ရေလုပ်ငန်းအပေါ် မှီခိုင်လုပ်ကိုင်နေရသည့် အလုပ်သမား အခက်အခဲရှိ၍ လာမည့်နှစ်များ၌ Close Season ကို ၃ အစား ၂ လသာ ပိတ်သိမ်းပေးရန် တောင်းဆို

Close Season ကို ၃ လ ပိတ်သိမ်းခြင်းကြောင့် ရေလုပ်ငန်းအပေါ် မှီခိုလုပ်ကိုင်နေရသော အလုပ်သမားအနေဖြင့် ယင်း ငါးမဖမ်းရရာသီတွင် လုပ်ငန်းရပ်ထားရ၍ အခက်အခဲများ ကြုံတွေ့ရခြင်းကြောင့် လာမည့်နှစ်များ၌ Close Season ကို ၃ လအစား ၂ လသာ ပိတ်သိမ်းပေးရန် တောင်းဆိုခဲ့ကြောင်း မြန်မာနိုင်ငံ ငါးပိ၊ ငါးခြောက်၊ ငံပြာရည် ထုတ်လုပ်ရောင်းချသူများအသင်း အထွေထွေ အတွင်းရေးမှူးဦးထွန်းစိန်က ပြောသည်။ ရန်ကုန်မြို့ရှိ မြန်မာနိုင်ငံ ငါးလုပ်ငန်းအဖွဲ့ချုပ်၌ ဇူလိုင်လ ၉ ရက်က ကျင်းပပြုလုပ်သည့် ၁၂/၂၀၁၉ ကြိမ်မြောက် ငါးလုပ်ငန်းကဏ္ဍဆိုင်ရာ လုပ်ငန်းရှင်များ ပုံမှန်တွေ့ဆုံဆွေးနွေးပွဲတွင် ယင်းကဲ့သို့ ပြောကြားခဲ့ခြင်းဖြစ်သည်။

"ဒီနှစ်က လုံးဝပိတ်လိုက်တဲ့အတွက် တော်တော်အခက်အခဲ တွေ ဖြစ်နေပါတယ်။ လုပ်ငန်းရှင်တွေက သိပ်ထိခိုက်နစ်နာမှု မရှိပေမယ့် အဲ့ဒီလုပ်ငန်းရှင်အပေါ်မှာ မှီခိုစားသောက် နေရတဲ့ ဝန်ထမ်းတွေ သူတို့ရဲ့ သားသမီးတွေ ပညာရေးကအစ ထိခိုက်နစ်နာတဲ့အတွက် ကျွန်တော်တို့ တောင်းဆိုချင်တာကတော့ နောင်နှစ်တွေမှာ ၃ လအစား ၂ လပဲ ပိတ်ပေးပါလို့ " ဟု ဦးထွန်းစိန်က ပြောသည်။

ယင်းကဲ့သို့ Close Season အား သုညရာခိုင်နှုန်းအဖြစ် ဇွန် လမှ သြဂုတ်လအထိ ပိတ်သိမ်းလိုက်ခြင်းကြောင့် လုပ်ငန်းရှင်များအနေဖြင့် ထိခိုက်နစ်နာမှုသိပ်မရှိသော်လည်း ယင်းတို့အပေါ် မှီခိုလုပ်ထိုင်နေရသော ဝန်ထမ်းများအား ထိခိုက်နစ်နာမှုရှိသဖြင့် Close Season ကို ၃ လအစား ၂ လပိတ်ပေးရန်အတွက် တောင်းဆိုခဲ့ခြင်းဖြစ်ကြောင်း သိရသည်။

မြန်မာနိုင်ငံတွင် ငါးဖမ်းလုပ်ငန်းနှင့် ပတ်သက်၍ Baseline မရှိသဖြင့် စီးပွားဖြစ်ထုတ်လုပ်သော ပင်လယ်ငါးများသည် မည်သည့်လတွင် မျိုးပွား၍ မည်သည့်လတွင် သားပေါက်သည်ကို Gonadal Somatic Index (GSI) အား ကြည့်ရမည်ဖြစ်သော်လည်း လက်ရှိတွင် ယင်း GSI နှင့် ပတ်သက်ပြီး သုတေသန လုပ်ဆောင်းခြင်းမရှိသဖြင့် Jetty များတွင် ပင်လယ်ငါးအမယ်ပေါင်း ၂၀ ကို သုတေသနလုပ်သင့်ကြောင်း မြန်မာနိုင်ငံ ငါးလုပ်ငန်းအဖွဲ့ချုပ်မှ သိရသည်။

"ဒီနှစ်မှာ သုံးလပိတ်လိုက်တဲ့အတွက် ဘာကောင်းကျိုးတွေ ဖြစ်လာလဲဆိုတာ ကြည့်ရမယ်။ သုံးလပိတ်လို့ ကောင်းကျိုးအများကြီးဖြစ်တယ်ဆိုရင် သုံးလပိတ်သင့်တယ်။ ဒါပေမယ့် အရမ်းကြီးသိပ်မထူးရင်တော့ စဉ်းစားရမယ်။ အခုက ရေချိုငါးရဲ့ ငါးသားပေါက်တဲ့ ရာသီနဲ့ ပိတ်တာဖြစ်တယ်။ ပင်လယ် ငါးက ဘယ်အချိန်ဆိုတာမသိဘူး။ ဒါကြောင့် သုတေသနတွေ လုပ်ရမယ်။ စီးပွားဖြစ်လုပ်တဲ့ ငါးတွေက ဘယ်လမှာ မျိုးပွားမှုကောင်းလဲဆိုတာ သုတေသန မရခင်တော့ ကိုယ်မှန်းပြီး လုပ်ထားတာနဲ့ပဲ လုပ်ရမှာပေါ့။" ဟု မြန်မာနိုင်ငံ ငါးလုပ် ငန်းအဖွဲ့ချုပ် အကြီးတန်းဒုတိယဥက္ကဋ္ဌ ဒေါက်တာတိုးနန္ဒာတင်က ပြောသည်။

ငါးသယံဇာတ ထိန်းသိမ်းကာကွယ်ရန် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ငါးလုပ်ငန်းဦးစီးဌာနအနေဖြင့် ၂၀၁၃ ခုနှစ်မှ စတင်၍ နှစ်စဉ်ငါးမဖမ်းရ ရာသီ အဖြစ် သုံးလသတ်မှတ်ကာ ငါးဖမ်းသင်္ဘောများကို ရာခိုင်နှုန်းအလိုက် သတ်မှတ်၍ ငါးဖမ်းခွင့်ပေးလျက်ရှိပြီး ၂၀၁ ၈ ခုနှစ် Close Season ကို မေလ ၁၆ ရက်မှ သြဂုတ်လ ၁၅ ရက်အထိ သတ်မှတ်၍ ကမ်းဝေးငါးဖမ်းသင်္ဘောများ ၂၀ ရာခိုင်နှုန်းအထိ ဖြေလျော့ဖမ်းဆီးခွင့်ပြုခဲ့ကြောင်း သိရသည်။ ရန်ကုန်တိုင်းဒေသကြီး၊ တနင်္သာရီတိုင်းဒေသကြီးနှင့် မွန်ပြည်နယ်တို့တွင် ကမ်းနီး/ကမ်းဝေး ပင်လယ်ငါးဖမ်းလုပ် ငန်းရှင် အများအပြားရှိပြီး လက်ရှိမြန်မာနိုင်ငံတွင် ကမ်းဝေးငါးဖမ်းရေယာဉ်အစီးရေပေါင်း ၃၀၀၀ ကျော်ရှိကြောင်း သိရသည်။

အေးအေးမြင့်(ABM)

Greenovator ကြော်ငြာ

သီဟိုဠ်မှ ဉာဏ်ကြီးရှင်သည် အာယုဝဍ္ဎနဆေးညွှန်းစာကို ဇလွန်ဈေးဘေး ဗာဒံပင်ထက် အဓိဋ္ဌာန်လျက် ဂဃနဏဖတ်ခဲ့သည်။

Read more

Facebook page သို့သွားရန်