မြန်မာ့ဖရဲသီးကို အာရပ်စော်ဘွားများပြည်ထောင်စုနိုင်ငံ (ဒူဘိုင်း-UAE) သို့ ပထမဆုံးအကြိမ်တင်ပို့ရောင်းချမည်

မြန်မာနိုင်ငံမှ စိုက်ပျိုးထွက်ရှိသည့် ဖရဲသီးကို အာရပ်စော်ဘွားများပြည်ထောင်စုနိုင်ငံ (ဒူဘိုင်း-UAE) သို့ ပထမဆုံးအကြိမ် တင်ပို့ရောင်းချသွားမည်ဖြစ်ကြောင်း မြန်မာနိုင်ငံ ဖရဲ၊သခွားမွှေးစိုက်ပျိုးထုတ်လုပ် တင်ပို့ရောင်းချသူများအသင်းမှ သိရသည်။

အခုလာမယ့် ဒီဇင်ဘာပထမအပတ်ကစပြီး မြန်မာ့ဖရဲသီးတွေကို ဒူဘိုင်းကိုတင်ပို့မှာ ဖြစ်ပါတယ်။ အရှေ့အလယ်ပိုင်းဈေးကွက်ကို ဒါပထမဦးဆုံးတင်ပို့တာပါ။ တရုတ်ဈေးကွက်တစ်ခုတည်းကို အားကိုးနေမယ့်အစား ဈေးကွက်သစ်တွေဖော်ဆောင်ဖို့ အများကြီးမျှော်လင့်ထားခဲ့ပါတယ်။ မိတ်ဆွေတွေရဲ့ဝိုင်းဝန်းကူညီမှုနဲ့ အသင်းရဲ့ကြိုးပမ်းမှုတွေကြောင့် အခုတော့ ဈေးကွက်သစ်ရရှိခဲ့ပါပြီ။

ဟု မြန်မာနိုင်ငံ ဖရဲ၊သခွားမွှေး စိုက်ပျိုးထုတ်လုပ်တင်ပို့ရောင်းချသူများအသင်း ဥက္ကဋ္ဌ ဦးနိုင်ဝင်းက ပြောသည်။

မြန်မာ့ဖရဲသီးများ ပြည်ပသို့တင်ပို့ရောင်းချရာတွင် တရုတ်နိုင်ငံဈေးကွက်တစ်ခုတည်းကိုသာ အဓိကထား အမှီပြုရောင်းချနေရသည့်အတွက် ယခုတင်ပို့မှုသည် မြန်မာ့ပထမဆုံး ဖရဲ၊သခွားမွှေး Export ဈေးကွက်သစ် ဖော်ဆောင်နိုင်မှုလည်း ဖြစ်သည်။

မြန်မာနိုင်ငံကနေ ဖရဲသီးတွေတင်ပို့တဲ့အခါ တစ်ပါတည်း သခွားမွှေးသီးတွေကိုလည်း အမြည်းအနေနဲ့ ထည့်ပို့ပေးလိုက်ဖို့ စီစဉ်ထားပါတယ်။ ဒီတစ်ကြိမ်မှာ ဒူဘိုင်းကိုတင်ပို့တာ အဆင်ပြေသွားတာနဲ့ ကာတာနိုင်ငံ၊ စင်ကာပူနိုင်ငံတွေကို ဆက်ပြီးတော့ တင်ပို့သွားဖို့ စီစဉ်သွားမှာပါ။

ဟု ဦးနိုင်ဝင်းက ဆက်လက်ပြောသည်။

၂၀၂၀ ခုနှစ်၊ ဒီဇင်ဘာလ(၆)ရက်နေ့တွင် ကနဦးအကြိမ်အနေဖြင့် အစေ့မဲ့ဖရဲအမျိုးအစား ဖရဲသီး (၂၅) တန်ကို တင်ပို့သွားမည်ဖြစ်ကြောင်း သိရသည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ