ဆိုင်မှာဝယ်စရာမလိုဘဲ ကိုယ်တိုင်လုပ်နိုင်တဲ့ ပေါင်းသတ်ဆေး

ပေါင်းတွေက တော်တော်ဒုက္ခပေးတာ။ မိုးလေးတစ်ပြိုက်နှစ်ပြိုက် ရွာလိုက်တာနဲ့ နှုတ်ထားတာကနေ ပိုပွားနေသလိုပဲ။ တကတည်း...မစားရတဲ့ အပင်က တော်တော်လည်း သန်ပေတာကိုး။

ပေါင်းသတ်ဆေးဝယ်သုံးရင်လည်း အနံ့က မသက်သာဘူး။ ပတ်ဝန်းကျင်ကိုလည်း ထိခိုက်မှာစိုးရတယ်။ အိမ်က အဘွားကြီးက ကြပ်တတ်တာနဲ့ အင်း......မဖြစ်ချေဘူး။

ပြဿနာကတော့ တက်နေပြီဆိုတဲ့ လူတွေအတွက်ပဲဖြစ်ဖြစ်။ တစ်နိုင်တစ်ပိုင်လေး စိုက်နေပျိုးနေကြတဲ့ သူတွေအတွက် ကိုယ့်ခြံလေး ပေါင်းလေးတွေ သက်သာပါစေရဲ့လို့ ဆိုရင်တော့ လိုက်ပြီးသုံးနိုင်ဖို့ နည်းလမ်း (၂) ခုကို ပြောပြပေးလိုက်ပါတယ်နော်။

ပထမတစ်ခုကတော့ ရှာလကာရည်နဲ့ ဆားပါ။

အိမ်မှာသုံးနေတဲ့ ရှာလကာရည်က ရေသန့်ဘူး တစ်ဘူးဆို ၂၀၀ ပဲရှိပါတယ်။ နောက် ဆားတစ်ထုပ် ကို (၂၀၀) ပဲထား၊ နောက်တော့ ပန်းကန်ဆေးတဲ့ဆပ်ပြာအဆီ နည်းနည်းလောက် ညှစ်ချဖို့ပဲလိုတော့တာ။ ကုန်ကျစရိတ်ကလည်း သိပ်မများပါဘူး။ ရောပုံလေးကို ပြောမယ်။

ရှာလကာရည်နဲ့ ဆားကို ဆတူ၊ ရှာလကာရည် တစ်ခွက်ဆို ဆားလည်းတစ်ခွက်ဆိုပြီး ရောတဲ့ အချိုးအဆလည်း ရှိသလို၊ ရှာလကာရည်တစ်ပုလင်းမှ ဆား (၅) ဇွန်းလောက်ထည့်တဲ့ ရောစပ်နည်းလည်း အလုပ်ဖြစ်ပါတယ်။ ရောစပ်ပြီးရင်တော့ အပင်မှာ ဆေးကုပ်တွယ်တာမြဲအောင် ပန်းကန်ဆေးဆပ်ပြာဆီလေး နည်းနည်းညှစ်ထည့်လိုက်ပြီး ပေါင်းမြက်တွေကို လိုက်ဖြန်းပေး လိုက်ရင် ရက်တော့ နည်းနည်းစောင့်ရမယ်။ တစ်ဖြည်းဖြည်းချင်း သေသွားမှာပါ။ သတိထားရမှာတစ်ခုကတော့ ရှာလကာရည်ကြောင့် အသားကို နည်းနည်းနီစေ ရဲစေတတ်တာပါ။ ပြီးတော့ ဆားများများသုံးတယ်ဆိုရင် အပင်ပေါက်ဖို့ သိပ်မလွယ်ပါဘူး။ ကိုယ်က ပေါင်းတွေကိုသတ်ပြီး အပင်စိုက်ဖို့ သုံးတယ်ဆိုရင်တော့ ဆားကို လျော့ထည့်သင့်ပါတယ်။

ဒုတိယနည်းကတော့ ဂျင်းနဲ့ လုပ်တဲ့နည်းပါ။

ဂျင်းရယ်၊ ရှာလကာရည်ရယ်၊ နောက်တော့ ဆပ်ပြာဆီနည်းနည်းရယ်။ သူကျတော့ အချိုးက ဂျင်း (၁၀) သားဆို၊ ဆားလည်း (၁၀) သားပဲ၊ ဆပ်ပြာထည့်ရတဲ့ အကြောင်းရင်းကတော့ ဆေးတွေကပ်တာမြဲအောင်လို့ ထည့်တာပဲ၊ ဆိုတော့ကာ များများထည့်ရင် များများပိုကပ်နိုင်မယ်ပေါ့။ သတိထားရမှာကတော့ ကိုယ်စိုက်ထားတဲ့အပင်တွေကို မထိမိစေဖို့ပါပဲ။

တတ်နိုင်သလောက် မြေကြီးကိုမထိစေပဲ အပင်တွေကိုပဲ ဖြန်းပေးပါ။ အိမ်သုံးအတွက် ရည်ရွယ်တာမို့ ဒီအချက်ကိုတော့ လိုက်နာနိုင်လိမ့်မယ်လို့ ထင်ပါတယ်။ တကယ်လို့ အဲ့မြေကြီးမှာပါ ဘာအပင်မှ မပေါက်စေချင်တော့ဘူးလို့ ရည်ရွယ်ရင်တော့ ပုံးလိုက်လောင်းလည်း အဆင်ပြေပါတယ်။ ဒါပေမဲ့ စိုက်ပျိုးရတဲ့မြေလေးဖြစ်ဖို့ကတော့ တော်တော့်ကို ခက်ခဲတာပါ။

ကဲနောက်နည်းလမ်းလေး သွားကြစို့ရဲ့

ဆားချည်းပဲသုံးတာ။ ဆားကြမ်းပက်ထားပေးရင်လည်း အပင်တွေကို သေစေနိုင်ပါတယ်နော်။

ဒါပေမဲ့ အဲ့နည်းလမ်းအတိုင်းတော့ ဟုတ်ပါရဲ့။ ဆားတွေအများကြီး သုံးဖြစ်လိုက်တယ်ဆိုရင် ဆားပေါက်တဲ့မြေဖြစ်ပြီး စိုက်ပျိုးလို့ရတော့မှာ မဟုတ်ပါဘူး။

ကဲဗျာ မြေကို မထိခိုက်စေတဲ့ အကောင်းဆုံးနည်းကတော့ ရေနွေးလောင်းတာပဲဖြစ်ပါတယ်။ ပြုတ်လိုက်တာပေါ့။ အိမ်သုံးမို့လို့လည်း ရေနွေးလောင်းနိုင်တာပါ။ ဒါဆို စိုက်ခင်းတွေမှာ သုံးနေတဲ့ မိုးကာအုပ်ပစ်တာရောဆိုတော့??? ရတာပေါ့။ အဲ့လိုနည်းနဲ့လည်း ပေါင်းမြက်တွေကို သေစေနိုင်ပါတယ်နော်။

အိမ်တိုင်း အိမ်တိုင်း ပန်းပင်လေးတွေစီစီရီရီ စိုက်ခင်းလေးတွေကိုယ်စီနဲ့ လှနိုင်ကြပါစေ…………

ထွန်းဝင်းကျော်

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ