ဝက်မွေးမြူရေးတွင် အရေးပါသော ဝက်ခြံစနစ်တကျဆောက်လုပ်ခြင်း

ဝက်မွေးမြူလိုသူများအနေဖြင့် ဝက်ခြံကို ပုံစံအမျိုးမျိုးဖြင့်တည်ဆောက်နိုင်ပါသည်။ သို့သော် နည်းစနစ်မကျပါက အကျိုးသက်ရောက်မှု မရှိနိုင်သည့်အတွက် တည်ဆောက်မည့် မြေနေရာနှင့် အဆောက်အဦးသည် လွန်စွာအရေးပါလှပါသည်။ ဝက်များသည် ပူလွန်းခြင်း၊ အေးလွန်းခြင်း၊ စွတ်စိုထိုင်းမှိုင်းခြင်း စသည့်ဒဏ်များကို ခံစားရပါက ကျန်းမာရေးချို့တဲ့လာခြင်း၊ ကြီးထွားနှုန်း ညံ့ဖျင်းခြင်း၊ သားတင်သားစပ်မှုဆိုင် ရာထိခိုက်ခြင်း စသည်တို့ကြောင့် ထုတ်လုပ်မှု လျော့နည်းကျ ဆင်းတတ်ပါသည်။

ထို့ကြောင့် ဝက်ခြံဆောက်လုပ်ရာတွင် အောက်ပါအချက် များ လိုအပ်ပါသည်။

၁။ မြေကြီးအမာခံဖြစ်၍ လူနေအိမ်နှင့် ဝေးလျှင်ပို၍ သင့်တော်ပါသည်။

၂။ ပူပြင်းသောရာသီဥတုတွင် အပူဒဏ်ခံစားရမှုလျော့နည်းစေရန် ဝက်ခြံ၏အမိုးကို ခပ်မြင့်မြင့် ဆောက်လုပ်ရပါမည်။ လေဝင်လေထွက်ကောင်းရပါမည်။ နေပူဒဏ်မှကာကွယ်နိုင်ရန် အရှေ့အနောက် တန်းတန်းထား ဆောက်လုပ်ရပါမည်။

၃။ မိုးရာသီနှင့် ဆောင်းရာသီတွင် အအေးဒဏ်ကို ကာကွယ်ပေးနိုင်ရန် အကာအရံများ ပြုလုပ်ပေးနိုင်သည့် အဆောက်အဦးဖြစ်ရပါမည်။

၄။ အဆောက်အဦးအတွက်(ကွန်ကရစ်၊ သစ်သား၊ ဝါး၊ ဓနိ)စသည့် စျေးနှုန်းသက်သာပြီး ဒေသတွင်း လွယ်ကူစွာရနိုင်သည့် ပစ္စည်းများဖြင့် ပြုလုပ်နိုင်ပါသည်။

၅။ ဝက်ငယ်ကလေးများသည် အအေးမိခြင်းနှင့် စွတ်စိုထိုင်း မှိုင်းခြင်းတို့ကြောင့် ဝမ်းပျက်ဝမ်းလျှောရောဂါ၊ အသက်ရှူလမ်းကြောင်းရောဂါများကို ဝက်ကြီးများထက် ပို၍ ခံစားရ တတ်ပါသည်။ ထို့ကြောင့် ဝက်ငယ်ကလေးများကို မွေးမြူသောခြံသည် နွေးထွေး၍ ခြောက်သွေ့သော ခြံအဆောက်အဦးမျိုး ဖြစ်ရပါမည်။

၆။ အစာခွက်၊ ရေခွက်များကို လုံလောက်စွာထားရှိပြီး နေ့စဥ်သန့်ရှင်းပေးရပါမည်။

၇။ ကြမ်းခင်းသည် ဝက်များခြေမချော်စေရန်၊ လှဲခြင်းထခြင်း အဆင်ပြေစေရန်၊ ဝက်ချေးများသန့်ရှင်းရ လွယ်ကူရန်နှင့် ခိုင်ခန့်မှု့ရှိရန်တို့ လိုအပ်ပါသည်။

၈။ ဝက်များကို ပွန်းပဲ့ဒဏ်ရာရရှိစေသော အချွန်၊ အတက်၊ ဇောင်းစသည်များ မရှိအောင် ဂရုစိုက်ပါ။

၉။ ဝက်၏နှုတ်သီးဖြင့် တွန်းတိုးခြင်းကို အကြမ်းခံနိုင်သော သစ်သားပစ္စည်းအခင်းအကာများဖြင့် ပြုလုပ်ပါ။

၁၀။ ကြမ်းခင်းအကျယ်သည် (၃၀၀ x ၃၀၀)စင်တီမီတာ (၁၀ ပေ x ၁၀ ပေ)ရှိရပါမည်။

၁၁။ မြေပြင်တွင် မတည်ဆောက်ဘဲ အမြင့်ဖြင့်တည်ဆောက် မည်ဆိုပါက ဝက်ခြံအမြင့်သည် မြေပြင်မှ ၆၀ စင်တီမီတာ (၂ပေ) အထက်တွင် ရှိရပါမည်။

ဝက်တစ်ကောင်အတွက် လိုအပ်သော ခြံအတိုင်းအတာ

အမျိုးအစား အကျယ်အဝန်း(မီတာ x မီတာ)

အသားတိုးဝက် ၀.၅ - ၁

ကိုယ်ဝန်ဆောင်ဝက်မ ၁.၅ - ၂

နို့ပေးဝက်မများ ၄ - ၆

သားခွဲဝက် ၀.၃ - ၀.၅

မျိုးဝက်သိုး ၆ - ၈ ရှိရပါမည်။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။