ်။

(စိုက်ပျိုးရေးဈေးကွက်သတင်းအေဂျင်စီ (AMIA) က ပေးပို့လာသည့် ဈေးနှုန်းများကို ဖော်ပြခြင်းဖြစ်ပါသည်။)

(အခြားကုန်စည်နှင့်သီးနှံဈေးနှုန်းများ သိရှိလိုပါက Green App ရှိ ' သီးနှံဈေးနှုန်းများ ' ကဏ္ဍတွင် ဝင်ရောက်ကြည့်ရှုနိုင်ပါသည်။)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။