မြေပဲ အရည်အသွေး ကောင်းမွန်မှုကြောင့် နာမည်ကျော် ဆီစက်များမှ အားထားဝယ်ယူ

မန္တလေးတိုင်းဒေသကြီး နွားထိုးကြီး မြို့နယ်ထွက် မြေပဲများမှာ အရည်အသွေးကောင်းမွန်မှုကြောင့် ရန်ကုန်မြို့နှင့် မန္တလေးမြို့မှ နာမည်ကျော် ဆီစက်များမှ တိုက်ရိုက် ဝယ်ယူလာကြောင်း သိရှိရသည်။ နွားထိုးကြီး မြို့နယ်တွင် မြေပဲကို သာမန်အားဖြင့် သုံးကြိမ် စိုက်ပျိုးပြီး မိုးဦးစိုက် မြေပဲ၊ မိုးလယ်စိုက် မြေပဲ၊ ဆောင်းတွင်းစိုက် မြေပဲဟူ၍ စိုက်ပျိုးမှု အပေါ် မူတည်ကာ တစ်နှစ်သုံးကြိမ် အရောင်းအဝယ် ဖြစ်လေ့ရှိသည်။ ဆောင်းတွင်းပိုင်း စိုက်ပျိုးသော မြေပဲမှာ နည်းပါးသည်။

လက်ရှိကာလတွင် မိုးဦးစိုက် မြေပဲများ ပေါ်နေသည့် အတွက် နာမည်ကျော် ဆီစက်များ နွားထိုးကြီးမြို့သို့ တိုက်ရိုက် ဆင်းဝယ် လာကြသည်။ နွားထိုးကြီးမြို့ အနီးတဝိုက်တွင် မြေပဲကို ထန်းဇင်၊ ထန်းကွ၊ စိန်ပန်းကန်၊ ပဲချက်၊ ဝက်လူး၊ တာပယ်၊ ဒေါင့်ဘိုး၊ နဘဲမြစ်၊ ဘုရားကြီး ကျေးရွာများတွင် အဓိက စိုက်ပျိုးပြီး အခြား ကျေးရွာများလည်း စိုက်ပျိုးကြသည်။ အခြားကျေးရွာများကမူ မိုးဦး မြေပဲကို အားထား စိုက်ပျိုးကြသည်။

နွားထိုးကြီး မြို့နယ်တွင် မိုးဦး မြေပဲကို အများအပြား စိုက်ပျိုးကာ လက်ရှိ မြေပဲပေါ်ချိန်တွင် တစ်နေ့လျှင် အိတ်ပေါင်း ၃၀၀၀ ကျော် အရောင်းအဝယ် ဖြစ်လျက်ရှိသည်။ အဓိက အားထား ဝယ်ယူသူများမှာ နာမည်ကျော် ပဲဆီသန့် ရောင်းသည့် ဆီစက်များ ဖြစ်ပြီး လက်ရှိ ပေါက်စျေး အနေဖြင့် ရှယ်စ မြေပဲ တစ်ပိဿလျှင် ကျပ် ၁၇၅၀ ရှိသည်။ နွားထိုးကြီး မြို့နယ်ထွက် မြေပဲများကို ဆီစက်များ အကြိုက်များခြင်းမှာ ပဲဆန်တစ်ပိဿလျှင် ၄၂ ကျပ်သား အထိ ထွက်ရှိခြင်း၊ ဆီအရောင်မှာ နနွင်းရောင် သမ်းပြီး အရောင် ကောင်းမွန်ခြင်း၊ အနံ့ အရသာ ပိုမို ကောင်းမွန်ခြင်း၊ မိုးနည်း ရပ်ဝန်းတွင် ထွက်ရှိသည့်အတွက် ကြာမြင့်စွာ သိုလှောင်ထားနိုင်ခြင်းတို့ကြောင့်ပင် ဖြစ်သည်။ လက်ရှိ ကာလတွင် နွားထိုးကြီး နယ်ထွက် မြေပဲဆန်များမှာ အရည်အသွေး ကောင်းမွန်ခြင်းကြောင့် ရန်ကုန်မြို့နှင့် မန္တလေးမြို့တို့ရှိ နာမည်ကျော် ဆီစက်များမှ ကားများဖြင့် တိုက်ရိုက်လာရောက် ဝယ်ယူလျက်ရှိကြောင်း သိရသည်။

တိမ်တမန်

Source- ၂၀၁၆ အောက်တိုဘာလ ၁၄ရက်ထုတ် ကြေးမုံ သတင်းစာမှ ထုတ်နှုတ် ဖော်ပြသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ