သရက်ခြံ ၁၆ ခြံကို GAP အသိအမှတ်ပြုလက်မှတ် ထုတ်ပေးသွားမည်

မန္တလေးတိုင်းဒေသကြီးတွင် ယခုနှစ်အတွင်း၌ ကွင်းဆင်းစစ်ဆေးပြီးသော သရက်ခြံ ၁၆ ခြံကို GAP အသိအမှတ်ပြု လတ်မှတ်ထုတ်ပေးသွာမည်ဖြစ်ကြောင်း စိုက်ပျိုးရေးဦးစီးဌာန (မန္တလေး) မှ ဒုတိယတိုင်းဦးစီးမှူး ဒေါ်လွင်လွင်ထွန်းက ပြောကြားသည်။

အဆိုပါသီးနှံများ စျေးကွက်အတွင်းသို့ အရည်အသွေးပြည့်မီစွာ ရောင်းချနိုင်ရေးနှင့် ပြည်ပနိုင်ငံများသို့ စံချိန်စံညွှန်းမ တင်ပို့ရောင်းချနိုင်ရေးအတွက် စိုက်ပျိုးထုတ်လုပ်သည့် တောင်သူများအား ကောင်းမွန်သော စိုက်ပျိုးရေးအလေ့အကျင့် (GAP) လက်မှတ်ထုတ်ပေးနိုင်ရန်အတွက် ကွင်းဆင်း၍ အသိပညာပေးဆွေးနွေးပွဲများ ဆောင်ရွက်ပေးကြောင်း၊ ထိုသို့ ဆောင်ရွက်ရာတွင် ယခုနှစ်အတွင်း ကော်ဖီခြံ ၁၅ ခြံ၊ စတော်ဘယ်ရီခြံ ၈ ခြံ တို့ကို GAP လက်မှတ်ထုတ်ပေးခဲ့ပြီး ဆက်လက်ထုတ်ပေးရန် သရက်ခြံ ၁၆ ခြံ ကိုလည်း ကွင်းဆင်းစစ်ဆေးကာ လက်မှတ်များထုတ်ပေးသွားမည်ဖြစ်ကြောင်း သိရသည်။

“တိုင်းဒေသကြီးအတွင်းမှာ စိုက်ပျိုးသီးနှံတွေကို ထုတ်လုပ်နေတဲ့ တောင်သူတွေကို GAP လက်မှတ်ပေးဖို့ သီးနှံ ၁၅ မျိုး သတ်မှတ်ထားပေမယ့် အဲဒါတွေအပြင် ကျန်တဲ့ သီးနှံတွေကိုပါ ပေးသွားမှာပါ။ လက်ရှိ GAP လက်မှတ်ထုတ်ပေးပြီးသား သီးနှံတွေကတော့ သရက်၊ ကော်ဖီ၊ နှမ်း၊ ပဲတီစိမ်း၊ စတဲ့ သီးနှံတွေဖြစ်ပါတယ်။ ဒီနှစ်ထဲမှာလည်း လာရောက်လျှောက်ထားတဲ့အတွက် ကော်ဖီ၊ စတော်ဘယ်ရီနဲ့ သရက်တွေကို ထပ်မံပေးသွားမှာပါ။ နောက်ထပ်ပေးဖို့ ရည်ရွယ်ထားတာကတော့ ခါကြက်ဥ သီးနှံကိုလည်း GAP လက်မှတ်ပေးသွားဖို့အတွက် စီစဉ်ဆောင်ရွက်မှုတွေရှိနေပါတယ်။ ဟု ၎င်းက ဆက်လက်ပြောဆိုသည်။

၂၀၁၈ ခုနှစ်တွင် တိုင်းဒေသကြီးအတွင်း GAP အသိအမှတ်ပြု လက်မှတ်များ ထုတ်ပေးခဲ့မှုအနေဖြင့် မြို့နယ် ၁၁ မြို့နယ်တွင် သရက်ခြံ ၁၅ ခြံ၊ မြို့နယ်တစ်မြို့နယ်တွင် ကော်ဖီခြံခြောက်ခြံ၊ မြို့လေးမြို့နယ်တွင် နှမ်းအတွက် ၂၁ ဦးနှင့် မြို့နယ်နှစ်မြို့နယ်တွင် ပဲတီစိမ်းအတွက် သုံးဦး စသည်တို့ကို GAP လက်မှတ်များ အသီးသီး ထုတ်ပေးထားကြောင်း သိရသည်။

အောင်ဖြိုးကျော် (ကြေးမုံ သတင်းစာ)