ဟင်းသီးဟင်းရွက်ပင်များကို ရေပေးရာတွင် သိထားရမည့်အချက် (၄) ချက်

ဟင်းသီးဟင်းရွက်ပင်ကို ရေပေးခြင်းသည် အရေးကြီးသောလုပ်ငန်းတစ်ခုဖြစ်သည်။ ရေပေးရာတွင် သစ်ပင်အမြစ်များရှိရာသို့ ရောက်ရှိအောင်ပေးရန်လိုအပ်သည်။ မစို့မပို့ဖြင့် အမြစ်ရှိရာမရောက်လျှင် အပင်ဖြစ်ထွန်းမှုအတွက် အထောက်အကူမဖြစ်သကဲ့သို့ အမြစ်အောက်အထိရေများ ရောက်သွားလျှင်လည်း ရေအပိုကုန်ခြင်းသာဖြစ်သည်။

ဟင်းသီးဟင်းရွက်ပင်များသည် သက်တမ်းတိုပြီး အမြစ်များလည်း မြေဆီလွှာအပေါ်ပိုင်း၌ ဖြစ်ထွန်းကြသည်။ ရေမလုံလောက်လျှင် အပင်ဖြစ်ထွန်းမှုနည်းပြီး အထွက်နှုန်းနည်းခြင်းနှင့် အရည်အသွေးမမီခြင်းများဖြစ်နိုင်သည်။ မြေဆီလွှာ၊ ရာသီဥတုနှင့် သီးနှံအမျိုးအစားတို့သည် ရေမည်မျှလိုအပ်သည်၊ မည်သည့်အခါ ရေပေးရသည်တို့ကို အဆုံးအဖြတ်ပေးသည်။ မိုးများသောဒေသ၌ပင် မိုးရေသည် သစ်ပင်ကလိုအပ်သောရေကို လုံလောက်စွာရမရနှင့် လိုအပ်သောအချိန်ဟုတ်မဟုတ် သတိထားရသည်။ စိုက်ပျိုးပြီးစအပင်များသည် အမြစ်သစ်များထွက်နိုင်စေရန် ရေကို မကြာမကြာလိုအပ်သည်။ ရေလိုအပ်မှုပမာဏနှင့် လိုအပ်သောအချိန်တို့ကို မြေဆီလွှာဖွဲစည်းမှု၊ အပင်ဖြစ်မြန်ဆန်မှု၊ ရာသီဥတုနှင့် ရေပေးနည်းတို့ဖြင့် ဆုံးဖြတ်ရသည်။

၁) မြေဆီလွှာဖွဲ့စည်းမှု

ရေကို မည်မျှများများနှင့် မြန်မြန်စုပ်ယူသည်ဆိုသည်မှာ မြေဆီလွှာဖွဲ့စည်းမှုအပေါ်တွင် မူတည်သည်။ ရွှံ့စေးမြေ (Clay soil) သည် ရေကို နှေးနှေးသာစုပ်ယူပြီး များများစုပ်ယူထားနိုင်သည်။ ထို့ကြောင့် မိုးရေဖြစ်စေ၊ သွင်းရေဖြစ်စေ၊ မြေကွက်မှ အမြန်စီးဆင်းသွားသဖြင့် မြေကြီးကအစိုဓာတ်ကိုကောင်းစွာမရရှိချေ။ ရွှံ့စေးမြေတွင် ရေကို များများနှင့်ကြာကြာပေးရပြီး ခဏခဏပေးရန်မလိုချေ။ သို့ရာတွင် သဲမြေ (Sandy soil) ၌မူ ရေကို နည်းနည်းနှင့် မြန်မြန်ပေးရသည်။ မကြာမကြာထပ်မံပေးရသည်။ ရွှံ့စေးမြေရော၊ သဲမြေပါ သဘာဝမြေသြဇာ ( Organic matter) ထည့်ပေးခြင်းဖြင့် ဖော်ပြပါအားနည်းချက်များကို ပြုပြင်ပေးရသည်။

၂) အပင်ဖြစ်မြန်ဆန်မှု

နှစ်ချင်းစိုက် (ရာသီသီးနှံ) သီးနှံများသည် အပင်ဖြစ်မြန်သဖြင့် မြေဆီလွှာသည် အမြဲအစိုဓာတ်ရှိနေရန် လိုအပ်သည်။ အလားတူပင် နှစ်ရှည်ပင်ဖြစ်သော်လည်း အပင်ပေါက်ကလေးများ (Yong plants) သည် ၎င်းတို့မျိုး အပင်ကြီးများ (အမြစ်စွဲပြီးဖြစ်သော အပင်ကြီး)နှင့် နှိုင်းစာလျှင် ရေကိုမကြာမကြာလိုအပ်သည်။ အလားတူပင် စားသုံးသီးပင်အကြီး (အရွယ်ရောက်ပြီး အပင်)သည် ရေကို များစွာလိုအပ်သည်။ မိုးရေနှင့် မလုံလောက်လျှင် သွင်းရေပေးရသည်။ ပုသောအပင်ကြီးသည် မြင့်သောအပင်ကြီးကဲ့သို့ ရေများစွာမလိုအပ်သော်လည်း အမြစ်များ ၂ ပေပတ်လည်ခန့် ဖြာထွက်နေပါက တစ်ပတ်လျှင် ၂-၄ ဂါလံအနည်းဆုံးလိုအပ်သည်။ မိုးရေချိန်၊ အပူချိန်နှင့် မြေဆီလွှာဖွဲ့စည်းမှုတို့ကိုချင့်ချိန်၍ ရေသွင်းရသည်။

နောက်နှစ်ချက်ဖြစ်တဲ့ ရာသီဥတုနှင့် ရေပေးနည်း အခြေအနေများကို နောက်ဆောင်းပါးတွင် ဆက်လက်ဖော်ပြပါမည်။

ဒေါက်တာချစ်၏ “စားဖို့ စိုက်စို့ ဈေးကွက်တိုးချဲ့ဗျို့ အတွဲ (၁)” စာအုပ်မှကောက်နုတ်ဖော်ပြပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ