ပန်းမုန်လာစိမ်းစိုက်ပျိုးရာတွင် ပျိုးထောင်ချိန်မှစ၍ မှိုနှင့်ရောဂါများ မကျရောက်စေရန် အထူးဂရုစိုက်ကာကွယ်သင့်

ဆောင်းသီးနှံအနေဖြင့် ပန်းမုန်လာစိမ်းပင် (ဘရိုကိုလီပင်) စိုက်ပျိုးရာတွင် ပျိုးထောင်ချိန်မှစတင်၍ မှိုနှင့်ရောဂါများ မကျရောက်စေရန် အထူးဂရုစိုက် ကာကွယ်စောင့်ရှောက်ပေးရန် လိုအပ်ကြောင်း စီးပွားဖြစ်စိိုက်ပျိုးထုတ်လုပ်နေသူများထံမှ သိရသည်။

"ပန်းမုံလာစိမ်းပင်တွေက စမစိုက်ခင်မှာ ပျိုးအိတ်နဲ့ပျိုးထောင်ပြီး စိုက်ရတာဖြစ်တဲ့အတွက် ပျိုးထောင်ထားချိန်မှာကတည်းက မှိုမကျအောင်နဲ့ ခါးရိရောဂါမကျအောင် ဂရုစိုက်ပေးဖို့ လိုအပ်ပါတယ်။ အပင်ကြီးလာတဲ့အခါလည်း ပိုးကျလို့ရှိရင် ခေါင်ညွှန့်လေးတွေ ထိပြီး အဖူးအပွင့်တွေ မလှနိုင်တော့ဘူး။ အဲ့ဒါလေးတွေ အထူးဂရုစိုက်ပေးရတယ်။ အပွင့်ပွင့်ခါနီးရင်လည်း အပင်မှာ အရွက်မှာ အကွက်ကြီးတွေ ဖြစ်တတ်တယ်။ ဒေါင်မြှီးလိုမျိုး မှိုတွေမကျအောင် သတိပြုဂရုစိုက်ပေးရပါတယ်။"

ဟု မကွေးတိုင်းဒေသကြီး၊ ပွင့်ဖြူမြို့နယ်၊ သာစည်ကျေးရွာမှ ပန်းမုန်လာစိမ်းပင် (ဘရိုကိုလီပင်) စီးပွားဖြစ်စိုက်ပျိုးထုတ်လုပ်နေသူ ကိုလှထွေး က ပြောသည်။

ပန်းမုံလာစိမ်းပင် စိုက်ပျိုးရန်အတွက် မြေပြင်ရာတွင် ထယ်ရေးကောင်းကောင်းထွန်ယက်ကာ နွားချေး၊ ၁၅ ပတ်လည်တို့ ခံ၍ မြောင်း၊ ဘောင်များ ပြုလုပ်စိုက်ပျိုးကြသည်။

"မြေဆွေး၊ နွားချေး၊ စက်ဖွဲပြာရောတယ်။ ပြီးမှ သမအောင်မွှေပြီး အိတ်ကလေးတွေနဲ့ထည့်တယ်။ ရေဖျန်း မျိုးစေ့ထည့်ပျိုးတယ်။ ကျွန်တော်တို့ဒေသက ပေါင်းပင်သိပ်မရှိလို့ အလုပ်သမားခ မကုန်ပါဘူး။ ပျိုးသက် ၁၈ ရက်ကနေ ၂၁ ရက်သားအရွယ်မှာ မြေချစိုက်ပါတယ်။ မြေချစိုက်တဲ့အခါမှ ပျိုးအိတ်တွေကို ခွာပြီး၊ စိုက်ဘောင်တွေမှာ ကျင်းတူးစိုက်လိုက်တာပါ။ ပင်ကြားတန်းကြားကို တစ်တောင်ဝန်းကျင်စီ ထားပါတယ်။ စိုက်ပြီးနောက်မှာပဲ ရေသွင်းပေးတယ်။ ပြီးရင် တစ်ပတ်လောက်နေတဲ့အခါ အပင်အခြေအနေပေါ်မူတည်ပြီး ပုလဲကျွေးတယ်။ ပိုးသတ်ဆေး၊ အားဆေးဖျန်းတယ်။ အပင် နည်းနည်းဖားလာရင် အပင်ခြေကနေ ၁၅ ပတ်လည်တို့ဘာတို့ ခံပြီး ဘောင်ပြန်တင်ပေးတယ်။ မှိုသတ်ဆေးကိုလည်း အပင်အခြေအနေကို ကြည့်ပြီး သုံးပေးပါတယ်။"

ဟု ၎င်းက ဆက်လက်ပြောသည်။

ပန်းမုံလာစိမ်းပင်များကို ရေပေးဝေရာတွင် မြေကြီးအခြေအနေနှင့် ဒေသအလိုက် ရာသီဥတုအပေါ်မူတည်၍ စိုက်သက်တမ်းတစ်လျှောက်အတွင်း ၁၀/၁၅ ကြိမ်ခန့် ရေပေးဝေကြရကြောင်း သိရှိရသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ