အပင်ရိုးတံကြီးကအစ အလကားမဖြစ်ဘူးဆိုတဲ့ ဆေးရွက်ကြီးဈေးကွက် ပြတ်လပ်မှုမရှိကောင်းမွန်နေ

မန္တလေးတိုင်းဒေသကြီး၊ မြင်းခြံနယ်တစ်ဝိုက် ဆေးရွက်ကြီးဈေးကွက် ပြတ်လပ်မှုမရှိ ကောင်းမွန်နေကြောင်း ကိုယ်တိုင်စိုက်ပျိုးနေသူများက ပြောသည်။

ကျွန်တော်တို့က ဆေးရွက်ကြီးပင်ကို မိရိုးဖလာ စိုက်ပျိုးခဲ့တာပါ။ ကွမ်းစားတဲ့အခါ ဗမာဆေးလို့ ခေါ်တဲ့ ဆေးလိပ်ခုံသုံးတဲ့ ဆေးရွက်ကြီးပင်အမျိုးအစားပါ။ နှစ်တိုင်း ၁၁ ဧကလောက် စိုက်ပျိုးပါတယ်။ ဆေးရွက်ကြီးက ဈေးကွက်ကောင်းမွန်ပါတယ်။ ကျွန်တော်တို့မြင်းခြံနယ်တစ်ဝိုက်မှာ ဒေသသုံးအနေနဲ့ ဆေးပေါ့လိပ်ထဲမှာထည့်တယ်။ အိန္ဒိယကလာတဲ့ ဆေး 92, 95 တို့လို ကွမ်းစားဆေးအဖြစ်လည်း အသုံးများကြတယ်။

ဟု မန္တလေးတိုင်းဒေသကြီး၊ မြင်းခြံမြို့နယ်၊ ထနောင်းတိုင်ကျေးရွာမှ ဦးအောင်ကျော်မြင့် က ပြောသည်။

ဆေးရွက်ကြီးကို မြန်မာနိုင်ငံအလယ်ပိုင်းဒေသများတွင် ကုန်ကြမ်းအတိုင်း၊ ဆေးပေါ့လိပ် လိပ်ရာတွင် ထည့်သွင်းလေ့ရှိပြီး၊ တချို့ဒေသများတွင်မူ ဆေးရွက်ကြီးဆိုင်ရာ ကုန်ချောထုတ်ကုန်များအနေဖြင့်လည်း ပြန်လည်ထုတ်လုပ်ကြကြောင်း သိရသည်။

ကျွန်တော်တို့လို စိုက်ခြံတွေဆီကို ဆေးလိပ်ခုံပိုင်တွေက တစ်နှစ်တစ်ခါ ဆေးရွက်ကြီး အဝယ်ဆင်းပါတယ်။ ဆေးလိပ်ခုံပိုင်ရှင်တွေနဲ့ ချိတ်ဆက်ထားတာမျိုးလည်းရှိတယ်။ စိုက်ပျိုးပြီး သုံးလသားလောက်ဆိုရင် ဆေးရွက်ကြီးပင်ကအရွက်တွေကို ခူးပြီး နေလှန်းတယ်။ ခြောက်သွားတဲ့အခါ ဝါးနဲ့ယက်ထားတဲ့ နှီးပုတ်တွေထဲထည့်ထားတယ်။ ရောင်းခါနီးမှ တစ်ရွက်ချင်း ရေနှပ်ပြီးမှ ရောင်းချတာပါ။ အရွက်တွေခူးပြီး ကျန်ခဲ့တဲ့ အပင်အရိုးတံကိုလည်း ဆေးလိပ်လိပ်တဲ့အခါ အသုံးပြုလို့ရပါသေးတယ်။ အပင်ရိုးတံကြီးက အစ အလကားမဖြစ်ပါဘူး။

ဟု ဦးအောင်ကျော်မြင့် က ပြောသည်။

ဆေးရွက်ကြီး ပိဿာချိန် (၁၀၀)လျှင် ငွေကျပ် (၂၅၀၀၀၀) ဝန်းကျင် ဈေးနှုန်းရရှိပြီး၊ တစ်ဧက စိုက်ပျိုးပါက ပိဿာချိန် (၇၀၀) ဝန်းကျင် အထွက်နှုန်းရှိကြောင်း သိရသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ