အငန်ဓာတ်နည်းပြီး အရသာရှိရှိစားသုံးနိုင်တဲ့ ငါးခြောက်ဖုတ်နည်း

    ဆားငန်ခြောက်ဝယ်လာမိလို့ဖြစ်ဖြစ် ငါးခြောက်ဖုတ်မယ်ဆိုရင် အရင်ဆုံး ဆားရည်ထဲမှာ ငါးခြောက်ကို နာရီဝက်လောက် စိမ်ထားပါ။ ပြီးမှ ရေ ၃ ထပ် လောက်ဆေးပြီးရင် မီးဖုတ်လို့ ရပါပြီ။

    ဆားရည်စိမ်ခြင်းက ငါးခြောက်ရဲ့အငန်ဓာတ်ကို နည်းသွားအောင်စုပ်ယူသလို ငါးခြောက်လှန်းတဲ့အခါ အခုသုံးနေကြတဲ့ ယင်မနားဆေးရဲ့ အန္တရာယ်ကလည်း နည်းသွားပါလိမ့်မယ်။

    ငါးခြောက်ဖုတ်တော့မယ်ဆို ငါးခြောက်ထုမယ့် စဥ်းနှီးတုံးနား ရေဇလုံလေးတစ်လုံး အသင့်ထားထားပေးပါ။ ငါးခြောက်ကို ကြွပ်ကြွပ်မကြိုက်ပဲ ပျော့ပျော့လေးစားချင်ရင်တော့ ဆီထည့်ထားတဲ့ ပန်းကန်လေးလည်း အဆင်သင့် လုပ်ထားပေးပါ။

ပြုလုပ်နည်းမှာ

- ငါးခြောက်ကို စပြီးဖုတ်လို့ မီးအပူနဲ့တွေ့ရင် ငါးခြောက်သားလေး စပြီးပျော့ပျောင်းလာပါလိမ့်မယ်။

- အဲ့ဒီအချိန် ငါးခြောက်ကိုပြန်ဆယ်ပြီး ဖွဖွလေး အသားပွလာအောင်ထုပြီးမှ ပြန်ဖုတ်ပါ။ 

- ငါးခြောက်က ကျက်လာပြီး တူးစပြုလာရင် အသင့်ထားထားတဲ့ ရေဇလုံထဲထည့်ပြီး ချက်ချင်း ပြန်ဆယ်ပေးပါ။

- ပြီးလျှင် မီးလေးခဏပြန်ပြပြီး ဖွဖွလေးထုပါ။

- ထုထားတဲ့ ငါးခြောက်ကိုချက်ချင်း အပူဓာတ်မကုန်ခင် ဆီစိမ်ပါ။ ဒါဆိုရင်တော့ ငါးခြောက်ပျော့ပျော့ပျောင်းပျောင်းလေးရပါပြီ။

    သက်ကြီးရွယ်အိုမိဘတွေလဲ အဆင်ပြေပြေဝါးလို့ရပါတယ်။ ကြွပ်တာကြိုက်ရင်တော့ ထုလိုက် ဆီစိမ်လိုက်မလုပ်ဘဲ ထုထားတဲ့ငါးခြောက်တွေကို အေးသွားမှ ဆီစိမ်ပါ။ ဒါဆိုရင်တော့ ငါးခြောက် ကြွပ်ကြွပ်လေး ရပါပြီ။

ပင်လယ်ပြာ(ငါးဦးစီး)

Ref: ရွှေပုစွန် page.