သီးနှံများရဲ့ အရည်အချင်းဆိုင်ရာ စံချိန်စံညွှန်းများအတွက် သုတေသနဆောင်ရွက်သွားမည်

သီးနှံများရဲ့ အရည်အချင်းဆိုင်ရာ စံချိန်စံညွှန်းများအတွက် တရုတ်နိုင်ငံ Guangxi Institute of Standards and Technology (GXIST) အဖွဲ့နဲ့ သုတေသန ဆောင်ရွက်သွားမှာဖြစ်ကြောင်း စိုက်ပျိုးရေးသုတေသနဦးစီးဌာနမှ သိရပါတယ်။

သီးနှံ(၃)မျိုးဖြစ်တဲ့ ပဲပုပ် ၊ ပြောင်းနဲ့ ဖရဲသီးနှံများရဲ့အရည်အချင်းဆိုင်ရာ စံချိန်စံညွှန်းများအတွက် တရုတ်နိုင်ငံနဲ့ ပူးပေါင်းပြီး သုတေသနဆောင်ရွက်သွားမှာဖြစ်တယ်လို့ စိုက်ပျိုးရေးသုတေသနဦးစီးဌာနမှ ဒုတိယညွှန်ကြားရေးမှုးချုပ် ဦးသန့်လွင်ဦးကပြောပါတယ်။

“ အခုက သီးနှံတွေရဲ့ စံချိန်စံညွှန်းတွေဖော်ဆောင်နိုင်ဖို့အတွက် သုတေသနနဲ့နည်းပညာတွေကို တရုတ်နိုင်ငံကအဖွဲ့နဲ့ ပူးပေါင်းပြီးတော့ သုတေသနဆောင်ရွက်သွားမှာပါ။ ပြောင်း ၊ ဖရဲနဲ့ ပဲပုပ် တွေကို အခုလက်ရှိမှာလည်း သုတေသနပြုဆောင်ရွက်နေပါတယ်”

ပဲပုပ်သီးနှံ(၅)မျိုး ၊ ဖရဲမျိုး (၃)မျိုး နဲ့ ပြောင်းသီးနှံ(၁၈)မျိုးတို့ကို သုတေသနပြုဆောင်ရွက်နေတာ ဖြစ်ကြောင်းလည်း အဆိုပါဌာနမှ သိရပါတယ်။

အဆိုပါ သုတေသနမှာ တရုတ်- မြန်မာနှစ်နိုင်ငံအကြား သီးနှံစံချိန်စံညွှန်းများ သတ်မှတ်ရေး၊ သုတေသနများ အကျိုးတူဆောင်ရွက်နိုင်ရေးနဲ့ အကောင်အထည်ဖော်နိုင်ရေးတို့အတွက် စိုက်ပျိုးရေး သုတေသနဦးစီးဌာနနဲ့ Guangxi Institute of Standards and Technology (GXIST) အဖွဲ့တို့ ပူးပေါင်းဆောင်ရွက်သွားမှာဖြစ်ကြောင်း စိုက်ပျိုးရေး သုတေသနဦးစီးဌာနမှ သိရပါတယ်။

တိုးတိုးခိုင်(ABM)