မြန်မာပြည်အထက်ပိုင်း ကညွှတ်ဈေးကွက် တည်ငြိမ်နေ

လက်ရှိအနေအထားတွင် ကညွှတ်ဈေးကွက် အတက်အကျမရှိ တည်ငြိမ်နေကြောင်း ပြင်ဦးလွင်ရှိ ကညွတ်စိုက်ပျိုးသူများက ပြောသည်။

အခုလပိုင်းမှာတော့ ကညွှတ်ဈေးကွက်က အေးအေးဆေးဆေး အငြိမ်လေးပါပဲ။ ဈေးတအားကြီးမတက်လာပေမယ့် ကညွတ်တွေ ရောင်းလို့မကုန်တာမျိုးတော့မဖြစ်ပါဘူး။

ဟု မန်းတလေးတိုင်း၊ ပြင်ဦးလွင်မြို့နယ်၊ အင်သာကျေးရွာမှ စီးပွားဖြစ်ကညွတ်စိုက်ပျိုးသူ မခင်မျိုးသန့် က ပြောသည်။

ကညွှတ်ကို မန်းတလေးတိုင်းအတွင်းရှိ မြင်းခြံ၊ တောင်သာ၊ ကျောက်ဆည်၊ ပြင်ဦးလွင်ဒေသများ၊ ဧရာဝတီတိုင်း ဟင်္သာတမြို့၊ ရှမ်းပြည်နယ်၊ ကချင်ပြည်နယ် တို့၌ စိုက်ပျိုးထုတ်လုပ်နေပြီး၊ ပြင်ဦးလွင်ကညွတ်မှာ တခြားဒေသတွင် စိုက်ပျိုးထုတ်လုပ်သည့် ကညွတ်များနှင့် အရွယ်အစား၊ အရောင်၊ အရသာ ကွဲပြားမှုရှိပြီး လူကြိုက်များပြားသည်။

တခြားဒေသက ကညွတ်ဈေးတွေနဲ့တော့ မတူနိုင်ပါဘူး။ ပြင်ဦးလွင်ကညွတ်က လူကြိုက်များပါတယ်။ အရွယ်အစားလည်း လှတယ်။ ချိုတယ်။ အရသာပိုရှိပြီး နူးညံ့တယ်။ မြန်မာပြည်အောက်ပိုင်း ကညွတ်တွေက အရသာ နည်းနည်းခါးသက်တယ်။ မျိုးကတော့တူတယ်။ ရေမြေ၊ ရာသီဥတုကြောင့် အရသာကွာသွားတာပါ။ အရောင်ကွာခြားတာလေးကတော့ ကြည့်တတ်တဲ့သူဆို သိပါတယ်။ ပြင်ဦးလွင်ကညွတ်က ဖက်ဖူးစိမ်းရောင်လေးနဲ့ လတ်ဆတ်နေတာ။

ဟု မခင်မျိုးသန့် က ဆက်လက်ပြောသည်။

လက်ရှိဈေးကွက်တွင်း ပြင်ဦးလွင်ကညွတ် တစ်ပိဿာလျှင် ဆိုဒ်အကြီး (၅၀၀၀) ကျပ်၊ ဆိုဒ်အလတ် (၄၀၀၀) ကျပ်၊ ဆိုဒ်အသေးဆုံး (၃၀၀၀) ကျပ် ဈေးနှုန်းများဖြင့် ရောင်းဝယ်ဖောက်ကားနေကြောင်း သိရသည်။

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။)