ပြောင်းဖူးပင်သက်တမ်းအလိုက် လိုအပ်သောအာဟာရဓာတ်များ

ယခုနှစ်များအတွင်း ပြောင်းသည် စိုက်ပျိုးစရိတ်နည်းပါးမှုကြောင့် အခြားသောသီးနှံများဖြစ်သည့် အာလူး၊ ကြက်သွန်များနှင့်စာလျှင် အမြတ်အစွန်းပိုမိုရရှိလာပြီး ပြောင်းစိုက်ဧရိယာများ တစ်ဖြည်းဖြည်းတိုးလာတာကို မြင်တွေ့လာရပါတယ်။ မြန်မာနိုင်ငံမှာဆိုရင် ပြောင်းကို အလယ်ပိုင်းနှင့် ရှမ်းပြည်နယ်တို့တွင် စိုက်ပျိုးမှုများပါတယ်။

ရာသီဥတုနဲ့ စိုက်ပျိုးမြေသာ အခြေအနေပေးပါက အထွက်နှုန်းကောင်းရန်ဆောင်ရွက်ခြင်းသည် စိုက်ပျိုးသူ၏ကျွမ်းကျင်မှုနှင့် ထိန်းချုပ်မှုအောက်တွင်ရှိပါတယ်။ ပြောင်းသီးနှံသက်တမ်းတစ်လျှောက် လိုအပ်သောအာဟာရဓာတ်များကို စီမံခန့်ခွဲမှုသည်လည်း ပြောင်းစိုက်ပျိုးခြင်းရဲ့ အရေးကြီးတဲ့ကဏ္ဍတစ်ခုအဖြစ် ပါဝင်လာပါတယ်။

ပြောင်းသီးနှံသည် အာဟာရလိုအပ်ချက်မြင့်သောသီးနှံဖြစ်တဲ့အတွက် အာဟာရဓာတ်များကို လုံလောက်စွာထည့်မပေးနိုင်ပါက ၆၀ ရာခိုင်နှုန်းအထိ အထွက်နှုန်းကို ထိခိုက်စေပါတယ်။ ပြောင်းပင်က နိုက်ထရိုဂျင်နှင့် ပိုတက်စီယမ်ပမာဏကို များစွာလိုအပ်ပြီး ဆာလဖာ၊ ဖော့စဖောရပ်စ်၊ ကယ်လ်စီယမ်နှင့် မဂ္ဂနီစီယမ် စတဲ့ အာဟာရဓာတ်တွေကိုလည်း လိုအပ်တဲ့သီးနှံဖြစ်ပါတယ်။

နိုက်ထရိုဂျင် ၇၅ ရာခိုင်နှုန်းကို ပြောင်းဖူးပင်၏ အပင်ပိုင်းကြီးထွားမှုအဆင့် (ပြောင်းဖူးအနှံမထွက်မီအချိန်) တွင် လိုအပ်ပါတယ်။ ထိုအချိန်မှာ နိုက်ထရိုဂျင်ကို လုံလောက်စွာမရခဲ့ပါက ပင်စည်၊ အရွက်တွေကြီးထွားမှုကို ထိခိုက်နိုင်သည့်အပြင် ပြောင်းစေ့အဆန်ထွက်မှုကို ထိခိုက်နိုင်တဲ့အတွက် အထွက်နှုန်းကို လျော့ကျစေနိုင်ပါတယ်။ နိုက်ထရိုဂျင်ရဲ့ကျန်တဲ့ပမာဏကတော့ ပန်းပွင့်တဲ့အချိန် အစေ့အဆန်ဖြည့်တင်းတဲ့အချိန်တွင် လိုအပ်ပါတယ်။

ပိုတက်စီယမ် ၅၀ ရာခိုင်နှုန်းကို အပင်ပိုင်းကြီးထွားမှုအဆင့်တွင် လိုအပ်ပါတယ်။ ပန်းစပွင့်သည့်အချိန်နှင့် နို့ရည်တည်သည့်အဆင့်တွင် ဖော့စဖောရပ် ၄၅ ရာခိုင်နှုန်းကိုလိုအပ်ပြီး ထိုအချိန်က ဖော့စဖောရပ်ရဲ့ လိုအပ်ချက်အမြင့်မားဆုံးအချိန်လည်း ဖြစ်ပါတယ်။ သီးနှံပင်၏လိုအပ်သောအချိန်၌ အာဟာရဓာတ်ကို အချိန်မီပေးနိုင်ရန်လည်း အရေးကြီးလှပါတယ်။

ပြောင်းစိုက်ခြင်းကို မြေမပြင်မီ နွားချေး၊ မြေဆွေး စသည်တို့ကို တစ်ဧကလျှင် ၃ တန်မှ ၅ တန် ထည့်သွင်းပေးရမည်။ မြေကြီး၏ရုပ်ဂုဏ်သတ္တိနှင့် ဓာတ်ဂုဏ်သတ္တိများတိုးပွားစေရန် ကောင်းစွာဆွေးမြေ့နေသော သဘာဝမြေသြဇာနှင့် သစ်စိမ်းမြေသြဇာများကို မြေဆီလွှာအတွင်း နှစ်စဉ်ထည့်သွင်းပေးသင့်ပါတယ်။ မျိုးစေ့ဆောင်ရောဂါ၊ မြေဆောင်ရောဂါများကာကွယ်ရန်အတွက် သင့်တော်သော မှိုသတ်ဆေးတစ်မျိုးမျိုးကို လူးနယ်၍ စိုက်ပျိုးသင့်ပါတယ်။

ဓာတ်မြေသြဇာများထည့်သွင်းရာတွင် မြေပြင်ချိန်တွင် တစ်ဧကနှုန်းထားဖြင့် ယူရီးယားတစ်အိတ် (၁၁၂) ပေါင်၊ တီစူပါတစ်အိတ် (၁၁၂) ပေါင်၊ ပိုတက်ရှ် အိတ်ဝက် (၅၆) ပေါင်နှုန်း ထည့်သွင်းပေးရမည်။

ပြောင်းဖူးပင်သက်တမ်း ၂၀-၂၁ ရက်သား ကြားထွန်ဝင်သည့်အချိန်တွင် တစ်ဧကလျှင် ယူးရီးယား ၅၆ ပေါင်၊ ပိုတက်ရှ် ၂၈ ပေါင်နှုန်း ထည့်သွင်းပေးရမည်။

ပြောင်းပင်၏သက်တမ်း ၃၅-၄၀ ရက်သား ဘောင်တင်သည့်အချိန်တွင် ယူရီးယားတစ်အိတ် (၁၁၂) ပေါင်၊ ပိုတက်ရှ် ၂၈ ပေါင်နှုန်း ထည့်သွင်းပေး၍ ဘောင်တင်ပေးရပါမည်။

မြေသြဇာမကျွေးခင် အပင်ခြေရှိပေါင်းမြက်များကို ကင်းစင်အောင်ပြုလုပ်ရပါမယ်။ ပေါင်းမြက်များကင်းစင်မှသာလျှင် ထည့်ပေးသောအာဟာရဓာတ်များကို ပြောင်းပင်က ကောင်းစွာရရှိနိုင်မှာဖြစ်ပါတယ်။ အပင်ပေါက်သည်မှ တစ်လသားအတွင်း ပေါင်းမြက်ကင်းစင်ရန်နှင့် ရေမဝပ်ရန် အထူးဂရုစိုက်ဆောင်ရွက်ရပါမယ်။ ပြောင်းစိုက်ပျိုးပြီးသောမြေသည် အာဟာရဓာတ်ဆုံးရှုံးမှုများသည့်အတွက်ကြောင့် ပြောင်းသီးနှံဆက်တိုက်စိုက်ပျိုးခြင်းကို ရှောင်ရှားပြီး ပဲမျိုးစုံသီးနှံများဖြင့် သီးလှည့်စိုက်ပျိုး၍ ဆုံးရှုံးသွားသော အာဟာရဓာတ်များကို ပြန်လည်ဖြည့်ထည့်ပေးသင့်ကြောင်း အသိပေးလိုက်ရပါတယ်။

ကိုးကား- စိုက်ပျိုးရေးဦးစီးဌာန(အစေ့ထုတ်ပြောင်းသီးနှံ)၊ https://www.pacificseeds.com.au/wp-content/uploads/2019/10/Corn-nutrition-guide.pdf

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ