ကုန်တိုက်ပိုင်ရှင်လုပ်မယ်

    မြေသြဇာဝယ်စရာမလိုဘူး ဈေးကလည်းကြီးသေး မြေကြီးနဲ့ ပတ်ဝန်းကျင်ကိုလည်း ပျက်စီးစေနိုင်သေးတယ်။ မဝယ်နဲ့တော့ ကိုယ့်ဘာသာပဲလုပ်ကြမယ်။ အော်ဂဲနစ်စာပဲ စားကြမယ်။ အိမ်မှာတစ်နိုင်တစ်ပိုင် စိုက်ထားတာပဲဖြစ်ဖြစ်၊ စီးပွားဖြစ်စိုက်ထားတာကိုသုံးချင်လို့ နည်းနည်းအလုပ်ရှုပ်ခံတာပဲဖြစ်ဖြစ် လုပ်ကြရင် ကုန်ကျစရိတ်လည်း သက်သာမယ်။ အချိန်တစ်ခုတော့ပေးရမဲယ့် နည်းလေးတွေလည်း ပါတာပေါ့။ အားတဲ့အချိန်တိုင်း အိမ်ကလူတွေ ကလေးတွေခေါ်ပြီး မြေသြဇာလုပ်ကြရင်ဖြင့် အိမ်နောက်ဖေးဈေးဆိုင်မက ကုန်တိုက်ကြီးဖြစ်လာမှာ။ ပြောနေကြာပါတယ်။ ခုလုပ်ကြရအောင်...

(၁) ငါးမွေးရေ

    လတ်လတ်ဆတ်ဆတ် ငါးကန်ထဲကရေ၊ အိမ်သုံးအတွက်ဆို အလှမွေးငါးကန်ထဲကရေကို လောင်းလောင်းပေးလို့ရပါတယ်။ ရေငန်တော့မရဘူးပေါ့ ရေချိုငါးကန်ထဲကရေထဲမှာ ငါးရဲ့ အညစ်အကြေးလေးတွေပါပြီးတော့ သူတို့က အပင်အတွက်ကောင်းလို့ ဖျန်းတာဖြစ်ဖြစ် လောင်းတာဖြစ်ဖြစ် လုပ်ပေးလို့ရပါတယ်။ 

(၂) ငှက်ပျောသီး

     နှင်းဆီပင်စိုက်ရင် ငှက်ပျောသီးဖြစ်ဖြစ် စားပြီးကျန်တဲ့အခွံကိုပဲဖြစ်ဖြစ် (အခွံတော့မစားလောက်ပါဘူးနော်)ကို ချေပြီးထည့်ပေးလို့ရ၊ မြုပ်ထည့်လည်းရတယ်။ သူက ပိုတက်စီယမ်ကိုထောက်ပံ့ပေးနိုင်ပါတယ်။ တစ်ခြားအပင်တွေမှာလည်း သုံးလို့ရတယ်။ ငှက်ပျောခွံကို ရေစိမ်ပြီး ရွက်ဖျန်းအားဆေးလုပ်ရင်လည်း အဆင်ပြေပါတယ်။ 

(၃) ကော်ဖီမှုန့်

    နှပ်သောက်ပြီး ကျန်တဲ့ကော်ဖီမှုန့်လေးတွေကနေပြီးတော့ နိုင်ထရိုဂျင်ကို ပေးနိုင်ပါတယ်။ ပြီးတော့ ဖော့စဖောရပ်အက်ဆစ်နဲ့ ပိုတက်ရှ်လည်းပါတာကြောင့်မို့ အပင်တွေကို ထောက်ပံ့ပေးနိုင်ပါသေးတယ်။ နှင်းဆီတို့ ထောပတ်ပင်တို့နဲ့ သီးပင်တွေဆို ကြိုက်မှကြိုက်ပါပဲ။ အသီးပင်လေးတွေစိုက်ထားရင် ထည့်ပေးလို့ရပါတယ်။ အများကြီးလိုချင်ရင် မြေဆွေးနဲ့ရောပြီး သုံးလို့ရပါတယ်။ အိုးလေးတွေထဲထည့်ရင်တော့ ဖြန့်ပေးရမယ်နော်။ ရေစိုတဲ့ အပြုံလိုက်လေးကနေ မှိုလေးတွေ လိုက်တတ်လို့ပါ။

(၄) ချက်ပြုတ်ရည်တွေ

    ဘဲဥချဉ်ရည်ဟင်းလေးစားချင်လို့ အားလူးလေးပြုတ်ထားလို့... ပြီးရင် အဲ့ရေတွေကိုသွန်ရင် အပင်လေးတွေနား သွန်ပါ။ အဲ့အထဲမှာ အပင်လေးတွေအတွက် အာဟာရတွေပါပါတယ်။ နိုက်ထရိုဂျင်ပါပါတယ်။ အပူအတိုင်းလောင်းချင်ရင်တော့ မြက်ပင်လေးတွေကို လောင်း၊၊ မြေကြီးထဲမှာ နိုက်ထရိုဂျင်ကျန်ခဲ့မှာပါ၊ 

(၅) ကြက်ဥခွံ

    ကယ်လ်စီယမ် ထောက်ပံ့ပေးနိုင်တာ နာမည်ကြီးပဲ၊ လေနဲ့အခြောက်ခံ စုပြီးကြိတ်၊ အမှုန့်လေးတွေ လိုက်ဖြူး၊ ရှယ်ပါပဲ။

(၆) သစ်သားပြာ

    အရင်တုန်းက တောင်ယာစိုက်ခင်းတွေနဲ့ ခုထိတောင် ရောဂါလို့ထင်ရင် အကောင်လေးတွေနည်းနည်းရှိရင် ပြာပက်ကြသေးတာပဲ။ ပြာလိုက်ကြုံးပါ၊ အိမ်တော့ မီးမရှို့လိုက်ပါနဲ့နော်။ သစ်မာသားပြာတွေက ပိုပြိးတော့ကောင်းပါတယ်။ အက်ဆစ်နည်းနည်းဆန်တဲ့မြေကို ကြိုက်နှစ်သက်တဲ့အပင်လေးတွေ (ဥပမာ စတော်ဘယ်ရီ) တွေကိုတော့ သွားမသုံးဖို့ သတိထားပေးပါ၊ မြေချဉ်နေလို့ ပြင်ချင်တယ်ဆိုရင်တော့ ပြာထည့်ပေးလို့ရပါတယ်၊ 

(၇) လက်ဖက်စိမ်း

    တစ်ခါသောက် လက်ဖက်စိမ်း(Green Tea)ထုတ်လေးတွေဆိုရင် ရေ(၂)ဂါလန်နဲ့ရောပြီး (၄)ပတ်တစ်ခါလောက် အပင်တွေကို လောင်းတာဖြစ်ဖြစ်၊ ဖျန်းတာဖြစ်ဖြစ် လုပ်ပေးနိုင်ပါတယ်။ 

(၈) အမွှေး

    ထူးထူးဆန်းဆန်းပါပဲ၊ ဆံပင်ညှပ်ဆိုင်က ကိုယ့်ဆံပင်တွေ ပြန်သွားတောင်းရမလိုပါပဲ၊ ဆံပင်တွေက နိုက်ထရိုဂျင်ကိုထောက်ပံ့ပေးနိုင်ပါတယ်။ လူမွှေးပဲရပါတယ်လို့ အဲ့ ပူစီတို့ ဝုတ်ဝုတ်တို့ဆီက မရပါဘူးတဲ့။ 

(၉) မီးခြစ်ဆံ

    ငယ်ငယ်တုန်းကတော့တွေ့ဖူးတယ်။ ခုထိ သုံးနေသေးလားတော့ မသိတော့ပါဘူး။ မီးခြစ်ဆံခေါင်းလေး အိုးထဲထိုးထားရင် သူက မဂ္ဂနီစီယမ်ကို ထောက်ပံ့ပေးနိုင်ပါသတဲ့။ 

(၁၀) နို့

    ဗီတာမင်တွေထပ်ဖြည့်ထားလို့ ပိုကောင်းပါတယ်ဆိုတဲ့ နို့လေးတွေက လူအတွက်ရော အပင်တွေအတွက်ရော ကောင်းပါတယ်။ ကယ်လ်စီယမ်ကို ထောက်ပံ့ပေးနိုင်ပါတယ်။

    ကဲ ကုန်ကြမ်းတွေရပြီဆိုတော့ အိမ်နောက်ဖေးမှာ ကုန်တိုက်ကြီးဆောက်လိုက်တော့လေ။

Reference 

https://thegrownnetwork.com/15-simple-and-inexpensive-homemade-fertilizers/amp/