ရွှေဖရုံသီးနဲ့ ကျန်းမာရေး

ရွှေဖရုံသီး စားရတာ ကြိုက်နှစ်သက်တဲ့ သူတွေရှိမယ် ထင်ပါတယ်။ ရွှေဖရုံပင်ဟာဆိုရင် အသီးသာမက အစေ့၊ အညွန့်နဲ့ အရွက်တို့ဟာလည်း စားသုံးလို့ရပြီး ကျန်းမာရေးအတွက် ကောင်းကျိုးတွေ များစွာရှိနေတာ ဖြစ်ပါတယ်။ အရသာချိုချိုလေး ရှိတဲ့အပြင် အာဟာရဓာတ်တွေလည်း များစွာ ပါဝင်နေကြောင့် စားသုံးပေးသင့်တဲ့ အသီးတစ်မျိုးဖြစ်ပါတယ်။ ဘယ်လိုအာဟာရဓာတ်တွေ ပါဝင်နေလဲဆိုတာ လေ့လာကြည့်ရအောင်လား ခင်ဗျ။

ရွှေဖရုံသီးမှာ အများဆုံးပါဝင်နေတဲ့ အာဟာရဓာတ်ကတော့ ဗီတာမင် အေ ဖြစ်ပါတယ်။ ရွှေဖရုံသီးဟင်းတစ်ခွက်မှာ ယေဘူယျအားဖြင့် ဗီတာမင် အေ၊ ပရိုတင်း(အသားဓာတ်)၊ အမျှင်ဓာတ်၊ ဗီတာမင် စီ၊ ပိုတက်စီယမ်၊ ဗီတာမင် အီး၊ ဗီတာမင် ဘီ၂၊ မဂ္ဂနိစ်၊ သံ ဓာတ် အစရှိသည်ဖြင့် အာဟာရဓာတ်များစွာ ပါဝင်နေပါတယ်။ ရွှေဖရုံသီးမှာဆိုရင် ရေ ၉၄ ရာခိုင်နှုန်းပါဝင်ပြီး၊ ဗီတာမင်နဲ့ သတ္တုဓာတ်များလည်းစွာပါဝင်ကာ ကယ်လိုရီ ပါဝင်မှုနည်းပါတယ်။ ကယ်လိုရီပါဝင်မှုနည်းတာကြောင့် အဆီ၊ အစိမ့်များတဲ့ အစားအသောက်တွေရဲ့ နေရာမှာ အစားထိုး စားသုံးနိုင်ပါတယ်။

ကင်ဆာရောဂါများ ကာကွယ်ပေးခြင်း

ရွှေဖရုံသီးမှာ ဓာတ်တိုးဆန့်ကျင် ပစ္စည်းတွေ ပါဝင်မှုကြောင့် နာတာရှည် ရောဂါတွေဖြစ်ပွားမှုကို လျော့နည်းစေပါတယ်။ ဓာတ်တိုးဆန့်ကျင် ပစ္စည်းတွေကြောင့် ကင်ဆာရောဂါ ဖြစ်ပွားမှုကိုလည်း လျော့ချပေးနိုင်ပါတယ်။ အထူးသဖြင့် အစာအိမ် ကင်ဆာ၊ လည်ချောင်း ကင်ဆာနဲ့ ရင်သား ကင်ဆာ ဖြစ်ပွားမှုတွေကို လျော့နည်းစေတာပဲ ဖြစ်ပါတယ်။

ကိုယ်ခံအား ကောင်းမွန်စေခြင်း

အထက်မှာ ဖော်ပြခဲ့သလိုပဲ ရွှေဖရုံသီးမှာ ဗီတာမင်ဓာတ်တွေ ပါဝင်နေတာကြောင့် ခန္ဓာကိုယ်ရဲ့ ကိုယ်ခံအားစနစ်ကိုလည်း တိုးတက်ကောင်းမွန်စေပါတယ်။ ဗီတာမင် အေ ကြွယ်ဝတဲ့ အစားအစာဖြစ်တာကြောင့် ကိုယ်ခံအားကောင်းမွန်စေပြီး ခန္ဓာကိုယ်တွင်း ရောဂါတွေဝင်ရောက်မှုကို ကာကွယ်ပေးနိုင်တာ ဖြစ်ပါတယ်။ ဗီတာမင် စီ ပါဝင်နေမှုဟာဆိုရင် သွေးဖြူဥ ထုတ်လုပ်မှုကို တိုးစေပြီး ခန္ဓာကိုယ်မှာ အနာတရ ဖြစ်ခဲ့ပါကလည်း လျင်လျင် မြန်မြန်နဲ့ သက်သာပျောက်ကင်းစေပါတယ်။

အမြင်အာရုံ ကောင်းစေခြင်း

နောက်တစ်မျိုး ကောင်းကျိုးကတော့ အမြင်အာရုံကို ကြည်လင်စေတာပဲ ဖြစ်ပါတယ်။ ရွှေဖရုံသီးနဲ့ပြုလုပ်ထားတဲ့ မျက်စိအားတိုးဆေးတွေလည်း ဈေးကွက်ထဲမှာ ရှိနေပါပြီ။ မိမိရဲ့ ခန္ဓာကိုယ်မှာ ဗီတာမင် အေ ချို့တဲ့နေမယ်ဆိုရင် အမြင်အာရုံကို ထိခိုက်နိုင်တာကြောင့် ရွှေဖရုံသီး စားပေးခြင်းဖြင့် မျက်စိအတွင်းတိမ် ဖြစ်ပွားမှုနဲ့ မျက်စိအားနည်းတာမျိုးတွေအတွက် ကာကွယ်ပေးနိုင်တာ ဖြစ်ပါတယ်။

ကိုယ်အလေးချိန် ထိန်းညှိပေးခြင်း

ရွှေဖရုံသီးဟာဆိုရင် ကယ်လိုရီပါဝင်မှုနည်းတာကြောင့် ကိုယ်အလေးချိန်ကျစေပြီး ဆန်နဲ့ အာလူး ကဲ့သို့ ကာဗွန်အရင်းအမြစ်ကြွယ်ဝတဲ့ အစားအစာများထက် ပိုမိုစားသုံးနိုင်ပါတယ်။ ရွှေဖရုံသီးမှာ အမျှင်ဓာတ်တွေလည်း ပါဝင်တာကြောင့် မကြာခဏ အစာစားချင်စိတ် ဖြစ်ပေါ်မှုကိုလည်း ထိန်းချုပ်ပေးနိုင်ပါတယ်။

နှလုံးကျန်းမာရေး ကောင်းစေခြင်း

ပိုတက်စီယမ်၊ ဗီတာမင် စီနဲ့ အမျှင်ဓာတ်တွေ ပါဝင်တာကြောင့် သွေးဖိအားကို လျော့ကျစေပြီး နှလုံးရောဂါဖြစ်ပွားနိုင်မှုကိုလည်း လျော့နည်းစေပါတယ်။ ဒါကြောင့် နှလုံးရောဂါအခံ ရှိသူတွေအနေနဲ့ စားသုံးပေးသင့်တဲ့ အစားအစာဖြစ်ပါတယ်။ အမျှင်ဓာတ်တွေဟာဆိုရင် ခန္ဓာကိုယ်မှာ ရှိနေတဲ့ အဆိပ်အတောက်တွေကိုလည်း ဖယ်ရှားပေးနိုင်ပါတယ်။

အသားအရေ လှပစေခြင်း

ဗီတာမင် ဓာတ်တွေပါဝင်နေခြင်းဟာ အရေပြားအတွက် ကောင်းကျိုးများစွာ ရှိစေပါတယ်။ အသားအရေ နေလောင်တာတွေ၊ ခရမ်းလွန်ရောင်ခြည်ကြောင့် ပျက်စီးတာမျိုးတွေ အတွက် အရေပြားကို ပြန်လည်ကျန်းမာစေတဲ့ ကောင်းကျိုးတွေလည်း ရှိနေပါတယ်။

ရွှေဖရုံသီးကို ဟင်းချက်စားတာ အပြင် နည်းလမ်းများစွာနဲ့ ပြုလုပ်ပြီး စားသုံးနိုင်ပါတယ်။ ဟင်း၊ မုန့်၊ စွတ်ပြုတ်၊ အသုပ် စသည်ဖြင့် ပုံစံမျိုးစုံပြုလုပ်ပြီး စားသုံးလို့ ရပါတယ်။ ဒ့ါကြောင့် ကျန်းမာရေးအတွက် ကောင်းကျိုးတွေ များစွာရှိနေတဲ့ ရွှေဖရုံသီးကို မိမိအိမ်မှာ မိသားစုနဲ့အတူ စားကြည့်ကြဖို့ အကြံပြုလိုက်ရပါတယ်။

ဇင်ထူးနိုင်

ကိုးကားချက်

- https://www.healthline.com/nutrition/pumpkin#section9

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ