ဖုံးတုံးလုံးတုံး လောက်စာလုံး

မနေ့က ကျွန်တော်ရေးဖို့ကျန်ခဲ့တဲ့ “ဖုံးတုံးလုံးတုံး လောက်စာလုံး” ဆိုတာကို သိသူများမယ်လို့ထင်ပါသည်။

“ဖုံးတုံးလုံးတုံး”ဆိုတာက စပါးပင်ရဲ့ အနှံမထွက်မီ အနှံသန္ဓေတည်တဲ့ကာလ (တနည်းအားဖြင့်) မှို့ကပ်သည်မှ အနှံမထွက်မီကာလ ရက်အားဖြင့် ၃၅ ရက်ခန့်ကြာအတွင်း စပါးပင်သားတက်တွေ ဗိုက်ဖေါင်းနေတာကို မြင်တွေ့နေရပြီဆိုရင် အဲ့လယ်ကွက်ရှိ တမန်းပြင် “လောက်စာလုံး” လုံးလို့ရသည့် အခြေအနေရှိရင် ထွက်မယ့် အနှံတွေဆက်လက်နို့ရည်ခဲ ရင့်မှည့်လျှင် စပါးခင်းအောင်မယ်လို့ ပြောလိုရင်းဖြစ်ပါတယ်။

"လောက်စာလုံး" ဆိုတာကော သိကြပါရဲ့လား?။

“လောက်လေး”နှင့် ပစ်တာမှာသုံးတဲ့ ရွှံ့လုံးအခြောက်ကလေးပါ။

“လောက်လေး”ဆိုတာကော သိကြပါရဲ့လား?။

ငှက်ပစ်ဖို့၊ တစ်ခုခုကို ခြောက်လှန့်ပစ်ခတ်ဖို့ စပါးခင်းမှာ စာကလေးငှက်တွေစားနေရင်၊ ပြောင်းဖူးခင်းမှာ ကြက်တူရွေးတွေကျနေရင် ကြွက်၊ မြွေ၊ ခွေးစသည့် ဘာကိုမဆို အဝေးကလှမ်းပစ်တဲ့နေရာမှာ သုံးဖို့ ဆွဲပစ်လို့ရအောင် သားရေပင်(ခေါ်)မျှော့ကို နှစ်ဖက်အခွရှိ လက်ကိုင်အရွယ်သစ်သားမှာတပ်ပြီး သုံးလို့ရတဲ့ ပစ္စည်းလေးပါ။

ကျွန်တော်ဒီထက်မရှင်းတတ်တော့ပါ။

အဲသည် “လောက်စာလုံး” လုံးလို့ရဖို့ဆိုရင် လယ်မြေ ရွှံ့စေးမြေသည် ရေမရှိသော်လည်း လက်နဲ့လိုသလို ရွှံ့လုံး(လောက်စာလုံး) လုံးလို့ရသည့် အနေအထား အစိုဓာတ်ရှိနေရင် စပါးခင်းအောင်တယ်လို့ ရှေးကဆိုစမတ်ပြုခဲ့ကြခြင်း ဖြစ်နိုင်ကြောင်းပါခင်ဗျာ။

ဆင်းသီဟ