ဆေးဖက်ဝင် သဘာဝ...ဝါးပလုတ်

     ဝါးပလုတ်(ခေါ်) ဝါးဂျယ်လီ(bamboo jelly) မှာ တနင်္သာရီတိုင်းရဲ့ သဘာဝ အစားအစာလေးတစ်ခုဖြစ်ပါသည်။ တစ်နှစ်တစ်ခါ မိုးရာသီမှာသာရတတ်တဲ့ ဝါးပလုတ်(ခေါ်)သဘာဝဂျယ်လီမှာ ဝါးပင်မှရသော အဆီအနှစ်ဖြစ်သည့်အတွက် ဆေးဖက်လည်းဝင်ပါသည်။ 

ဝါးပင်မှ သဘာဝဝါးပလုတ်ရရှိပုံ

     - မိုးဖြိုင်ဖြိုင်ကျပြီး မျှစ်ချိုးရာသီတွင် မျှစ်ချိုးသူတွေမတွေ့ဘဲ ကျန်နေခဲ့တဲ့ မျှစ်စို့ပေါက်လေးများမှာ အရွယ်မရောက်တစ်ရောက်မျှစ်များဖြစ်၍ ဝါးအဖြစ်အသုံးပြုလို့မရသေးသည့်အတွက် လသားအရွယ်ဝါးလေး လူတစ်ရပ်ကျော်ကျော်ကို ရှာရပါသည်။

     - ထိုဝါးကို တွေ့ပါက မြေပြင်ကနေ လက်(၂)ဆစ်၊ (၃)ဆစ်မြောက်နေရာမှာ အဆစ်ရဲ့အောက်နားကနေ ဓါးနဲ့ ရေဝင်နိုင်ရုံ အပေါက်ဖြစ်အောင် ခုတ်ပေးရပါသည်။

     - မိုးတွင်းကာလ မိုးရွာချိန်တွင် မိုးရေတွေက ဝါးပေါက်ထဲဝင်ပြီး (၁၀)ရက်၊ (၁၅)ရက်၊ ရက်(၂၀)လောက်အကြာတွင် သွားကြည့်ပါက သဘာဝဝါးပလုတ် ကို ရရှိပါပြီ။

     - ဝါးကိုခုတ်ပြီးခွဲလိုက်လျှင် ဝါးအတွင်းအမှေးလေးတွေရဲ့ ရနံ့သင်းသင်းလေးတွေရနေပြီး ဝါးရနံ့မွှေးကာ ဂျယ်လီလို အခဲလေးတွေဖြစ်နေလျှင် ဝါးအားလုံးခုတ်လို့ရပါပြီ။ မခဲသေးပါက ကျန်တဲ့အပင်တွေကို နောက် (၅-၇) ရက်လောက်ကြာမှ သွားကြည့်ကြပါသည်။ ဂျယ်လီလို အခဲဖြစ်ပြီဆိုပါက အားလုံးခုတ်လို့ ရပါပြီ။

     - ဝါးပလုတ်မှာ စားလိုက်လျှင် တုန်တုန်အိအိဂျယ်လီလေးလို ဖြစ်နေပြီး ဝါးစိမ်းနံ့သင်းသင်းလေးနဲ့ ဖြစ်နေ၍ ငှက်သိုက်၊ ဆေးကုလားမတို့ သောက်ရသလိုမျိုးလေး ဖြစ်နေပါသည်။ ကလေးတွေလည်း ကြိုက်ကြပြီး ချောင်းမဆိုးတဲ့ သဘာဝဂျယ်လီလို့တောင် ပြောလို့ရပါသည်။

     ဝါးပလုတ်ကို ပျားရည်၊ နို့ဆီ၊ နို့စိမ်း၊ သံပရာ၊ ဇီး၊ နို့သစ်ခွ၊ သကြားညို စတာတွေနဲ့လည်း တွဲဖက်ဖျော်စပ်ပြီး သောက်လို့ရပါသည်။ ရေခဲသေတ္တာအောက်ထပ် အအေးခန်းတွင် ထား၍လည်း သဘာဝအော်ဂဲနစ် သရေစာအနေဖြစ် သုံးဆောင်နိုင်ပါသည်။ မိုးရာသီစာလေးဖြစ်လို့ သူ့ရာသီကုန်ပါက မရနိုင်တော့ပါ။ 

သဘာဝဝါးပလုတ်၏ ကျန်းမာရေးအကျိုးကျေးဇူးများ

-      ဝါးပလုတ်မှာ ဆီးချို၊ ကျောက်ကပ်၊ အသည်းဝေဒနာရှင်များ၊ ချွေးထွက်များသူများအတွက် အထူးသင့်တော်ပါသည်။

     - ရင်အေး၊ ဝမ်းအေးစေပြီး အမောပြေစေပါသည်။

     - သံပရာရည်၊ သကြား၊ ဆားအနည်းငယ်တို့ဖြင့် ဖျော်ရည်လုပ်သောက်ပါက အဆီကျ(ဝိတ်ကျ)ပြီး လှပစေပါသည်။

     - အမျိုးသမီးများ ဓမ္မတာလာချိန် သကြားနဲ့ ဝါးပလုတ်ကို ရောစားလျှင် နာကျင်ကိုက်ခဲတာတွေ လျှော့နည်းစေပါသည်။

     - အပူအပုပ်ကင်းစေပြီး ဝမ်းမှန်၊ ဆီးရွှင်စေပါသည်။

     - ဆီးပူ၊ ဆီးအောင့်၊ ဆီးကျင်သော ဝေဒနာကို သက်သာစေပါသည်။

     ဝါးပလုတ်ကို ဗူးတစ်ခုခုထဲထည့်သိမ်းထားပါက (၁၅)ရက်မှ (၁)လလောက်ထိ အထားခံပါသည်။

     ယခုဝါတွင်းကာလရောက်လာပြီမို့ အလှူအတွက် အအေးအနေနဲ့ ဝါးပလုတ်ကျွေးမွေးဖို့ အသင့်တော်ဆုံးဖြစ်ပါသည်။ 

     ဆေးဖက်လည်းဝင်၊ တစ်နှစ်မှာ မိုးရာသီ(၁)ကြိမ်သာပေါ်သော သဘာဝ ဝါးပလုတ်အကြောင်းကို လေ့လာရေးသားလိုက်ရပါသည်။

ပင်လယ်ပြာ (ငါးဦးစီး)

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကိုထည့်ပေးပါရန် မေတ္တာရပ်ခံအပ်ပါသည်။

CPP Fertilizer Company ကြော်ငြာ

စီပီပီ ကုမ္ပဏီမှ ဖြန့်ဖြူးလျှက်ရှိသော ပေါင်းသတ်ဆေးနှင့် အပင်ရောဂါကုသ ဆေးများ တောင်သူအားလုံးသည် ကျွန်တော်တို့၏ ဘ၀လက်တွဲဖော်ဖြစ်သည်။

Read more

ဟာမိုဇင်းပလပ်(စ်)

ဟော့(ပ်)ရိုး(လ်)

ကောင်စယ်

အီမီဒါနေး(လ်)

ပေါ်စီလန်

စီပီပီ Facebook စာမျက်နှာ သို့သွားရန်