ရာဘာ၊ ပျိုးပင်နဲ့ပျိုးစေ့များ တင်သွင်းခြင်းကိုပိတ်ပင်ထား

ရာဘာ ၊ပျိုးပင် နဲ့ပျိုးစေ့များ တင်သွင်းခြင်းကို ပိတ်ပင်ထား

အိမ်နီးချင်းနိုင်ငံများမှ ရာဘာပင်များမှာ မှိုရောဂါတစ်မျိုးဖြစ်တဲ့ Pestalotiopsis spp ကျရောက်နေတဲ့အတွက် ရော်ဘာအစိတ်အပိုင်းများကို တင်သွင်းခြင်းပိတ်ပင်ထားကြောင်း ကရင်ပြည်နယ် ပြည်နယ်ဦးစီးမှူးရုံးမှသိရပါတယ်။

အခုလက်ရှိအချိန်မှာ ရာဘာနဲ့ပတ်သတ်တဲ့ ပျိုးပင် ၊ ပျိုးကိုင်း ၊ မျိူးစေ့အပါအဝင် အပင်အစိတ်အပိုင်းအားလုံး တင်သွင်းခြင်းကို ပိတ်ပင်ထားတဲ့ ကြေငြာချက်ထုတ်ပြန်ထားတယ်လို့ ပြည်နယ်ဦးစီးမှူး ဦးသန်းထိုက်ကပြောပါတယ်။

“ရာဘာ ပျိုးပင်တွေ တင်သွင်းခြင်းကို ပိတ်ပင်ထားဖို့ စာတော့ထွက်ထားပေးပါတယ်။ သက်ဆိုင်ရာဌာနတွေကိုလည်း အကြောင်းကြားပေးထားပါတယ်။ တောင်သူတွေကိုလည်း အသိပေးမှုတွေလုပ်ပါတယ်။ အိမ်နီးချင်းနိုင်ငံတွေရဲ့ ရော်ဘာပင်တွေမှာလည်း မှိုရောဂါကျရောက်နေတဲ့အပေါ် သတင်းအရ စုံစမ်းနေပါတယ်”

ရောဂါလက္ခဏာ ကျရောက်နေမှုများကိုလည်း သက်ဆိုင်ရာသီးနှံကာကွယ်ရေးဌာနများနဲ့ ညှိနှိုင်းဆွေးနွေး လုပ်ဆောင်နေကြောင်းလည်း အဆိုပါရုံးမှ သိရပါတယ်။

ရာဘာပင်များမှာ ကျရောက်နေတဲ့ မှိုရောဂါတစ်မျိုးဖြစ်တဲ့ Pestalotiopsis sppကို မြန်မာနိုင်ငံအတွင်းသို့ ဝင်ရောက် မကူးစက်စေရန် နိုင်ငံတကာလေဆိပ်နဲ့ နယ်စပ်ဝင်ပေါက်များမှ ရော်ဘာပျိုးပင်အပါအဝင် အပင်အစိတ်အပိုင်းများ ဝင်ရောက်မှုအပေါ် စိစစ်ကြပ်မတ်ရန်နဲ့ရောဂါကြိုတင်ကာကွယ်ရေးများ ဆောင်ရွက်နိုင်းရေကို အသိပေး အကြောင်းကြားစာများ ထုတ်ပြန်ထားကြောင်းလည်း သိရပါတယ်။

တိုးတိုးခိုင်(ABM)