ကျွဲ၊ နွား မျက်ရည်ယို၊ ချောင်းဆိုးရောဂါအတွက် ကုသနည်း

ရာသီဥတုကြောင့် အပူအအေး ရုတ်တရက် ပြောင်းလဲချိန်တွင် ကျွဲ၊ နွားများ၏ အသက်ရှူပြွန်ချောင်း ရောင်တတ်ပါသည်။ ထိုအခါ ကျွဲ၊ နွားများသည် မျက်ရည်များယိုစီးကျသည်အထိ မချိမဆံ့ချောင်းဆိုးကြပါသည်။

ထိုရောဂါကို ပျောက်ကင်းစေသော ဆေးနည်းမှာ-

ရှိန်းခို- ၆ ပဲသား

ပိတ်ချင်းသီး- ၆ ပဲသား

ပရုတ်- ၄ ပဲသား

ဇဝက်သာ- ၁၂ ပဲသား

နွယ်ချို- ၁၂ ပဲသား

၄င်းဆေးအမည် ၅မျိုးကို အမှုန့်ထောင်း၍ ပျားရည်နှင့် ရောပါ။ တေဆေးကို ဆီးကင်းလုံးခန့် နေ့၊ ည တိုက်ပေးပါ။ ကျွဲ၊ နွားများ မချိမဆံ့ ချောင်းဆိုးပြီး မျက်ရည်ကျခြင်းကို အမြန်ဆုံး ပျောက်ကင်းစေပါသည်။

ကျွဲ၊ နွား မျက်စိနာရောဂါအတွက် မျက်စဥ်းဆေး

ကျွဲ၊ နွားများ အပူမိ၍ မျက်လုံးများ နီရဲနေခြင်း၊ မျက်ရည်များ ကျနေလျှင် လူသားများကဲ့သို့ မျက်စိနာနေခြင်း ဖြစ်ပါသည်။ ထိုကဲ့သို့ ဖြစ်ပွားပါက ကုသရန်ဆေးနည်းလေးကို ဖော်ပြပေးပါမည်။ 

ဆေးနည်းမှာ -

၁။ ချင်းလက်တစ်ဆစ်ခန့်ကို ကျောက်ပြင်တွင် ရေနှင့်သွေးပါ။

၂။ ၄င်းချင်းရည်ထဲကို ဆားအနည်းငယ်ထည့်၍ မျက်စိနာနေသော ကျွဲ၊ နွား ကို နေ့ ည မျက်စဥ်းခပ်ပေးပါ။

၃။ ထိုအခါမှာတော့ ကျွဲ၊ နွား သည် မျက်ရည်ပူများကျလာပြီး နှာချေလာပါမည်။

၄။ နှာပွင့်လန်း၍ ကျန်းမာလာမည်။ တမှိုင်မှိုင် ဖြစ်မနေတော့ဘဲ လန်းဆန်းလာပါမည်။

မှီငြမ်း- ဦးဝင်းဇော်(သုံးဆယ်)၏ “ကျွဲ၊နွား မျက်ရည်ယို၊ ချောင်းဆိုးခဲ့သော်” အကြောင်းမှ ကောက်နှုတ် ဖော်ပြပါသည်။