အစိမ်းရောင်လမ်း
Greenovator
ရန်ကုန်တိုင်းဒေသကြီးအတွင်း ငါးကန်လိုင်စင်ကြေး ပေးသွင်းရန်အတွက် အကြွေးရရှိရန် ငွေကျပ်သိန်း ၁၅၀၀ ကျော်ရှိနေကြောင်း ရန်ကုန်တိုင်းဒေသကြီး ငါးလုပ်ငန်းဦးစီးဌာနမှ သိရသည်။
အဆိုပါ ငါးကန်လိုင်စင်ကြွေးငွေ ကျပ်သိန်း ၁၅၀၀ ကျော် တွင် တွံတေးမြို့မှ ကျပ်သိန်း ၁၀၀၀ ကျော်ရှိပြီး ငါးကန် လိုင်စင်ကြေးပေးမဆောင်သူများကို ဥပဒေအရ တရားစွဲအရေးယူသည်အထိ ညွှန်ကြားထားဖြစ်ကြောင်း သိရသည်။
"တစ်ချို့ငါးမွေးကန်သမားတွေ လိုင်စင်ရှိတယ်။ သို့ပေမယ့် သူတိုက ကျွန်တော်တို့ ဌာနကနေ သတ်မှတ်ထားတဲ့ နှစ်စဉ် ကြေးမသွင်းတဲ့အခါကြတော့ အကြွေးစာရင်းပေါ် တယ်။ ဒီအကြွေးစာရင်း ပေါ်နေတဲ့သူတွေက မွေးနေတာလား၊ မမွေးနေတာလားဆိုတာ ကျွန်တော်တို့ မသိဘူး။ ကျွန်တော်တို့က ကွင်းဆင်းစစ်မှ သိရတယ်။ တကယ်လို့ သူတို့က မွေးနေတယ်ဆိုရင် နိုင်ငံတော်ပေါ်မှာ သူတို့က အကြွေးတွေရှိတဲ့ သူတွေဖြစ်တဲ့အတွက် နိုင်ငံတော်က ဆောင်ရွက်ပေးမယ့် ကိစ္စနဲ့ပတ်သက်ပြီးတော့ အကြွေးကင်းတဲ့ သူတွေဖြစ်ဖို့တော့ လိုအပ်တာပေါ့။" ဟု ရန်ကုန် တိုင်းဒေသကြီး ဒုတိုင်းဦးစီးမှူး ဦးလှဌေးက ပြောသည်။
ထို့အပြင် တရားမဝင်တူးဖော်ထားသော ငါးကန်များကို ဒဏ်ကြေးငွေ ကျပ်သုံးသောင်ရိုက်၍ တရားဝင်လုပ်ကိုင်ခွင့်ပြုမည်ဟု စိုက်ပျိုးရေး၊ မွေးမြူ ရေးနှင့် ဆည်မြောင်းဝန်ကြီးဌာန၊ ပြည်ထောင်စုဝန်ကြီးမှ ပြောကြားထားသော်လည်း ငါးကန်လိုင်စင်ကြေး ပေးဆောင်ထားခြင်းမရှိဘဲ ဒဏ်ငွေအနည်းငယ်သတ်မှတ်သည့်အချိန်မှ လာရောက်သော ငါးကန်များကို လက်သင့်မခံနိုင်ကြောင်း သိရသည်။
ငါးလုပ်ငန်းဦးစီးဌာနသည် ငါးကန်လိုင်စင်ကြေးကို တစ်ဧကလျှင် တစ်နှစ်စာအတွက် ငွေကျပ် ၃၀၀၀ ကောက်ခံခဲ့ခြင်းဖြစ်ပြီး ယင်းကျန်ရှိနေသော လိုင်စင်ကြေးများကို ပြန်လည်ပေးဆပ်လိုပါက သက်ဆိုင်ရာ မြို့နယ်ငါးလုပ်ငန်းဦးစီးဌာနများသို့ ဆက်သွယ်ပေးဆောင်နိုင်ကြောင်း သိရသည်။
"ရန်ကုန်မှာ သိန်းထောင်ကျော် ရှိတယ်ဆိုတာက နှစ်ကာလကြာလာတာပါ။ အဲ့ဒါကို ကျွန်တော်တို့က မနှစ်က ပြန် လည်ပြီးတော့ အသေးစိတ်စစ်လိုက်တဲ့အခါ ဒါတွေက ပေါ်လာတဲ့ အတိုင်းအတာပါ။ အခုလည်း ကျွန်တော်တို့ ရသလောက်တော့ ကောက်နေတယ်။ တစ်နှစ်ကို သိန်းတစ်ရာကနေ သိန်းငါးရာအထိ အကြွေးဝင်အောင်ပေါ့။ အခု လက်ရှိကောက်နေတဲ့ ပိုက်ဆံမဟုတ်ဘူး။ အကြွေးကိုတော့ ရအောင်ကောက်နေတယ်။ ဒီကိစ္စနဲ့ ပတ်သက်ပြီးတော့လည်း ဒီအကြွေးက ကျေသွားမယ်လို့ ထင်ပါတယ်။" ဟု ဦးလှဌေးက ပြောသည်။
လက်ရှိအချိန်တွင် လိုင်စင်ကြေးပေးသွင်းရန် ကျန်ရှိနေသေးသော အကြွေးများကို တစ်နှစ်လျှင် သိန်း ၁၀၀ မှ သိန်း ၅၀၀ ရရှိအောင် ပြန်လည်ကောက်ခံသွားမည်ဖြစ်ကြောင်း သိရသည်။
နိုင်ငံတော်သို့ ငါးကန်လိုင်စင်ကြေး ပေးဆောင်ရန်အတွက် နှစ်ကြာရှည်သည့် ငါးကန်များအနေဖြင့် လိုင်စင်ပျက်ပြယ်သွားမည်ဖြစ်ပြီး လိုင်စင်ကြေးပေးဆောင်ရမည့် ငါးကန်များကို နို့တစ်စာများ ပေးပို့ထားကြောင်း သိရသည်။
"ဒဏ်ငွေ သုံးသောင်းရိုက်မယ်လို့ အမိန့်ထွက်လာရင် သုံးသောင်း ဒဏ်ငွေရိုက်ခံဖို့ ငါးဦးစီးရဲ့ ထောက်ခံချက်လာယူတဲ့အချိန်မှာ မွေးမြူရေးဆိုင်ရာ အခွန်အခတွေ ပြေကျေပြီးတဲ့လူ ဖြစ်ရမယ်ဆိုတဲ့ သတ်မှတ်ချက်လေး ထုတ်လိုက်ရင် သဘောကတော့ အကြွေးရှိရင် အကြွေးဟောင်းအရင်ဆပ်ပေါ့။ စကားအဓိပ္ပါယ်ကတော့ အတူတူပါပဲ။ ဒါမှမဟုတ် စာအနေနဲ့ နိုင်ငံတော်ကို ပေးသွင်းရမယ့် အခွန်အခတွေ ပြေကျေအောင် ပေးသွင်းပြီးတဲ့ သူတွေကိုပဲ ထောက်ခံပေးမယ်လို့ ပြောလိုက်လို့ရှိရင်တော့ ရှင်းသွား တာပေါ့။ အဲ့ဒါက အငြင်းပွားဖွယ်တော့ မရှိပါဘူး။ ဒါကလည်း လုပ်ရမယ့် လုပ်ငန်းဖြစ်တယ်။" ဟု မြန်မာနိုင်ငံ ငါးလုပ်ငန်းအဖွဲ့ချုပ် အထွေထွေအတွင်းရေးမှူး ဦးဝင်းကြိုင်က ပြောသည်။
ရန်ကုန်တိုင်းဒေသကြီးတွင် မွေးမြူရေးငါးကန်၊ ပုစွန်ကန် ဧကပေါင်း ၈၀၀၀၀ ကျော်ရှိပြီး တရားဝင်ငါးကန်၊ ပုစွန်ကန်ပေါင်း ၄၀၀၀၀ ဝန်းကျင်ရှိပြီး ကျန်ဧကပေါင်း ၄၀၀၀၀ ကျော်မှာ တရားမဝင် ငါးကန်၊ ပုစွန်ကန်များဖြစ်ကြောင်း သိရသည်။
အေးအေးမြင့် (ABM)
Greenovator ကြော်ငြာ
ဆွေးနွေးချက်များ
-
{{ comment.user.name }} - {{ formatDate(comment.created_at) }}
{{ comment.comment }}
Login With Google
{{ question.title }}