အပိုဝင်ငွေရရှိစေရန် ကြားသီးနှံအဖြစ် ကီလိုမာလကာသီးပင်များကို တွဲဖက်စိုက်ပျိုးသင့်

23/06/2021 11:30 AM တွင် ဒေါ်နန်းထက်ထက်ချစ် ဒေါ်နန်းထက်ထက်ချစ် မှ ရေးသား

    နှစ်ရှည်ပင်များ စီးပွားဖြစ်စိုက်ပျိုးထုတ်လုပ်သူများအနေဖြင့် အပိုဝင်ငွေရရှိစေရန် ကြားသီးနှံအဖြစ် ကီလိုမာလကာသီးပင်များကို တွဲဖက်စိုက်ပျိုးသင့်ကြောင်း သစ်သီးဝလံဈေးကွက်အတွင်းမှ သိရသည်။

ရော်ဘာပင်စိုက်တဲ့အခါ မာလကာသီးပင်နဲ့ ကြားညှပ်စိုက်လိုက်တယ်။ ကျွဲကောပင် စိုက်တဲ့အခါလည်း ကြားညှပ်စိုက်လိုက်တယ်။ ကျွဲကောပင်က ခြောက််နှစ်လောက်မှ အသီးစားရတယ်ဆိုရင် ကြားထဲက မာလကာပင်က စောစားနေရပြီလေ။ နှစ်ရှည်ပင်မှန်သမျှနဲ့ ကြားညှပ်စိုက်သင့်ပါတယ်။ ခုနှစ်နှစ်၊ ရှစ်နှစ်လောက်မှ အသီးတင်တဲ့ အပင်မျိုးဆို မာလကာပင်ကျတော့ ဒီနှစ်စိုက်ရင် နောက်နှစ်ပေါ်တာကြောင့် ကြားညှပ်သီးနှံအဖြစ် စိုက်လို့အဆင်ပြေတာပေါ့နော်။ အလုပ်သမားစရိတ်ကျေပြီး ငွေလည်ပတ်တာပေါ့။ နှစ်ရှည်ပင်က ဝင်ငွေမရခင် မာလကာသီးက ဝင်ငွေရနေအောင်ပေါ့။

ဟု ရန်ကုန်တိုင်းဒေသကြီး၊ တိုက်ကြီးမြို့နယ်၊ ဂျိုးဖြူတောင်ပေါ်ဒေသမှ နှစ်ရှည်ပင်နှင့်ကီလိုမာလကာသီးပင် ကြားညှပ်စိုက်ပျိုးသူ ဦးစည်သူက ပြောသည်။

    ကီလိုမာလကာသီးပင်များသည် စိုက်ပျိုးပြီး ခြောက်လတွင် စတင်အသီးသီးပြီး အချိန်ကာလ (၁)နှစ်ခွဲ ဝန်းကျင်တွင် စီးပွားဖြစ်ခူးဆွတ်ရောင်းချနိုင်ပြီ ဖြစ်သဖြင့် ကြားသီးနှံအဖြစ်စိုက်ပျိုးထားပါက အရံဝင်ငွေရရှိစေနိုင်ခြင်း ဖြစ်သည်။

ရော်ဘာပင်က ပင်ကြား (၁၀) ပေ၊ တန်းကြား ပေ (၂၀) စိုက်တယ်လေ။ ဒီတော့ တန်းကြား ပေ (၂၀)မှာ ကြားညှပ်ပြီး မာလကာသီးပင်ကို ထည့်စိုက်လို့ရတယ်။ ကျွဲကောပင်ဆိုရင်လည်း ပေ (၂၀) ပတ်လည် စိုက်တော့၊ ကျွန်တော်တို့က အဲ့ဒိ ပေ (၂၀) ပတ်လည်ကြားထဲမှာ မာလကာသီးပင်ကို ထည့်စိုက်လိုက်တယ်။ မာလကာသီးပင်က ပြုစုစောင့်ရှောက်ရတာလည်း မခက်ခဲဘူး။ မိုးဦးကျကာလမှာ ဥပိုးနဲ့ မှိုနည်းနည်းပါးပါးကျတတ်တာပဲရှိတယ်။ ဒါတောင်မှ ဆေးတောင် ကျွန်တော်တို့ တစ်ခါမှမဖြန်းရဖူးသေးဘူး။ သူ့ဟာနဲ့သူ ကီလိုမာလကာသီးပင်က အကြမ်းခံ ရှင်သန်နေတာပါပဲ။

ဟု ၎င်းက ဆက်လက်ပြောသည်။

    ကီလိုမာလကာသီးပင်များ စီးပွားဖြစ်စိုက်ပျိုးရာတွင် ပင်ကြားတန်းကြား (၁၀)ပေx(၁၂)ပေ အနေအထားဖြင့် ထားရှိစိုက်ပျိုးပါက တစ်ဧကလျှင် အပင်ရေ (၃၆၃)ပင် အထိ ဝင်ဆန့်နိုင်ကြောင်း သိရသည်။


East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ
Read more Facebook စာမျက်နှာသို့သွားရန်

ဆွေးနွေးချက်များ

ဆွေးနွေးရန်