တစ်ပါတ်အတွင်း ကမ္ဘာ့ရော်ဘာဈေးကွက် သုံးသပ်ချက်

ဒီအပတ်ပထမနေ့ တနင်္လာမှာ ၁% ကျော်ကျော်ခန့် Red Zone ထဲရောက်သွားတယ်။ ယန်း ၁၈၀ ဝန်းကျင်ဈေးနှုန်းကို Red Zone လို့ဆိုလိုပါတယ်။ သောကြာနေ့အပိတ်ဈေးအောက်၁.၃% ကျပြီး ၁၈၁.၆ ယန်း/ကီလိုဂရမ်နဲ့ဈေးပိတ်ခဲ့တယ်လေ။ ရော်ဘာဝယ်လိုအား အလွန်နည်းနေတာကို စိုးရိမ်မှုတွေကြောင့်လို့ သုံးသပ်တယ်။ ဈေးနှုန်းက တကယ်ဆို ဈေးကွက်ဖွင့်စမှာ ၀.၃၃% တက်ပြီး ၁၈၄.၆ ယန်း/ကီလိုဂရမ်ဈေးနဲ့ Green Zone ထဲပြန်ရောက်လာခဲ့ပါတယ်။ 

အဓိက ရော်ဘာအိတ်စပို့တိုင်းပြည်တွေက သူတို့ရဲ့ အိတ်စပို့လျှော့ချမှုကို ဆက်လုပ်လေမလားဆိုတဲ့ စိုးရိမ်မှုတွေလည်း တက်လာတယ်လို့ နိအိမူရကပြောပါတယ်။ သူက Market Risk Advisory research firm ကပါ။ သိကြတဲ့အတိုင်း ရော်ဘာအထွက်ဆုံးနဲ့ တင်ပို့မှုအများဆုံး ၃ နိုင်ငံဖြစ်တဲ့ ထိုင်း၊ အင်ဒိုနီးရှားနဲ့ မလေးရှားတို့က သူတို့ရဲ့ ရော်ဘာဈေးနှုန်းမြှင့်တင်ဘို့အစီအမံဖြင့် ရော်ဘာတင်ပို့မှုကိုလျှော့ချတဲ့ အစီအစဉ်က မတ်လ ၃၁ ရက်မှာ ကုန်ဆုံးခဲ့ပြီလေ။ 

အင်္ဂါနေ့မှာ ဒုတိယနေ့အဖြစ် ရော်ဘာဈေးဟာ ၁% ကျော်ဆက်လက်ကျပါတယ်။ ဂျပန်စတော့ဈေးကွက် အားပျော့တာနဲ့ အပြိုင်ကျတာပါပဲ။ တိုကျိုမှ စတော့ရှယ်ယာပွဲစားကုမ္ပဏီ ယုတက ရှိုဂျိ ရဲ့ ဈေးကွက်ဆန်းစစ်သူ Gu Jiong ရဲ့အဆိုအရ စီးပွားရေးရာ ကိန်းဂဏန်းအချက်အလက်တွေ နှေးကွေးလေးလံနေတာရယ်၊ နစ်ကေးရဲ့အကျ နဲ့အတူတကွ ဝယ်လိုအားကလည်းနည်းနေတာကိုစိုးရိမ်ပြီး ရော်ဘာဈေးကို ဖိအားရစေခဲ့တယ်တဲ့။ ပြီးတော့ သူကဆက်ပြောတာက အမေရိကန်နဲ့ တရုတ်တို့ရဲ့ ကုန်သွယ်ရေးဆိုင်ရာတင်းမာမှုက ရော်ဘာဈေးအပေါ်အနုတ်လက္ခဏာပြစေတယ်တဲ့။ အမေရိကန်ရဲ့ ကုန်ပစ္စည်း ၁၂၈ မျိုးအပေါ် ၂၅% အထိ တင်သွင်းခွန်ကို သတ်မှတ်ပြဌာန်းလိုက်တယ်လို့ တရုတ်က တနင်္လာနေ့တုန်းက ကြေညာလိုက်တယ်လေ။ ကမ္ဘာ့စီးပွားရေးအင်အားကြီး၂ နိုင်ငံတို့ကြား တင်းမာမှုမြင့်တက်လာတဲ့သဘောပေါ့။ 

ဗုဒ္ဓဟူးနေ့မှာလည်း တတိယမြောက်နေ့အဖြစ် TOCOM မှာအကျနဲ့ ဈေးပိတ်တယ်။ ၀.၅ ယန်းကျကာ ၁၇၉.၆ ယန်း/ကီလိုဂရမ်ဈေးနဲ့ပိတ်တယ်လေ။ 

ရော်ဘာဈေးတွေ အားဆက်ပျော့နေတာ စတုတ္ထမြောက်နေ့ ဈေးပိတ်ချိန်အထိပါ။ တဆက်တစပ်တည်း ၄ ရက်ဆက်ဈေးကျနေတာပါပဲ။ တိုကျိုမှ ဖူဂျီတိုမိ စတော့ရှယ်ယာပွဲစားကုမ္ပဏီရဲ့ ဈေးကွက်ဆန်းစစ်သူ ကာဇုဟိကို ဆိုက်တိုရဲ့ အဆိုအရ တရုတ်ဆီက အရန်ရော်ဘာတွေတော်တော်များနေတာနဲ့ ဝယ်လိုအား ကျဆင်းနေတာရယ်က ဒီနေ့ရဲ့ ဈေးကွက်အပေါ်ဖိအားပေးနေတာတဲ့။ 

ပြီးတော့ ကြာသပတေးနေ့ကနေ စနေနေ့အထိက တရုတ်ပြည်မှာ ပိတ်ရက်ဖြစ်တယ်။ Tomb Sweeping Day အဖိုးအဖွား မိဘ ဆွေမျိုးတွေရဲ့ သင်္ချိုင်းဂူတွေကို သန့်ရှင်းရေးလုပ်ကာ ကန်တော့ကြသောနေ့ဖြစ်ပါတယ်။ ရှန်ဟိုင်းရဲ့ SHFE- Shanghai Future Exchange လဲ ပိတ်တော့တာပေါ့ ပုံမှန်ပိတ်ရက်နဲ့ တနင်္ဂနွေနဲ့ဆက်သွားတော့ တနင်္လာနေ့မှပဲ ပြန်ဖွင့်ပါတော့မယ်။  

Bloomberg သတင်းဌာနက ကာဇုဟိကိုရဲ့ စကားကိုကိုးကားထားတာက " တရုတ်မှာ အာူလပ်ရက်နဲ့တိုက်ဆိုင်စွာ အရောင်းအဝယ်လုပ်တဲ့ ကုန်စည်ပမာဏက နည်းနေတော့ ကုန်သည်တွေလည်း ရောင်းဝယ်လိုစိတ်မရှိကြတော့ဘူး" တဲ့။ အများအားဖြင့် TOCOM ကို SHFE ကဦးဆောင်တာပါ။ အခု SHFE ကပိတ်ထားတော့ ဒီလိုဖြစ်တာပါပဲ။ 

SHFE က ကိုင်ထားတဲ့ ရော်ဘာစတော့တွေဟာ ကြာသပတေးနေ့မှာ ဆက်များနေပါတယ်။ ဒါဟာ ၁၉ ပတ်မြောက် ဆက်တိုက်များနေတာဖြစ်တယ်။ စတော့များနေရင် ကုန်သည်တွေက အဝယ်နည်းပါမယ်။ အဝယ်မလိုက်ရင် ဈေးမလိုက်ပါဘူး။ 

ဒါပေမယ့် ဒီနေ့ သောကြာနေ့မှာ သို့မဟုတ် ဒီအပတ်အရောင်းအဝယ်နောက်ဆုံးနေ့မှာ တဦးတည်း ကစားနေတဲ့ TOCOM မှာ ရော်ဘာဈေးဟာ ၃.၀ ယန်းတက်ကာ ၁၇၉.၃ ယန်း/ကီလိုဂရမ်ဈေးနဲ့ ပိတ်သွားပါတယ်။ အပေါင်းလက္ခဏာပြပြီးပိတ်သွားပေမယ့် Red Zone ထဲက ပြန်မတက်သေးပါဘူး။ 

လာမယ့်အပတ်မှာ ဈေးလိုက်လာဘို့မျှော်လင့်ချက်က ရှိနေပါတယ်။ အခုအချိန်ဟာ ရွက်ကြွေရာသီပါ။ ရွက်ကြွေရာသီမှာ ရော်ဘာအစေးအထွက်နည်းပါတယ်။ တောင်သူတွေက အပင်ကိုအနားပေးကာ အစေးခြစ်နားကြတဲ့ရာသီဖြစ်တယ်။ ဒီတော့ ကုန်ကြမ်းက ဈေးကွက်ထဲမှာနည်းသွားရင် ဈေးတက်လာနိုင်တဲ့အကြောင်းတခုဖြစ်နိုင်ပါတယ်။ ထိုင်းအစိုးရကလည်း ရော်ဘာဈေးကို ထောက်မတ်စေဘို့ လျော်ကြေးပေးပြီး အပင်ပျိုတွေကိုပါ ခုတ်ခိုင်းမည့် အစီအစဉ်အပြင် ယာယီအားဖြင့် ကုန်ကြမ်းအထွက်လျော့စေဘို့ အစေးခြစ်ရပ်တန့်စေတာမျိုးလည်း လုပ်ဆောင်နေတာဆိုတော့...။ မျှော်လင့်စရာတွေရှိနေပါသေးတယ်။