တရုတ်များ၏ သစ်ခိုးထုတ်မှုကြောင့် ကမ္ဘာ့အရှားပါးဆုံး မြန်မာ့မျောက်မျိုးစိတ်များ မျိုးသုန်းဖွယ်ရှိ

ကမ္ဘာ့အရှားပါးဆုံး စာရင်းဝင် မြန်မာနိုင်ငံက နှာခေါင်းတိုမျောက်တွေဟာ တရုတ်နိုင်ငံသားတွေရဲ့ တရားမဝင်သစ်ခိုးထုတ်လုပ်မှုနဲ့ ဆေးဖက်ဝင် ရှားပါးမျောက်ရိုးစျေးကွက်ကြောင့် မျိုးသုန်းလုနီးပါး အခြေအနေကို ရင်ဆိုင်နေကြရတယ်လို့ သိရပါတယ်။

မြန်မာနိုင်ငံမြောက်ပိုင်းမှာ အထိန်းအကွပ်မရှိ လုပ်ကိုင်နေတဲ့ တရားမဝင်သစ်ထုတ်လုပ်ငန်းတွေကြောင့် သဘာဝပတ်ဝန်းကျင်ထိခိုက်မှုနဲ့အတူ မြန်မာ့သစ်တောထဲက တောရိုင်းတိရိစ္ဆာန်တွေရဲ့ အသက်ရှင်သန်ရေးကို ဆိုးဆိုးရွားရွား ခြိမ်းခြောက်ခံနေရတာ တော်တော်ကြာပါပြီ။

ရာသီဥတုဖောက်ပြန်မှုနဲ့ လူတွေရဲ့ စီးပွားရေးနယ်ချဲ့မှုကြောင့် စားကျက်ဧရိယာတွေ တစ်နှစ်ထက်တစ်နှစ် ရှားပါးလာနေတာကို ရင်ဆိုင်နေရတဲ့အချိန်မှာ အိမ်နီးချင်းတရုတ်နိုင်ငံရဲ့ ရိုးရာတိုင်းရင်းဆေး ကုန်ကြမ်းစျေးကွက် အတွက် မြန်မာ့သစ်တောထဲက ရှားပါးတောရိုင်းတိရိစ္ဆာန်တွေဟာ စည်းမဲ့ကမ်းမဲ့ အမဲလိုက်တာကို ခံနေကြရပါတယ်။ အဲဒီတိရိစ္ဆာန်တွေလိုပဲ ရှားပါးမြန်မာ့ပရဆေးပင်တွေဟာလည်း မှောင်ခိုစျေးကွက်ကနေ တရုတ်နိုင်ငံထဲကို နေ့စဉ်တင်သွင်းခံနေရပါတယ်။ အရှေ့တောင်အာရှနိုင်ငံတွေထဲမှာ မြန်မာနိုင်ငံဟာ အင်အားကြီးတရုတ်နိုင်ငံရဲ့ သယံဇာတနယ်ချဲ့ခြင်းကို အဆိုးဝါးဆုံးခံနေရတဲ့ နိုင်ငံတစ်ခုဖြစ်ပါတယ်။ ဒါပေမယ့် ဒေသအခြေစိုက် အစိုးရနဲ့တိုင်းရင်းသားလက်နက်ကိုင်အဖွဲ့တွေရဲ့ အားပြိုင်မှု၊ ပြည်တွင်းက လူမျိုးရေးအဓိကရုဏ်းတွေနဲ့ တရုတ်ရင်းနှီးမြှုပ်နှံရေးစီမံကိန်းတွေရဲ့ မတရားမှုတွေကို ဖြေရှင်းနေရလို့ ပြည်တွင်းအခြေစိုက် နိုင်ငံရေးအင်အားစုတွေကလည်း သဘာဝပတ်ဝန်းကျင်ထိခိုက်မှုနဲ့ တောရိုင်းတိရိစ္ဆာန်ထိန်းသိမ်းစောင့်ရှောက်ရေး ကဏ္ဍတွေမှာ ထိထိရောက်ရောက် ပါဝင်ဆောင်ရွက်နိုင်ခြင်း မရှိသေးပါဘူး။

အဲဒီကွက်လပ်တွေကြားမှာ တရုတ်မှောင်ခိုသမားတွေ ခြေလှမ်းစိတ်နေတာ တော်တော်ကြာခဲ့ပါပြီ။ မြန်မာပြည်မြောက်ပိုင်းက ကချင်စစ်ဘေးဒုက္ခသည်တွေလိုပဲ မြန်မာ့သစ်တောထဲက တောရိုင်းတိရိစ္ဆာန်တွေရဲ့ အနာဂတ်ဟာလည်း မျှော်လင့်ချက်အရမ်းကင်းမဲ့တဲ့ အနေအထားကို ရောက်နေပါတယ်။

ခု မျိုးသုန်းလုဖြစ်နေတဲ့ နှာခေါင်းတိုမျောက်မျိုးစိတ်ကို မြန်မာနိုင်ငံမှာ ၂၀၁၀ခုနှစ်မှာ စတင်တွေ့ရှိခဲ့ရပြီး ကမ္ဘာပေါ်က မျိုးသုန်းလုဆဲအန္တရာယ်ကို ရင်ဆိုင်နေရတဲ့ တိရိစ္ဆာန်များစာရင်းမှာ ထိပ်ဆုံးကပါဝင်နေတယ်လို့ သိရပါတယ်။ အဲဒီမျောက်မျိုးစိတ်ဟာ ယခုအချိန်မှာ အကောင်ရေ ၂၆၀ ကနေ ၃၃၀လောက်ပဲ ကျန်တော့တယ်လို့ တောရိုင်းတိရိစ္ဆာန်စောင့်ကြည့်လေ့လာသူတွေက ဆိုကြပါတယ်။

အပေါ်မှာဖော်ပြထားတဲ့ ဓာတ်ပုံကတော့ Fauna &Flora International အဖွဲ့ကနေ ၂၀၁၄ခုနှစ် ဧပြီလ ၁ရက်နေ့မှာ ထုတ်ပြန်လိုက်တဲ့ မှတ်တမ်းဓာတ်ပုံပဲ ဖြစ်ပါတယ်။ ပုံထဲက နှာခေါင်းတိုမျောက်သားပေါက်လေးဟာ မိခင်ကို အမဲလိုက်မုဆိုးတွေက ပစ်သတ်လိုက်တဲ့အချိန် သစ်ပင်ပေါ်ကပြုတ်ကျပြီး ဒဏ်ရာနဲ့မေ့မြောနေတဲ့ ပုံပဲဖြစ်ပါတယ်။ မြန်မာ့ရေမြေပေါ်က သစ်ပင်၊ပန်းမန်၊ ပိုးမွှား၊တိရိစ္ဆာန် မှန်သမျှ မျိုးသုန်းပျောက်ကွယ်မသွားရလေအောင် ထိန်းသိမ်းစောင့်ရှောက်ရမယ့် တာဝန်ဟာ မြန်မာနိုင်ငံသားတိုင်းရဲ့ မွေးရာပါတာဝန်ဝတ္တရားဖြစ်တဲ့အကြောင်း ဝံသာနုမှ သတိပေးနှိုးဆော်လိုက်ပါရစေ။ ကျေးဇူးတင်ပါတယ်။

 

မြတ်သိန်းထွန်း

အယ်ဒီတာချုပ်

၀ံသာနု

ref; New Straits Times