သင်္ဘောအဖိုပင်ကို ထဘီပတ်လိုက်ရင် အသီးသီးသလား

“သင်္ဘောပင်ကို ထဘီပတ်ရင် အသီးသီးသလား”

“မဟုတ်ပါဘူး ရှေးအယူအဆတွေပါ”

“အာ..တကယ်သီးတာဗျ”

“အဖိုပင်ကြီးမှာ အသီးတွေသီးနေတာ မျက်စိနဲ့တပ်အပ်ကိုမြင်ဖူးတယ်”

“ဟင်..တကယ်လား”

ဒီလိုမျိုး အပင်တွေကို အသုံးအဆောင်တွေပတ်တဲ့အယူအဆက မြန်မာမှာတင်မဟုတ်ဘဲ ထိုင်းလို အိမ်နီးချင်းနိုင်ငံတွေမှာပါရှိပါတယ်။

ယုံကြည်ကိုးကွယ်မှုတွေ၊ အပင်တွေ၊ အသုံးအဆောင်တွေရဲ့ ဆက်နွယ်မှုက ရိုးရာဓလေ့ထုံးထမ်းတွေမှာ ရှိနေတတ်ပါတယ်။

အပင်ခုတ်မယ်ဆို နတ်နေကိုင်းထားရတာတွေ၊ နတ်ကွန်းတွေကစလို့ သင်္ဘောအဖိုပင်မှာ ထဘီပတ်တယ်ဆိုတဲ့ အယူအဆတွေအထိ ကျယ်ပြန့်ပါတယ်။

ယုံကြည်မှုသက်သက်ပဲလား ..သဘာဝလွန်ဖြစ်ရပ်ဆန်းလားဆိုတာကိုတော့ ယနေ့ခတ်မှာစိတ်ဝင်စားစရာဖြစ်လာပါတယ်။

ဒီနေ့မှာတော့ သင်္ဘောအဖိုပင်နဲ့ ထဘီပတ်ရင် အသီးသီးတဲ့အကြောင်းကို စိုက်ပျိုးရေးရှုထောင့်ကနေ ချဉ်းကပ်လေ့လာကြည့်ရအောင်ပါ။

သင်္ဘောဆိုတာကတော့ အပူပိုင်းဒေသသီးနှံတွေထဲမှာ အရသာကြောင့်နာမည်ကြီးတဲ့အသီးအနှံပါ။ အဖိုပင် အမပင် လိင်စုံပင်ရယ်လို့ရှိပြီး အပင်ရဲ့အဖို၊ အမကွဲပြားမှုအလိုက် သင်္ဘောသီးရဲ့အရသာတွေ၊ ပုံစံတွေ၊ အသီးအရွယ်အစားတွေ ကွာကြပါသေးတယ်။

သင်္ဘောမှာ အဖိုပွင့်၊ အမပွင့်၊ လိင်စုံပွင့်ရယ်လို့ (၃ )မျိုးတောင်ရှိပါတယ်။

ဒါဆို သင်္ဘောသီးက ဘယ်အပင်မှာရနိုင်တာလဲ

အပင်တွေမှာ အသီးသီးတယ်ဆိုတာက အဖိုနဲ့ အမပေါင်းစပ်သွားတာပဲဖြစ်ပါတယ်။ အကြမ်းဖျင်းပြောမယ်ဆိုရင် ဝတ်မှုန်ရှိမယ်။ ဝတ်မှုန်ကိုလက်ခံတဲ့ အူတိုင်လေးရှိမယ်။ ဒီနှစ်ခုက ပေါင်းစပ်နိုင်တယ်ဆိုရင်အသီးသီးနိုင်ပါပြီ။ တစ်ချို့အပင်တွေမှာတော့ ဒီ ၂ ခုက ပန်းပွင့်တစ်ပွင့်တည်းမှာရှိလို့ ဘယ်သူ့အကူအညီမှမလိုပဲ ပေါင်းစပ်နိုင်ကြပါတယ်။ အဲ..တစ်ချို့ကြတော့ တစ်ပင်စီမှာရှိကြပြီး အောင်သွယ်တော်တွေ လိုပါတယ်။ ပျား၊ ပိတုန်းလေးတွေကူရင်ကူ၊ မဟုတ်ရင် လေနတ်သားက ကူပေါ့။ ဒီလို ကူညီမှုတွေရှိမှ ပေါင်းစပ်နိုင်တဲ့ အပင်တွေလည်းရှိကြပါတယ်။ ဒီလိုဖြစ်စဉ်ကနေ ကျွန်မတို့ စားသုံးနေတဲ့ အသီးလေးဖြစ်လာတာပါ။

သင်္ဘောအဖိုပင်

ရိုးတံရှည်ရှည်လေးပေါ်မှာ အစုလိုက်ပန်းပွင့်လေးတွေရှိနေရင်တော့ သင်္ဘောအဖိုပင်ဖြစ်ပါတယ်။

ဝတ်မှုံတိုင်၊ လက်ခံတိုင် (၂)မျိုးလုံးပါပေမယ့် လက်ခံတိုင်က အလုပ်မလုပ်တဲ့အတွက် အသီးမသီးနိုင်ပါဘူး။ အဲ..အပူချိန် အရမ်းမြင့်တဲ့ နွေမှာဆိုရင်တော့ အလုပ်မလုပ်တဲ့ လက်ခံတိုင်လေးက နိုးထလာပြီး လိင်စုံပင်ဖြစ်သွားတာမို့ အသီးသီးနိုင်ပါသတဲ့။ အဖိုပင်က ဒီလိုပြောင်းလဲတတ်ပါတယ်။ မာယာများတဲ့ အဖိုတွေပါနော်။ ဒါကြောင့် နွေရာသီအပူချိန် အရမ်းမြင့်တဲ့အခါ အဖိုပင်ကနေ လိင်စုံပင်ဖြစ်သွားပြီး အသီးတွေသီးနေတာမျိုးတွေ့ရတတ်ပါတယ်။

သင်္ဘောအမပင်နှင့် လိင်စုံပင်

ပင်စည်မှာ အစုလိုက်ကပ်ပွင့်နေကြတဲ့ ပန်းပွင့်တွေရှိရင်တော့ ဒါက အမပင်နဲ့ လိင်စုံပင်တွေပါ။ အမပင်မှာကတော့ လက်ခံတိုင်တစ်မျိုးပဲပါပါတယ်။ လိင်စုံပင်မှာသာ လက်ခံတိုင်ရော၊ ဝတ်မှုန်တိုင်ရောပါဝင်တာဖြစ်ပါတယ်။ ဒါကြောင့် အမပင်တွေဟာ အောင်သွယ်တော်မရှိရင် အစေ့မပါတဲ့ အသီးတွေသီးပါတယ်။

လိင်စုံပင်တွေကတော့ လက်ခံတိုင်ရော၊ ဝတ်မှုန်တိုင်ရော တစ်ပွင့်ထဲမှာရှိကြတဲ့အတွက် အနေနီးတော့ အောင်သွယ်မလိုပါဘူးတဲ့ရှင်။ သူတို့ဘာသူတို့ညားပါတယ်။ အသီးလည်း အောင်အောင်မြင်မြင်ထုတ်နိုင်ပါတယ် အမျိုးတို့ရေ။

သင်္ဘောအမပင်ဟာ အပူချိန် အရမ်းမြင့်လာတဲ့အခါမှာဆိုရင် ခဏလေး “ဖို”သွားတတ်ပါတယ်။ ခေါင်နှိမ်ပြီးရင်တော့ အမပင်အဖြစ်ပြောင်းလဲနိုင်ပါတယ်တဲ့။

လိင်စုံပင်တွေကတော့ ပူလွန်းရင် အမပင်ဖြစ်သွားကြပါသတဲ့။ ဒီလိုမျိုး အပူချိန်မြင့်တဲ့ကာလတွေမှာ သင်္ဘောနဲ့ပတ်သက်တဲ့ အဖို အမ အပြောင်းအလဲတွေရှိနေတတ်တာပါ။

ကဲ အပူချိန်အပေါ်လိုက်ပြီး မာယာများတတ်တဲ့ သင်္ဘောပင်အကြောင်းကတော့ ဒီလိုရှိပါတယ်အမျိုးတို့ရေ။ ထဘီပတ်လို့ သီးတယ်ဆိုတာကိုတော့ ဒီအချက်တွေအပေါ်မှာချိန်ထိုးပြီး စဉ်းစားကြည့်နိုင်ပါတယ်။ ဒီဆောင်းပါးလေးကတော့ သင်္ဘောမှာ အပူချိန်မြင့်တဲ့အချိန် ဖြစ်ပေါ်တတ်တဲ့ အလေ့အထလေးတွေကိုဖော်ပြပေးခြင်းသာဖြစ်ပါတယ်။

ကိုးကား-https://homeguides.sfgate.com/male-female-papaya-trees-56987.html

https://core.ac.uk/download/pdf/211323279.pdf (ဆက်လက်လေ့လာချင်ရင်တော့ ဟာဝိုင်ရီ ကျွန်းမှာပြုလုပ်ထားတဲ့ ဒီသုတေသန စာစောင်လေးကို ဖတ်ရှုနိုင်ပါတယ်)

ဆောင်းပါးများ/သတင်းများပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကိုထည့်ပေးပါရန် မေတ္တာရပ်ခံအပ်ပါသည်။

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ