ရော်ဘာပင်စိုက်ပျိုးသူများ သီးပုပ်ရွက်ကြွေရောဂါ သတိပြုသင့်

မိုးဦးရာသီရောက်ရှိသဖြင့် ရော်ဘာပင်စိုက်ပျိုးသူများ သီးပုပ်ရွက်ကြွေရောဂါကျရောက်မှု သတိပြုသင့်ကြောင်း တနင်္သာရီတိုင်းဒေသကြီး၊ မြိတ်ခရိုင် စိုက်ပျိုးရေးဦးစီးဌာနမှ သိရသည်။

မြန်မာပြည်ရှိ ရော်ဘာပင်များကို နှစ်စဉ် မိုးဦးရာသီရောက်ချိန်တိုင်း ဒုက္ခပေးလေ့ရှိသည့် သီးပုပ်ရွက်ကြွေရောဂါ (Phytophthora spp.) ကို မြိတ်မြို့နယ်အတွင်းရှိ စိုက်ခင်းတစ်ချို့တွင် စတင်ကျရောက်နေပြီး တခြားဒေသများလည်း သတိပြုနိုင်ရန်ဖြစ်သည်။

ရော်ဘာပင်တွေအတွက် အစာချက်လုပ်ရန်အရေးကြီးတဲ့ အရွက်တွေကို အဓိကထားပြီးတိုက်ခိုက်တတ်တဲ့ မှိုရောဂါတစ်မျိုးပါ။ ရော်ဘာအထွက်နှုန်းကို ထိခိုက်စေတဲ့ ရောဂါပါ။ မိုးများတဲ့ အောက်မြန်မာပြည်မှာ ပိုပြီးကျရောက်ပါတယ်။ ရှမ်းပြည်နယ်၊ ကချင်ပြည်နယ် တို့မှာတော့ ကျရောက်လေ့မရှိပါဘူး။ မိုးအုံ့တဲ့ရက်များလာရင်၊ စိုထိုင်းဆများလာရင် ဒီရောဂါပိုးက ကျတတ်ပါတယ်။

ဟု စိုက်ပျိုးရေးဦးစီးဌာန၊ မြိတ်ခရိုင်ဦးစီးမှူး ဦးဝင်းဇော် က ပြောသည်။

အဆိုပါရောဂါသည် ဓါတုပိုးသတ်ဆေးများနှင့် ပက်ဖျန်းကာကွယ်ရန်ခက်ခဲပြီး၊ ရောဂါဒဏ်ခံနိုင်ရည်ရှိသည့် ရော်ဘာမျိုးများကိုမူ ကျရောက်မှုနည်းပါးကြောင်း သိရသည်။

အပင်ရောဂါကျရောက်ချိန်ဖြစ်လို့ ကြိုတင်သတိပေးလိုတာပါ။ တခြား ဆိုးရွားတဲ့ရောဂါမျိုးတွေ ကျရောက်မှုမရှိအောင်လည်း မျိုးစေ့၊ ပျိုးပင်တွေ တင်သွင်းခွင့်ကို စီစစ်တာ၊ လေဆိပ်တွေ၊ နယ်စပ်တွေမှာရှိတဲ့ plant Quarantine ဌာနစခန်းတွေကနေ စနစ်တကျ စစ်ဆေးပြီး ဥပဒေတွေထုတ်ပြန် ကာကွယ်နေပါတယ်။

ဟု မြိတ်ခရိုင်ဦးစီးမှူး ဦးဝင်းဇော် က ဆက်လက်ပြောသည်။

ရော်ဘာပင်တွင် ကျရောက်တတ်သည့် ရောဂါများအနက် ဘရာဇီးနိုင်ငံ၊ တရုတ်နိုင်ငံတို့၌ ဆိုးဝါးစွာကျရောက်နေသည့် South American Leaf Blight- SALB ရောဂါကိုမူ မြန်မာနိုင်ငံနှင့် အရှေ့တောင်အာရှနိုင်ငံများ၌ ကျရောက်မှုတစ်စုံတရာ မရှိသေးကြောင်း သိရသည်။

နန်းထက်ထက်ချစ်(ABM)

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ