မြန်မာ့ဆီး(ဇီး)ပျားရည်ကို ဂျပန်နိုင်ငံဈေးကွက်မှ လိုလားနှစ်သက်မှုရှိ

မြန်မာ့ဆီး(ဇီး)ပျားရည်ကို ဂျပန်နိုင်ငံဈေးကွက်မှ လိုလားနှစ်သက်မှုရှိနေကြောင်း သဘာဝပျားရည်ရောင်းဝယ်ရေး လုပ်ငန်းများမှ သိရသည်။

မြန်မာနိုင်ငံမှထွက်ရှိသည့် တောဆီး(ဇီး)ပျားရည်ကို နမူနာပေးပို့ပြီးနောက် ဂျပန်နိုင်ငံမှ နှစ်သက်သဖြင့် ရန်ကုန်အခြေစိုက် NRD Co.Ltd ကုမ္ပဏီမှတဆင့် ၂၀၂၀ ခုနှစ်၊ ဧပြီ(၂၀)ရက်က ပျားရည် မက်ထရစ်တန်(၂)တန် ဂျပန်သို့ တင်ပို့ခဲ့သည်။

ကျွန်တော်တို့ဆီက မြန်မာ့ဆီး(ဇီး)ပျားရည်ကို ပါကင်ထုတ်ပိုးပြီး ကုမ္ပဏီကိုပေးရတယ်။ ကုမ္ပဏီကနေပြီး ဂျပန်ကိုတင်ပို့ပါတယ်။ တောဆီး(ဇီး) ပျားရည်နမူနာကို ဂျပန်ကို အရင်ပို့ကြည့်တော့ ဂျပန်နိုင်ငံဘက်က ကြိုက်တယ်ဆိုပြီး မှာယူခဲ့တာပါ။ မြန်မာ့အကောင်းဆုံးပျားရည်အမျိုးအစားထဲမှာ ဆီး(ဇီး) ပျားရည်က ပါဝင်ပါတယ်။ နေကြာပျားရည်ကျတော့ အေးခဲလွယ်တယ်။ သကြားပါဝင်မှုနှုန်း များတယ်။ ဆီး(ဇီး) ပျားရည်ကျတော့ အချဉ်ဓာတ်ကလေးရော အချိုဓာတ်ရော ပါတယ်။ မအေးခဲလွယ်ဘူး။ ဆီး(ဇီး) ပျားရည်ရဲ့ အဲ့ဒီအချက်လေးတွေကို ဂျပန်က သဘောကျသွားတာပါ။

ဟု ပျားသုံးဖော် သဘာဝပျားရည်ရောင်းဝယ်ရေးလုပ်ငန်းမှ စီမံအုပ်ချုပ်သူ ဦးမြင့်နိုင် က ပြောသည်။

ပြည်တွင်း ပြည်ပရှိ Export လမ်းကြောင်းများ ပြန်လည်လည်ပတ်ပါက ပျားရည်ထပ်မံမှာယူမှုများ ရှိလာနိုင်ကြောင်းသိရသည်။

၂၀၂၀ ခုနှစ် ဘက်ဂျတ်ကာလအတွင်းမှာတော့ ကျွန်တော်တို့ ပထမဆုံးတင်ပို့နိုင်ခဲ့တာပါ။ အခုက Export လမ်းကြောင်းတွေ သိပ်မလည်ပတ်နိုင်သေးလို့ ခဏရပ်ထားတာပါ။ လမ်းကြောင်းတွေ ပြန်ပွင့်တာနဲ့ ပျားရည်ထပ်ပြီးမှာယူဖို့ အလားအလာတွေလည်း ရှိပါတယ်။

ဟု ဦးမြင့်နိုင် က ဆက်လက်ပြောသည်။

အဆိုပါ တင်ပို့သည့်ပျားရည်မှာ အရည်အသွေးမြင့် ဥရောပပျားမျိုးကို ပြည်တွင်း၌ မွေးမြူ၍ စက်တင်ဘာလ၊ အောက်တိုဘာလများတွင် ထုတ်လုပ်ထားသည့် ဆီး(ဇီး)ပျားရည် အမျိုးအစားဖြစ်ကြောင်း သိရသည်။

(ဆောင်းပါးများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ